ينفع في يوم تغير اختياراتك علشان شخص معين ؟
يعني أتذكر مثلاً في يوم كنت بشتري طرحة وكان أخوي معاي وكان في طرحتين من نفس الدرجة اللونية اللي أنا عايزاها ومن جواي كنت اخترت خلاص واحدة فيهم بس لما خدت رأي أخوي اختار التانية .. تفتكروا زعلت .. أبداً .. اشترتها علطول وكل ما آجي ألبسها أبقى فرحانة وأقول دا أخوي اللي اخترهالي بغض النظر بقى عن إنها عجباني أو مش عجباني .
تفتكر لو أنا مكنتش بحب أخوي أو أي شخص كان مكانه ساعتها كان ممكن أقبل اختياره ؟ كان ممكن أغير اختياراتي عشانه ؟
يعني هل ممكن حبنا لشخص معين يؤثر على اختياراتنا لدرجة تغييرها ؟ طيب ولو ده صحيح .. امتى أقول stop للتأثير ده ؟ امتى أقدر أقول من جواي للشخص اللي بيأثر في You can't go any further ؟
امتى أسيطر على حبي عشان ميلغيش شخصيتي ووحده وحده هيلغي وجودي تماماً .. الشيء اللي ممكن في حد ذاته يضايق الشخص اللي قدامي ويخليه يقول - إيه اللي ملهاش رأي ولا شخصية دي !!! - وفي نفس الوقت الموضوع ميتحولش لعناد ومضادة في الرأي على طول الخط لمجرد انه محدش يسيطر علي ؟
ولو رفضت في يوم من الأيام اختيار الشخص اللي أنا بحبه عشان أنا مش موافقة عليه يبقى هل ده معناه إن مش بحبه ؟
19 comments:
بصي يا سيتي موضوع انك تغيري رأيك عشان اللي بتحبيه لازم يبقي محكوم برضه
عشان ما يحصلش اللي انتي قولتي عليه ان ما يبقاش عندك شخصيه و تتلغي انتي خالص
بس ده ما يمنعش انك تشوفي بعنيه ساعات لما تبصي بعنين اللي انتي بتحبيه اين كان هو مين تحسي ان كامه حقيقي صح بس الموضوع ده لازم يتحقق من الطرفين
انا عارفه ان صعب الراجل يتقبل حاجه زي دي بس لو حصل كده يبقي تبقي علاقه فيها توازن اوي
هو ينفع حد يغير اختياراته عشان اللى بيحبه ؟؟
و الله انا بعتقد انه ينفع و ينفع جداااااا ,,بالذات فى مصر و بنعمل كده و احنا راضين و سعيدين جدا
حتى شوفى كام واحد بنى اختيارته الدراسيه - بس - مش هقول حاجه تانيه - على اساس رغبته فى تحقيق السعاده و الرضا لاهله .. هو انا مش هقول كده غلط و اللى بيتصرف كده مبيبقاش عنده شخصيه ..لانه عنده هدف حلو .. بس فى سبيل الهدف ده ممكن يخسر رضاه عن ذاته و عن حياته ..فعلى الاقل لازم نكون مقتنعين باللى بنعمله من أجل عيون الاخرين .. يعنى اتنين فى واحد كده ( بضحك طبعا) مش عاوزة انسى اقولك ان دى اول زياره لمدونتك و فعلا بسيطه و حلوة ..بالتوفيق دايما باذن الله
يتوقف يافندم على مين اللى انتى بتغيره علشانه
يعنى لو مامتك او باباكى طبعا تغيرى وانتى متطمنه خالص
اخوكى أقل شوية
أصحابك على حسب انتى شايفاهم كويسين ولا لا
وياستى مافيش الغاء للشخصية ولا حاجه
