17 March 2007

تاج جالي من شاب فقري

التاج ده جالي من شاب فقري وأنا بشكره على ذكره لمدونتي في إجابته

اسم مدونتك ؟
ضربة شمس

لماذا اخترته ؟ ماذا تقصد به ؟
أنا اخترته لأنه بيمثل أحلى صفحة بحب أقراها واتابعها دايماً في جرنان الدستور وهي صفحة ضربة شمس لصاحبها الأب الروحي لكل الضربشمساويين حقيقي " خالد كساب " وبصراحة كده هي ملهاش غير معنى واحد عييييييييييش محدش واخد منها حاجة واعمل كل اللي انت عاوزه طالما صح حتى لو اللي حواليك قالوا عليك مجنون والبس اللي يعجبك مش اللي يعجب الناس واسمع منير وفيروز وأم كلثوم وعبد الحليم واسمع أجنبي ميهمكش اللي قدامك رأيه أيه فيك واقرأ كتاب في المواصلات زي ما نت عايز برده ولا تاخد في بالك الناس اللي عمالة تبحلق فيك وحب بلدك ونفسك والدنيا حواليك وكل حاجة هتبقى حلوة في عينيك حتى الحزن حاربه ملوش مكان عندنا .. هي حياة واحدة يا هنضيعها في الاكتئاب يا إما نستغل كل لحظة فيها
هو ده المستوى اللي أنا نفسي أوصله في الاستمتاع بالحياة إلى أقصى الحدود بس طبعاً بقابل مشاكل وعراقيل كتييييير في تحقيق الحلم ده لأن غصب عن الواحد هيقابل أحزان ومشاكل مش هيقدر يتغلب عليها بسهولة زي سهولة الكلام ولو قاوح وقال .. لأ هيضطر يكركب جوه نفسه ويرسم وش تاني براه والنتيجة الطبيعية .. الاختناق والاكتئاب عشان كده بحاول أوصل لحل وسط .. عشان أقدر أعيش في الدنيا دي

هل فكرت في إغلاق المدونة ؟ والسبب ؟
ساعات كتير كنت بفكر في كده عشان مكنتش بلاقي حاجة جديدة اكتبها وتكون في نفس الوقت تهم الجميع مع ان التدوين أساس فكرته انك تكتب اللي انت بتفكر فيه شخصياً أو اللي ييجي على بالك بس أنا لما كنت بفكر في كتابة حاجات شخصية كنت بخاف ان اللي يقرأ يعرف عني حاجة أو يستنتج شخصيتي .. مش عارفة ليه دايماً بخاف حد يعرفني



صورتك في المدونة ؟ رمزيتها ؟
أنا حاطة صورة الممثلة " أنجلينا جولي " لأني بحب تمثيليها قوي .. بتحسسني بإنها جامدة جداً وتقدر تعمل أي حاجة وفي نفس الوقت محتفظة بأنوثتها والصورة ذات نفسها عجباني لأني ساعات كتير بحس اني مكسوفة كده

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
أي حاجة أحس انها هتفيد الناس اللي بتقرأ أو بتعبر عن حاجات بفكر فيها وبكده ممكن أكتب في أي مجال

لماذا تدون أصلاً ؟
قبل ما ادون أصلاً قريت مدونات كتير وعجبني اوي حكاية ان كل واحد له مساحة خاصة بيه يكتب فيها بحرية كل اللي هو عايزه من غير ما حد يكون رقيب عليه غير نفسه ومن غير ما حد يقول له هتكتب امتى او عن ايه .. الحرية .. الحرية .. الحرية
وبعدين اتفاجئت لما لقيتهم بيقبضوا على المدونين بسبب كتاباتهم قلت حتى الحرية هنا اتسلبت وراحت وخفت قلت مش هكتب وبعدين رجعت في كلامي وقلت هروبي ده مش من المذهب الضربشمساوي في شيء .. مادام حابة اني أكتب في مدونتي هنا يبقى هكتب اللي أنا عايزاه وهدافع عن حقي ده وحريتي دي حتى آخر نبضة في قلبي وآخرقطرة في دمي

