هو : بس بس بس بسسسسسسسسس ... انت يا بنتي !!!!!!!!!! ؟
هي : مين ؟ بسكوت !!!!!! ازيك يا بسكوت
هو : الحمد لله .. ازيك انت يا بسبوسة ؟ ساعة عمال ابسبسلك وانت مش بتردي
هي : انا قلتلك مليون مرة قبل كده انا مبردش عالبسبسة ، عايز تندهلي في الشارع اندهلي باسم بندق اخوي
هو : خلاص ، محصلش حاجة .. ازيك انتي ؟
هي : أنا الحمد لله كويسة .. إنما أنهي نسمة حلوة جابتك عندنا .. حتتنا منورة والله
هو : أبداً كنت جاي اقضي مصلحة وشفتك معدية قلت اسلم
هي : والمصلحة خلصت على خير ؟
هو : آه الحمد لله ، كله تمام
هي : وانت بقى عامل ايه ؟
هو : الحمد لله .
فتــــرة صمــــــــت
هي : ايه ده هو انا طويلة كده ليه ؟ انا حاسة اني اطول منك .. يا دي الكسوف
هو : ميهمش مش مشكلة .. بسبوسة : فكرت في الموضوع اللي قلتلك عليه ؟
هي : مانا قلتلك مش هينفع .. أنا أكبر منك بـشهر أو ... (متروكة لخيالكو) ازاي عايزنا نتجوز ؟
هو : انت عارفة كويس قوي ان الموضوع ده مش بيفرق معاي في حاجة
هي : بس بيفرق معاي انا .. حاسة زي ما يكون هيفضل طول عمره حاجز ما بيننا
وبعدين حتى لو انت مش حاسس بيه دلوقت .. اخاف مع أول مشكلة تعايرني بيه تقولي اني اكبر منك واطول منك وحاجات من دي
هو : انا عمري ما هقول كده والدليل اني عمري ما قولتلك كده لغاية دلوقت
هي : مش عارفة بقى .. خايفة بجد تكون دي النقطة اللي تهد عشنا بعد كده
تفتكروا بقى موضوع ان البنت اكبر من الولد
أو البنت أطول من الولد
بتفـــــــــــــــــــــــــــــــــــــــــــــــرق ؟
ولو متفرقش .. هتيجي لغاية فين وتفرق ؟
19 comments:
الموضوع نسبى
ومافيش قانون عام يسرى على الكل وخصوصا فى العلاقات البشرية
فى ناس الشكل مش فارق معاها خالص
وفى ناس السن مش عامل أساسى فى الاختيار
وفى ناس لازم الشكل والسن يكونوا متناسبين
رأيى الشخصى
أفتكر لازم يكون فى فرق بين الزوج والزوجة لا يقل عن سنتين ولا يزيد عن عشر سنوات وطبعا لصالح الزوج.
ليه علشان التفكير والتواصل والحكمة والنضوج
بالنسبة للشكل يفضل طبعا ان الزوج يبقى أكبر وأطول وأضخم
بس اللى بيحصل ياستى ان بعد الزواج هو بيكش وهى بتطخن او العكس
أصل الزواج بيعكس حاجات كتير
بس مش معنى كده ان اذا الزوجه اكبر بشهر او اتنين او سنه حتى يبقى مش هاينفع
فى حالات ممكن يبقى الزواج ناجح جدا
ملهاش قاعدة معينة
بس أصل اللى بيخلى الزواج يستمر مش السن والشكل
المعاملة أهم من كل ده
ومعلش كنتى عايزك تشوفى المدونة دى
ممكن؟
http://ma-3lina.blogspot.com/
سلام
دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له
وذلك يوم
الجمعه الموافق 9/3/2007
بدار الاوبرا المصريه
كوفى شوب الابداع
بجوار دار الابداع بداخل الاوبرا
والدخول للمكان من البوابه الخلفيه للاوبرا امام النادى الاهلى
والحضور بالملابس الشتوية
واوجه الدعوة خاصة الى الاخوات المدونات
يا ريت تنورينا بجد
ايمن فاروق
يا نهارى ....شهر ...ومش موافقه ...
بيتهيقلى كل والحد ومعتقداته...فيه ناس بتفرق معاهم...بس لدرجة شهر !!!!!!!!!!!!!!!!!!!!!!!!!!!
بصي بقا الراجل شاريكي
ومن الأخر عاوزك نصفه الآخر
الطول مئدور عليه يلبس بوت بكعب عالي
والسن بردوه مئدور عليه إيدك علي 100
جنيه وهضربلك اجدعها شهادة ميلاد
تصغرك عشرين سنة...الولد شاريكي
مضيعهوش...والأيام بتجري...وبعدين طب
فيه حالات كتيييييييييييييير كانت
البنت اكبر من الولد والجوازة نجحت
والعكس كمان كان فارق السن
كبيييييييييير بينهم وبردوه نجحت
يا آنسه الحب لا يعرف شهادة الميلاد
سلام
ومتنسيش تعزميني علي فرحك
بصي يا سيتي بالنسبه للسن انا مش شايفه مشكله ؛ بس بالنسبه للطول انا محبش لأن بحس ان الراجل لازم حضنه يبقي اكبر من الست عشان يحسسها بالاحتواء
طبعا بيبقي في احتواء نفسي بس الجسدي مهم
بحس ان الراجل يبقي ضخم علي الست يبقي احسن
انا شايف ان في مشكلة ...