التغيير ده مش فى حاجات جوهرية
علشان كده مختلف مع بنت مسلمه
التعليم حاجه جوهرية فماينفعش انى امشى على كلام الأهل بس مش معنى كده انى اهمل رأيهم تماما لازم يتحط فى الاعتبار
شوفى
تحطى لكل واحد وزن يعنى باباكى ومامتك تديهم خمس او ست اصوات
اخوكى 3 اصوات قرايبك صوتين واصحابك صوت وتشوفى النتيجه
واذا ماشية مع رأيك ولا لا
بس طبعا مش بنكر ان الولد اذا مشى على اللى أهله عايزينه يبقى ضحى وربنا هايوفقه علشان هو سمع كلام أهله
على كل حال الواحد مش بيبقى عارف الخير فين
ومعلش ياكوكو الكميل مختلف معاكى برضه
ليه ياكوكو بس ؟
فى رجاله والله بتتقبل التغيير
وخصوصا فى الازواق واللبس علشان الستات بيبقى حس الموضه واللبس والزوق عندهم أعلى من الراجل
مش كل الرجاله يعنى ومش كل الستات برضه
اما بالنسبه للى هاتحبيه بقى
هو ياستى هايحبك بكل ميزاتك وعيوبك
هايحبك بعنادك او هايحبك باستسلامك
ده رأيى والله أعلم
وياريت تشوفى رأى الست أميرة البلطجه
البنت دى بتتكلم كويس وممكن تفيدك فى الموضوع ده
ودمتى بكل خير
سلام
انا كنت بقرأ التعليقات مرة تانيه و لاحظت تعليق حسن محمود .. و متفقه مع حضرتك ان التعليم حاجه جوهريه متتغيرش عشان حد .. لكن فى فرق بين المفروض و اللى بيحصل بالفعل .. فعشان كده قلت ..ان تغير الاختيارات تبعا للعواطف شئ وارد جدا .. و حددت كده فى مصر لان ملاحظ ان عندنا خلط بين المشاعر و الاختيارات .. اما فى اماكن تانيه سهل جدا تستقل برأيك و تنفذه بدون اى تأثير على مشاعر الاخرين ..بس كده
بسم الله الرحمن الرحيم
الاجابة الصحيحة
لا
عارفه يا شموسه البوست ده صعب جدا لانه مش ليه اجابه
انا من جوايا مقتنعه ان الواحد المفروض ما يتغيرش عشان حد
بس الظروف بتفرض عليكى انك تتنزلى عن حجات انتى عيزاها عشان حد انتى بتحبيه
انا عن نفسى بقيت اتنازل عن كل اللى انا عيزاه عشان بابا وماما انا بحبهم اوى واستحاله اعمل حاجه تزعلهم حتى الحاجه اللى هما عيزنها منى هاتقضى على يعنى جايه فى صميم قنعاتى
النهايه اختيارتنا بتتغير عشان اللى بنحبهم
امتى بقى وازاى مش عارفه
ولو رفضت في يوم من الأيام اختيار الشخص اللي أنا بحبه عشان أنا مش موافقة عليه يبقى هل ده معناه إن مش بحبه
لاطبعا . دى حرية أختيار
حبيبي شموسة
موضوع تحفة كالعادة
وسؤال وجيه اوي
في قناعتي (اللي مش شرط اني بعرف انفذها دايما) الموضوع مش حيظبط غير لما تبقي واثقة في نفسك وانسانة واضحة الحدود..فمتبقيش تايهة وكلمة تجيبك وكلمة توديكي وكمان متبقيش زي الراجل اللي كان مع محمد صبحي في المسرحية وكل شوية يقول (متأدرررششششش) وترفضي للفرض
الانسان المتزن عارف امتي يتازل عن اختيارته عشان اللي بيحبه وامتي يقف موقف حاسم لنفسه