أحلى جملة قيلت في وصف مدونتك ؟
أقل كلمة حلوة بسيطة بعتبرها أجمل جملة يعني كل اللي قالولي مدونتك جميلة بعتبرها أحلى جملة اتقالتلي عن مدونتي

أهمية التعليقات بالنسبة لك ؟
بحس انها المية اللي بتروي العطشان يعني مثلاً لما بكون بعرض حاجة محتارة فيها أو عايزة حد يفكر معاي بلاقي آراء كتير بتساعدني وخصوصاً اني خيالية اوي .. مقصدش خيالية بمعنى رومانسية .. لأ أقصد اني مخي مليان تساؤلات وحيرة وبيقعد يفكر في حاجات غريبة وكتيرة فببقى واثقة اني هلاقي آراء كويسة تفيدني

أحلى بوست كتبته ..ضع اللينك ..ثم اذكر لماذا ؟
البوست ده بحبه جداً لأني نفسي أي حد حبيته (يدخل فيه أي نوع من أنواع الحب) وأثر في وفي حياتي وشخصيتي تأثير إيجابي يقراه علشان يعرف قد ايه هو أثر في حياتي وكمان عشان المعاني اللي فيه جميلة أوي

أفضل مدونة قرأتها ..يمكن اختيار عدة مدونات ؟
أنا قريت مدونات كتير بس في مدونات حبيتها قوي وحسيت ان أصحابها قريبين مني
برنسس أميرة البلطجية
و كوكو الكميل
ولمياء وأميرة وشيماء ونضال
وشاب فقري ومودي وبني آدم والأباصيري
وشيكو وموني وشادي وإبراهيم
ولو حسن محمود عنده مدونة كنت هقول عليها

واللينكات بتاعتهم كلها عندي في أصووووول

أفضل بوست قرأته ..يمكن اختيار اكتر من لينك ؟


هل خسرت صديق بسبب كتابة هنا؟
لأ خالص بالعكس أنا كل يوم بكتسب صديق جديد وبعتز بالصداقة دي جداً ولا يمكن هخسر صداقة حد بإذن الله

حد قل ادبه فى التعليق ..ايه رد فعلك ؟
محصلش يا باشا ولو حصل بعد الشر بعد الشر يعني هرد عليه على الملأ برده عشان الناس تعرفه

أسوأ مدونة ..الإجابة إجبارية ..يمكن اختيار عدة مدونات ..هما كتير اصلا؟
في مدونات صادفتها لقيتهم كاتبين شتايم سافرة وبذيئة وأبيحة بعتبرها هي دي أسوأ مدونات

أسوأ بوست ؟
اللي كتبه أسوأ مدون في أسوأ مدونة

أسوأ مدون ..مهو هتجاوب هتجاوب ؟
طبيعي يعني هم أصحاب أسوأ مدونات مش عايزة فقاقة يعني
وبالنسبة لتمرير التاج أحب أترك الأمر ده لحرية اختيار من يريد

22 comments:

شادي فايد said...

كل تاج وانت بخير

:))

هو انا اسمي مش المفروض في اسوء مدونة

:)
:))
:)))

Mony The Angel said...

:)
nice answers ya shams
ana galy al tag da w magawebtsh 3aleeh :)))))))
ebty daiman mabterdeesh tgeeby seret nafsek aw enty meen
al awal makontsh bahtam awe
bas now hamoot wa3raf enty meen w esmek eh :D

Mony The Angel said...

eh da :/
ana gaya hna abl shady wallahy :/
ana awel comment maleesh da3wa :/

koukawy said...

ميرسي يا شموسه ربنا يخليكي
كوكو مبسوط خالص

مش فاهم حاجة said...