لان الانسان مننا بطبعه ندام..
يعني بيندم
يعني لو اخدها مناخيرها كبيرة
بعد فترة من الزواج ..هيقول..
يعني مش كنت اختارتها مناخيرها اصغر شوية؟
يعني لو مش كنت اخدتها لونها افتح شوية
يعني مش لو كانت اقصر شوية بدل ما انا ماشي جنبها زي ابنها
انا شايف انك لازم تنسفي الموضوع
احمدك يارب دلوقتى بس عرفت قيمة الطول
مفيش اى بنت ممكن ترفضنى لان مفيش بنت اطول منى
هييييييييييييييييييييييه
هههههههههههههههههه
هههههههههههههههه
ههههههههههه
ايه الاسئلة الغريبة دي
لالالالالالالالالالالا
الموضوع ده نسبي جدا
بس مادامت هي مقتنعة بيه وبشخصيته ف لازم تشيل الافكار دي من دماغها
وكذلك هو
حسن
كلامك سليم جداً وفعلاً المعاملة هي أهم من الطول والسن والكلام ده كله وموافقة طبعاً على موضوع انه يبقى أكبر منها عشان الخبرة والنضج والحكمة وهكذا بشرط هي متتخنش بعد الجواز ولو هي أكبر منه بشهر ممكن الموضوع ينفع لو هم الاتنين متقبلين بعض كلياً من غير ما واحد فيهم يشوف نقص في التاني عشان يبقى الزواج ناجح
وحاضر هروح اشوف المدونة أهو
---------------------------
ربنا يقويكم يا rasputine وتبقى ندوة ناجحة بإذن الله وبالتوفيق
----------------------------
سفاح كرموز
هو اللي انا فهمته من كلامك انك مستغرب اوي ومستعجب اوي وفعلاً كل واحد ومعتقداته بس شكلك كده موافق على الجوازة دي ، يلا ربنا يوفقهم
-----------------------------
سمسم
تعليقك عجبني .. اللي عجبني فيه ان الدنيا حلوة في عينيك و ان الحب ملوش شهادة ميلاد وعموماً يا سمسم الفرح ده مش فرحي ، ده فرح بسكوت وبسبوسة وانت معزوم طبعاً من غير كلام
------------------------------
كوكاية
ايوة يا كوكاية .. الحضن .. الاحتواء .. كلام كبير .. بس حقيقي
----------------------------
يا من تكتب بالرصاص
الكلام اللي انت قلته هو اللي مخوف بسبوسة من الجوازة دي مع انها بتحب بسكوت بس خايفة موت لييجي بعد الجواز يقول الكلمتين اللي انت قلتهم دول .. ساعتها هيبقى جرح كبير اوي
هقولها تنسف الموضوع .. بس .. لأ .. حرام برده .. متهيألي تاخذ فرصها وبعدين اللي يحصل يحصل
----------------------------
شاب فقري
أيوة يا عم .. ماشية معاك .. الطول هيبة صحيح
-----------------------------
شادي
الموضوع فعلاً نسبي جداً .. يعني ممكن الناس تكون شايفة حاجة وهم يكونوا شايفين حاجة تانية خالص
وعشان جوازة زي دي تنجح فعلاً لازم يشيلو الأفكار دي من دماغهم بس ده تقريباً بيعتمد على مدى حبهم لبعض واقتناعهم بدماغ بعض .. وكويس انك اتكلمت عنهم مش عني .. سلام وشكراً
لا طبعا مش لدرجة شهر
دي محبكاها اوى
هو بيفرق من شخص لشخص اكيد
في الغالب الموضوع ده مش بيكون سبب في المشاكل
تقريبا يعنى
هي بس الناس اللي بتستغرب من الموضوع شوية
لكن طبعا لو الموضوع داخل في خمس سنين فيما فوق فده يبقى صعب اوي
وبالنسبه للطول
فجايز لو اطول منه بكتير هيبقى الموضوع سخيف اوي
وده رايي الشخصي
اما لو حاجة بسيطة ف ايه المانع ؟؟
الموضوع فعلاً نسبى
ولوالشاب والفتاة متفقين يبقى خلاص
المشكلة الاكبر بتكون فى الاهالى
جنبنا قزم متجوز بنت طويلة
والاتنين محترمين ومتدينين والحياة عادى
نضال