وربنا يسترها
احبك في الله بجد
كوكاويه
فعلاً لازم أحس ان كلام الشخص اللي بحبه صح وإلا موافقش عليه وساعات بعض الرجالة بتلاقي صعوبة ان هي اللي تتنازل علشان الست اللي قدامهم ، بيتهيألهم ان ده هينتقص من كرامتهم أو إن كده الست هي اللي هتمشي كلامها في حين ان الموضوع المفروض يبقى أبسط من كده بكتير علشان العلاقة يبقى فيها توازن زي ما قلتي بالضبط .. شكراً يا كوكو
---------------------------------
بنت مسلمة
أول حاجة مدونتي نورت بمرورك وتعليقك .. تاني حاجة أنا متفقة معاك ان احنا هنا بنعمل كده ونغير اختياراتنا وعلى سبيل المثال زي موضوع الدراسة ده بس بجد لا بنبقى مبسوطين ولا راضيين ولا سعيدين وبالتالي زي ما قلتي بيخسر رضاه عن ذاته وعن حياته ولو انت مش مقتنعة باللي بتعمليه عمرك ما هتحبيه حتى لو كان صادر من شخص عزيز عليك
-------------------------------
حسن
حسن كلامك أكيد صح يعني لو هغير اختياراتي علشان بابا أو ماما يبقى أغيرها وعيوني مغمضة لكن هنا بيت القصيد .. هم ليهم وجهة نظر وأنا لي وجهة نظر ومادام حصل اختلاف يبقى في حلقة مفقودة في النص هي اللي بتسبب الألم عند تنفيذ اختياراتهم ضد اختياراتي وطبعاً لازم أقنع نفسي انهم عارفين أكتر مني وعايزين مصلحتي لكن أنا فين خصوصاً لو اللي أنا عايزاه لا هو عيب ولا هو حرام ولا هو حتى غلط .. بس أرجع وأقول فعلاً الواحد مش عارف الخير فين
وبصراحة يا حسن أنا كنت فعلاً مستنية رأي برنسس لأنه مهم عندي أوي ولأن آرائها دايماً سديدة والحمد لله ردت أهيه
----------------------------
بنت مسلمة
عندك حق طبعاً من غير كلام ان هنا في مصر العواطف غالبة على معظم التفكير والأحكام لكن في أماكن تانية فعلاً بيقدروا يستقلوا برأيهم من غير ما حد يزعل منهم أو هم يزعلوا أو حتى حد يغصب عليهم اختيار بعينه .. بس لو في توازن في العملية أكيد كانت الأمور هتبقى أحسن
--------------------------------
شادي
هو انت في امتحان يا شادي وعموماً هديك عشرة على عشرة .. أنا بس كنت بطرح التساؤلات اللي بتيجي في بالي وفي تفكيري وبحاول حد يشاركني فيها والا هتجن من كتر التفكير
----------------------------------
دعــاء
أهي المشكلة بقى في انك لما تنفذي اللي بابا وماما عايزينه علشان ميزعلوش وتكون الحاجة دي هتقضي عليك وفي صميم قناعاتك .. طب امتى هبقى أنا وأنفذ اللي عايزاه بحل وسط يرضي جميع الأطراف ؟؟؟؟؟؟؟؟؟؟؟
--------------------------------
بني آدم
هي فعلاً حرية اختيار .. بس هل هو هيفهم كده ؟
-------------------------------
برنسس
هيييه برنسس جااات .. الله يخليك يا برنسس ده بس من ذوقك يا أوختشي ..