شمس
اجاباتك جميلة اوى
وطلعت لنا الشمس من
جوة
وطلعت من جوة جميلة اوى اوى
وخايف اقول اجمل من برة احسن تزعلى

واقبلينى ضيف فى المدونة

أميرة البلطجية said...

ياخليكي ليا يا شموسة..والله رافعة معنوياتي
وربنا عالم القلوب عند بعضيها والله..انتي من اطيب الناس اللي عرفتهم في حياتي من غير ما اشوفك ..بس شفتك بقلبي حقيقي
ربنا يسعد اوقاتك واستمر في البحث عن ذاتك
:)

حسن محمود said...

الله يخليكى ويبارك فيكى ياشمس ياشموسه

حقيقى أخجلتم تواضعنا
وبعدين انتى وكوكو الكميل تفتكرونى كده كتير قوى
متشكر جدا من هنا لحد ما الست فيروز مابتقول
شايف السما شو بعيد
بعد السما بشكركم
مش عندى مدونة وللأسف مش بفكر أعمل واحده
الحمد لله المدونين الموجوديين كفايه قوى ومغطيين كل المواضيع والاتجاهات
وحتى اذا فكرت كنت هاخليها مدونة علمية عن الاتصالات بس انتى عارفه بقى ان العلم لايكيل الا بالبتنجان
:)
وأكيد طبعا اذا عملت مدونه هأقول ليكم ها أخبيها ليه بس.
لا والله حقيقى الست أميرة البلطجية -اسم على غير مسمى المفروض أميرة المشاعر والاحاسيس- وكوكو الكميل بالعصفور النونو الكمنونو بتاعه والست فريدة بحكايتها الفريدة
والست سمباتيك مخليين الواحد عايش جو غريب وجميل وكله مشاعر وأحاسيس
كفاية بس صدقهم وتلقائيتهم
حقيقى انا مش عارف الناس دى مش بتكتب فى الجرايد والمجلات ليه؟
متأكد تمام التأكد ان الثقافه فى البلد هاتزدهر بالناس دى
بدل شلة الأفاقين والمنافقين اللى بيكتبوا فى الجرايد
يلا خير
أشكرك مره تانيه لتذكرك ليه
واجابتك على الاسئلة كويسه بس مش عايز أقولك ماتقريش جرايد علشان صحتك
أصل الاخبار كلها بقت وحشه للأسف
بس برضه مش بحب اليأس
لازم يكون فى أمل علشان نعرف نعيش
ومش عارف ليه خايفه صحيح حد يعرفك؟
على كل حال مش مهم
خليكى براحتك علشان تكتبى بطلاقة وبحرية طالما ده بيريحك

ودمتى بكل خير
سلام

shams said...

شادي
وانت دايماً بخير يا شادي
انت ليه بتقول على مدونتك وحشة بالعكس دي تلقائية جداً وبتعبر عن اللي جواك ببساطة جميلة
--------------------------
mony
thnx mony .. u can answer the tag or not , it's up 2 u
i really feel more comfortable when i cover for me .. i write more freely this way , but believe me when i feel it's the right time for me to recover my self i will publish it here . u no this is my home and u all are invited
جايز على ماكتبت تعليقك كان شادي كتب تعليقه فاتنشر هو الأول .. أنا مليش دعوة بموضوع النشر ده لأنه بيتم في ساعتها بس مهما كان تعليقك مهم حتى لو تاني واحد
-------------------------
كوكو الكميل
انا فرحانة عشان كوكو مبسوط
--------------------------
مش فاهم حاجة
انت ضيف مرحب بيه دائماً يا مش فاهم وشكراً على الكلام الحلو ده .. شكلي هحطه في إجابة أحلى جملة اتقالت على مدونتك
-------------------------
برنسس
على ايه بس يا برنسس ده انا مجيش حاجة جنبك .. والله انا بحبك في الله انا كمان ومعجبة بيك جداً وربنا يوفقك ويسعدك دايماً يارب
---------------------------
حسن
انت تستاهل كل خير يا حسن
بس حلوة العلم في البتنجان دي ولو عملت مدونة أكيد هتبقى حلوة لأنه نفس الشخص اللي بيكتب تعليقات هو نفس الشخص اللي هيكتب بوستات
وبعدين مالها الجرايد يعني ده حتى في عندنا شوية جرايد ترد الروح وتشفي المرضان .. ولا أقولك لا يا عم صحتي بالدنيا وبعدين ميرضوش يعالجوني على نفقتهم
بس أنا بجد برتاح كده لما محدش يعرفني مش عارفة ليه خايفة
دمت دائماً بخير وسلام

