تاج جالي من شاب فقري

التاج ده جالي من شاب فقري وأنا بشكره على ذكره لمدونتي في إجابته

اسم مدونتك ؟

ضربة شمس

لماذا اخترته ؟ ماذا تقصد به ؟
أنا اخترته لأنه بيمثل أحلى صفحة بحب أقراها واتابعها دايماً في جرنان الدستور وهي صفحة ضربة شمس لصاحبها الأب الروحي لكل الضربشمساويين حقيقي " خالد كساب " وبصراحة كده هي ملهاش غير معنى واحد عييييييييييش محدش واخد منها حاجة واعمل كل اللي انت عاوزه طالما صح حتى لو اللي حواليك قالوا عليك مجنون والبس اللي يعجبك مش اللي يعجب الناس واسمع منير وفيروز وأم كلثوم وعبد الحليم واسمع أجنبي ميهمكش اللي قدامك رأيه أيه فيك واقرأ كتاب في المواصلات زي ما نت عايز برده ولا تاخد في بالك الناس اللي عمالة تبحلق فيك وحب بلدك ونفسك والدنيا حواليك وكل حاجة هتبقى حلوة في عينيك حتى الحزن حاربه ملوش مكان عندنا .. هي حياة واحدة يا هنضيعها في الاكتئاب يا إما نستغل كل لحظة فيها

هو ده المستوى اللي أنا نفسي أوصله في الاستمتاع بالحياة إلى أقصى الحدود بس طبعاً بقابل مشاكل وعراقيل كتييييير في تحقيق الحلم ده لأن غصب عن الواحد هيقابل أحزان ومشاكل مش هيقدر يتغلب عليها بسهولة زي سهولة الكلام ولو قاوح وقال .. لأ هيضطر يكركب جوه نفسه ويرسم وش تاني براه والنتيجة الطبيعية .. الاختناق والاكتئاب عشان كده بحاول أوصل لحل وسط .. عشان أقدر أعيش في الدنيا دي

هل فكرت في إغلاق المدونة ؟ والسبب ؟

ساعات كتير كنت بفكر في كده عشان مكنتش بلاقي حاجة جديدة اكتبها وتكون في نفس الوقت تهم الجميع مع ان التدوين أساس فكرته انك تكتب اللي انت بتفكر فيه شخصياً أو اللي ييجي على بالك بس أنا لما كنت بفكر في كتابة حاجات شخصية كنت بخاف ان اللي يقرأ يعرف عني حاجة أو يستنتج شخصيتي .. مش عارفة ليه دايماً بخاف حد يعرفني

صورتك في المدونة ؟ رمزيتها ؟

أنا حاطة صورة الممثلة " أنجلينا جولي " لأني بحب تمثيليها قوي .. بتحسسني بإنها جامدة جداً وتقدر تعمل أي حاجة وفي نفس الوقت محتفظة بأنوثتها والصورة ذات نفسها عجباني لأني ساعات كتير بحس اني مكسوفة كده

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟

أي حاجة أحس انها هتفيد الناس اللي بتقرأ أو بتعبر عن حاجات بفكر فيها وبكده ممكن أكتب في أي مجال

لماذا تدون أصلاً ؟

قبل ما ادون أصلاً قريت مدونات كتير وعجبني اوي حكاية ان كل واحد له مساحة خاصة بيه يكتب فيها بحرية كل اللي هو عايزه من غير ما حد يكون رقيب عليه غير نفسه ومن غير ما حد يقول له هتكتب امتى او عن ايه .. الحرية .. الحرية .. الحرية

وبعدين اتفاجئت لما لقيتهم بيقبضوا على المدونين بسبب كتاباتهم قلت حتى الحرية هنا اتسلبت وراحت وخفت قلت مش هكتب وبعدين رجعت في كلامي وقلت هروبي ده مش من المذهب الضربشمساوي في شيء .. مادام حابة اني أكتب في مدونتي هنا يبقى هكتب اللي أنا عايزاه وهدافع عن حقي ده وحريتي دي حتى آخر نبضة في قلبي وآخرقطرة في دمي

أحلى جملة قيلت في وصف مدونتك ؟

أقل كلمة حلوة بسيطة بعتبرها أجمل جملة يعني كل اللي قالولي مدونتك جميلة بعتبرها أحلى جملة اتقالتلي عن مدونتي

أهمية التعليقات بالنسبة لك ؟

بحس انها المية اللي بتروي العطشان يعني مثلاً لما بكون بعرض حاجة محتارة فيها أو عايزة حد يفكر معاي بلاقي آراء كتير بتساعدني وخصوصاً اني خيالية اوي .. مقصدش خيالية بمعنى رومانسية .. لأ أقصد اني مخي مليان تساؤلات وحيرة وبيقعد يفكر في حاجات غريبة وكتيرة فببقى واثقة اني هلاقي آراء كويسة تفيدني

أحلى بوست كتبته ..ضع اللينك ..ثم اذكر لماذا ؟

http://darbetshamsy.blogspot.com/2007/02/feeling-gtrateful.html

البوست ده بحبه جداً لأني نفسي أي حد حبيته (يدخل فيه أي نوع من أنواع الحب) وأثر في وفي حياتي وشخصيتي تأثير إيجابي يقراه علشان يعرف قد ايه هو أثر في حياتي وكمان عشان المعاني اللي فيه جميلة أوي

أفضل مدونة قرأتها ..يمكن اختيار عدة مدونات ؟

أنا قريت مدونات كتير بس في مدونات حبيتها قوي وحسيت ان أصحابها قريبين مني

برنسس أميرة البلطجية

و كوكو الكميل

ولمياء وأميرة وشيماء ونضال

وشاب فقري ومودي وبني آدم والأباصيري

وشيكو وموني وشادي وإبراهيم

ولو حسن محمود عنده مدونة كنت هقول عليها

واللينكات بتاعتهم كلها عندي في أصووووول

أفضل بوست قرأته ..يمكن اختيار اكتر من لينك ؟

حنين من عند لميا

كوكتيل من عند برنسس

هل خسرت صديق بسبب كتابة هنا؟

لأ خالص بالعكس أنا كل يوم بكتسب صديق جديد وبعتز بالصداقة دي جداً ولا يمكن هخسر صداقة حد بإذن الله

حد قل ادبه فى التعليق ..ايه رد فعلك ؟

محصلش يا باشا ولو حصل بعد الشر بعد الشر يعني هرد عليه على الملأ برده عشان الناس تعرفه

أسوأ مدونة ..الإجابة إجبارية ..يمكن اختيار عدة مدونات ..هما كتير اصلا؟

في مدونات صادفتها لقيتهم كاتبين شتايم سافرة وبذيئة وأبيحة بعتبرها هي دي أسوأ مدونات

أسوأ بوست ؟

اللي كتبه أسوأ مدون في أسوأ مدونة

أسوأ مدون ..مهو هتجاوب هتجاوب ؟

طبيعي يعني هم أصحاب أسوأ مدونات مش عايزة فقاقة يعني

وبالنسبة لتمرير التاج أحب أترك الأمر ده لحرية اختيار من يريد