فعلاً لو الموضوع دخل في السنين هيبقى سخيف ومهماً كان لازم هم اللي يكونوا متفقين الأول بس فعلاً الموضوع ممكن يجيب مشاكل بعد كده وبسبوسة خايفة من كده اوي .. وانا نفسي تعيش ايامها وتوافق .. بس هل ده معناه انها مش بتحب بسكوت كفاية أو مش واثقة فيه كفاية لدرجة انها بتشك انه ممكن يقلب عليها في يوم من الأيام ؟ يعني هي تعرف ازاي ؟ ولا تتوكل على الله وخلاص واللي يحصل يحصل بعد كده .. واهو تعيش لها يومين حلوين قبل ما الدنيا تخرب ؟
شكراً يا قمر على مرورك .. بجد رأيك حلو
مودي
انت حطيت ايدك على نقطة مهمة اوي .. وهي نقطة الأهالي .. طب نحل الموضوع ده ازاي ؟ ونقنعهم ازاي ؟ يعني ممكن يكون الولد والبنت متفقين ومش شايفين الموضوع ده في بعض او مش فارق معاهم .. هنيجي عند الأهل هيبوزوا كل حاجة ويقولوا لهم احنا عندنا خبرة اكتر منكم .. احنا بنبص لقدام .. احنا شايفين ان الموضوع ده مش هينفع وهكذا .. ساعتها المساكين دول يعملوا ايه ؟
ايه دههههههههههههه
البوست ده من يوم خمسة وانا نايمة على وداني
وكمان سمسم دخل وساب كومنت وانا لأ
دانا بايني كبرت وخرفت وشئون الحكم بتتسرسب من ايدي
ما علينا
كويس والله يا شموسة ان اتكلمتي في القصة دي
لأن كان ليا زمايل صبيان يكون مثلا الواد بيحب واحدة ونفسه يرتبط بيها بس يقولك لأ اصلها اكبر مني بمش عارف كام يوم
ولو ماما عرفت انها اكبر مني حتعترض
كان بيبقي نفسي امسكه هو وماما واضربهم صراحة!!
لا طبعا.. بوجه عام المفروض فرق السن ميبقاش مشكلة
ولما يبقي فرق السن شهر وشهرين وسنة وسنتين وكلام فاضى كده يبقي كأنه مش موجود
والطول برضه مش فرق
رغم اني طوووووووول عمرى اقول اجوز اي حاجة الا واحد اقصر مني
لكن كما كبرت شوية حسيت ان لو الراجل دخل دماغي يبقي ايه المانع
وهو الفيصل فعلا ان كل طرف يبقي مالى دماغ التاني
ويجعله عامر
برنسس
انت تنوري البلوج في أي وقت وتيجي تسيبي كونتس وقت ما تحبي .. أمال ايه
أما أحلى حاجة بقى عجبتني في كلامك الحلو كله انك قلتي زي ماكنت انا بقول زمان لما كنت بفكر في الموضوع ده .. اني عمري ما اتجوز واحد اقصر مني .. لكن لما لقيت ان ممكن يبقى الولد والبنت داخلين دماغ بعض اوي ممكن يتنازلوا لأنهم مش هيكونوا شايفين القصر والطول ده اصلاً في بعض
الواحد كل ما كبر .. كل ما عقل برده
وربنا يجعله عامر على كوووووووول الحبايب
السن و طول حاجات مش بتفرق أن اعرف حالات كتير ناجحة
بني آدم
أنا متشكرة لمرورك عندي .. مدونتي نورت بيك .. وكون ان في حالات ناجحة ومش فارقة معاهم لا طول ولا سن .. شيء مبشر بالخير والحمد لله
وفى حاجة كمان
التوافق الاجتماعى
لازم نعرف يعنى ايه الاول؟؟
يعنى انا فى 4 تجارة
ما ينفعش احب واحدة فى كلية طب؟؟
يعنى اعيد ثانوية عامة واحسن مجموع
ولا ادخل طب خاص
!تفكير عقيم
مشعارف ايه اللى دخل الشهادات فى الثقافة والتوافق الفكرى
سلام عليكم
بصي يا شمس
احنا في مصر
زي ما قال حسن
ان الموضوع نسبي كليا
بس في نقطة
اننا لا يمكن نتجاوز موضوع السن
موضوع السن لو تجاوزناه في الفتره دي
فيستحيل نتجاوزه بعد كده
ازاي؟
لأن كل المشاكل بتطفو على السطح بعد مرحلة ما من النضج
انا في زمن ما لم أكن لأمانع اطلاقا بين ذلك الزواج
ولكني الان
بعد تجربة أعدها أول تجربة مماثلة في حياتي
بل وأول تجربة مريرة من هذا النوع في حياتي
لذلك لا أستطيع أن اعمم
ولكني اسقط على واقعي
معلنا ان ما تقوليه هو من عداد المستحيلات بالنسبة لي
هذا رأيي
لكني لا أنكر ان هناك أزواج وزوجات عاشوا سعداء طوال حياتهم رغم فرق السن
ولكن بالتأكيد .. ليست كل الظروف مواتية
دعواتكم
سلام
Post a Comment