الأباصيرى said...

بقى مدونتى من أفضل المدونات اللى قريتيها
ربنا يخليكى يارافعة معنوياتى

بجد خليتينى فرحان أوى بالكلمة دى
وكهدية ليكى قررت ابعتلك صورة مقاس كبير للشاب اللذيذ اللى عندى فى البلوج عشان تحطيها فوق السرير وأول لما تصحى من النوم تتفائلى بيها

وبعدين حرية تدوين أية اللى بتدورى عليها
مصر فى عهد جنابة فى قائمة أسوا الدول فى قمع الحريات

نفسى افهم مين اللى قال أننا فى عصر الحرية والديمقراطية
أحنا فى عهد الكوسة والمهلبية يا أسطوات

محمد ياسر said...

ردودك حلوة
بس صفحة ضربة شمس فى الدستور مبقتش حلوة زى الدستور نفسها اللى مبقتش زى زمان برضه

تحياتى

إبراهيم said...

هااااااااااي يا شموسة

ردودك تحفة يا بنت ضحكتيني في حاجات كتير

كمان اول مرة آخد بالي مش شوية حاجات كتير في المدونة موتتني من الضحك.. زي لينك التعليقات (اللي صبحوا) ولينك التيم بتاع البوست (كانت حوالي)دمك خفيف يا بنت الإيه

شكراً لأني نلت الحظوة وكانت مدونتي من المدونات اللي بتعجبك.. انا لو جبت ملئ الأرض ذهباً مقابل الكلام ده مش هوفي.. بس برده ارجع واقول اني كل شوية اقرا ردودك لأنها طالعة من قلبك قوي

انا متفق معاكي في أفضل بوستس ليكي ولأميرة وللميا بجد التلاتة
أولا بوستك بيمس فيه مشكلة دايماً بدور فيها.. هل توجد صداقة بين الرجل والمرأة؟ هل توجد صداقة حقيقية؟ مش عارف أنا مقتنع ان الصداقة موجودة بس مش دايمة او مش مستقرة

اما بوستس لميا وأميرة أحلى حاجة فيهم التلقائية هما عباقرة فعلاً

طريقة اجابتك على التاج تخليني افكر ابعتلك تاج قريب

:)
سلام

AbdElRaHmaN said...

http://al-ghareeb.blogspot.com/2007/03/blog-post_1866.html

-------------
لنضع من هنا التصاميم التي نعبر بها عن رفضنا للتعديلات الدستورية
شاركونا

shiko said...

شموسه
ردك على التاج فى منتهى الجمال رد رقيق ومنور زيك

ميرسى على اعتبار صديقه ليك واتمنى دايما ربنا يديم المعروف بينا

تحياتى

moodysalihamidzic said...

ربنا يسعدك يارب
:)

shabfa2re said...

شكراً يا شمس انك جاوبتى ع التاج
وبجد مدونتك جامدة اوىىى
لانك بتكتبى بتلقائية جميلة
و جو اون يا معلمة
D:

yousef said...

تابعى ومستنيين كل ما هو جديد
regards

shams said...

النت لسه واصل دلوقت حالاً .. يارب يستنى شوية على ما أرد عليكو

shams said...

أباصيري
أيوة يا أباصيري مدونتك جميلة .. ده كفاية الفضايح اللي لمت عليك الدنيا وبعدين أول هدية تبعتهالي تكون صورة الواد الفزيع المرعب اللي عندك في البلوج .. ماشي متشكرة خالص

آه كنت بدور على الحرية .. وكنت مفكراها موجودة هنا عالنت .. طلع نأبي على شونة .. يعني ايه الكلمة دي صحيح .. ما علينا المهم تفهم المعنى

وصباح المهلبية يا اسطى
---------------------------------
محمد
شكراً يا محمد ويارب صفحة ضربة شمس والدستور نفسها تبقى أحسن وأحسن علطول
---------------------------------
إبراهيم
هاي يو باك يا ابراهيم
تصدق مكنتش فاكره حد هياخد باله من تسمية اللينكات بتاعتي .. شكراً يا ابرهيم ومدونتك حقيقي حلوة وموضوعاتك وأسلوبك في الكلام بيعجبني

والحمد لله ان البوستات الثلاثة عجبوك .. فعلاً الصداقة بين الرجل والمرأة موضوع شائك ولازم له وقفة لأن دلوقت غصب عن الواحد بيتعامل مع الاتنين وأكيد هيلاقي فيهم ناس كويسة تستاهل الصداقة وناس لأ وساعتها بقى مش هتفرق رجل من امرأة بس لازم كل واحد يكون عارف هو بيتصرف ازاي ورجليه واقفة فين
أما لميا وبرنسس فهم فعلاً عباقرة
وشكلك كده ناوي تورطني في تاج .. أنا اللي جبت ده كله لنفسي
-------------------------------
عبد الرحمن
شكراً على الصور يا عبد الرحمن .. جت في وقتها بالضبط لأني كنت بدور على صور تدل على رفضي لتعديلات الدستور ولقيتهم عندك .. شكراً تاني
--------------------------------
شيكو
ربنا يخليك يا رب يا شيكو .. أنا فعلاً باعتبرك صديقة لي وربنا يديم المعروف دايماً إن شاء الله
----------------------------------
مودي
جزاك الله خيراً على دعوتك الحلوة دي وأنا من ناحيتي بقول آآآآآمين وربنا يسعدك انت كمان يارب .. قول آمين بقى
--------------------------------
شاب فقري
أي خدمة يا معلم .. بس انت ابعت تاج ولا يهمك
--------------------------------
يوسف
إن شاء الله يا يوسف وشكراً على مرورك ويارب ألاقي حاجة جديدة وحلوة علطول وتعجبك

بنى أدم مع وقف التنفيذ said...

شكر .. بجد بحس أنى أعرفك .. و بحس بكلامك اوي
شكر أوي

sosa said...

السلام عليكم ورحمة الله وبركاته
انا باحثة واقوم ببحث عن المدونات وحرية الراى
واتمنى تفاعلكم معى من اجل الوصول الى بعض القواعد والقوانين التى تساعد المدونين على نشر ارائهم بكل حرية
وبقيود دينية اخلاقية تمهد وتنير وصول الكتابات الحرة الجيده مباشرة الى المسئولين والى قلوب الناس
اتمنى مساعدتى فى ملأ استبيان به بعض الاسئلة الخفيفة
وانتظر ردكم بالموافقة على معاونتى على المدونة الخاصة بى
http://crazy-sosa.blogspot.com/
او على الايميل
sosa_444@yahoo.com
ارجو تفاعلكم والاهتمام بالامر لجديته واهميته الشديدة
سارة الاسكافى

shams said...

بني آدم
الشكر لله يا تهامي أنا اللي متشكرة جداً
-----------------------------
sosa
أنا على أتم الاستعداد للتعاون معك يا سارة وهجيلك المدونة أساعدك

Anonymous said...

ك جديد ، وأنا دائما البحث على الانترنت عن المواد التي يمكن أن تساعدني. شكرا لكم نجاح باهر! شكرا لك! أردت دائما أن أكتب شيئا في موقعي من هذا القبيل. يمكن لي أن أعتبر جزءا من مشاركتك لبلدي بلوق؟