"الانسان المتزن عارف امتي يتازل عن اختيارته عشان اللي بيحبه وامتي يقف موقف حاسم لنفسه"
أشكرك يا برنسس بجد
وأحبك الله الذي أحببتني فيه وأنا كمان بحبك في الله أوي
طبعا انك تغيري اختياراتك عشان اللي بتحبيه ده مش وحش اطلاقا
بل بالعكس
ده هيزود بينكم الحب
بس المشكلة ان اللي بتحبيه ده ميكونش يستاهل
وللاسف في كتير كده
بس أكيد مش زي الحب بينك وبين اخوكي
والاختيارات مش بس بتكون كده
ممكن الاختيارات تكون اكبر كتير
الاختيارات دي هي اللي بتحدد فعلا مدى الفردية ومدى الحب في اتخاذ القرارات النهائية
لكن في نفس الوقت ما ينفعش نسيب للي بنحبه كامل الحرية انه يتحكم في حياتنا لمجرد انه عارف انه برأيه بيسيطر علينا
لكن في مرحلة معينه من الحب .. فعلا بتختفي الحواجز
لأن ده بيكون نابع من الثقة المطلقه
انه بيقدم رأيه او اختياره لقناعته المطلقه ان رأيه هو الاصلح
ووقت لما ده يحصل
يبقى مفيش خوف ابدا
بوست جميله
سلام
عبد الرحمن
هي المشكلة فعلاً انه يكون ميستاهلش بس لازم أكون أنا فاهماه كويس وعارفاه علشان متخدعش بس دايماً اللي بيحب مش بيشوف اللي قدامه كويس
وربنا يرزقنا كلنا بالحب والثقة وبالتالي يبقى مفيش خوف
شكراً يا عبد الرحمن
الى بنت مسلمة
فعلا معاكى حق
فى فرق بين المفروض واللى بيحصل على الواقع
الى شمس
ياشمس أطلعى الجو بقاله يومين برد
مش كده الواحد تلج
شوفى ياستى
الحل فى: التوازن
دى كلمة كويسه اتقالت فى التعليقات اللى عندك
وأكيد الحياه مش أبيض واسود بس, فى وسط ممكن اذا ماحصلش اتفاق على موضوع توصله لحل وسط بينكم
كنت عايز احكى ليكى قصة حقيقية حصلت لأخويا
لما جاه معاد التنسيق بتاعه هو كان هايموت على طب
وعايز طب وحاطط كل أهدافه على طب
بابا قاله يابنى الصيدلة أحسن
ماما قالت طب اسنان
طبعا هو كتب طب ثم صيدلة ثم طب اسنان
على نص درجه بس ماجتش ليه الطب
وجت صيدلة
شفتى تصاريف الحياه
هو زعل قوى وبابا فرح وقعد يشرح ليه يابنى احنا مالناش حد دكتور وطالب الطب لازم يعرف دكاتره
وكلية نفسها طويل قوى قوى قوى
الصيدلة نفسها طويل انما مبلوعه
المهم طبعا على مضض دخل صيدلة
بعد لما أتخرج ولقى زمايله فى الطب حالهم لا يسر عدو ولا حبيب
قال الحمد لله انى دخلت صيدلة
سبحاااااااان الله
ماهو اللى كان هايموت على الطب
علشان كده قولت ليكى ماحدش بيعرف الخير
فين
وطبعا ممكن برضه اذا كان دخل طب كان بقى كويس وممكن لا
ويمكن يبان ليكى حاجه انما وشها التانى مش باين
على كل حال الحياه مش كلها تضاد جامد قوى
يعنى الحلول الوسط ليها دور كبير
يبقى علشان نتغلب على الفجوه اللى بين الاراء نعمل حوار متوازن وكل واحد يقول رأيه وليه شايف انه صح
ممكن نكون فعلا مفتقدين حالة الحوار
ودمتى بخير
سلام
افتكر ان الانسان ممكن يتغير عشان خاطر شخص بيحبه
والاختيار جزء من كيان الانسان ده يعنى اكيد اختيارتنا ممكن تتغير عشان خاطر شخص بنحبه
انا اختار اذا انا حر
مستنى تشرفينى فى مدونتى المتواضعه
شمس وحسن
انا لسه والله دلوقتي بسسسس لامحه اسمي في التعليقات بتاعتكوا
جزاكم الله كل خير..انا يسعدني ان ده رأيكوا فيا والشعور متبادل
ربنا يباركلكم
حسن
أنا موجودة بس ورا السحاب
اخواتي محتلين الجهاز ومسيطرين عليه سيطرة تامة
بس موضوع التوازن ده حقيقي واللي المفروض يحصل
وعلى رأيك الخيرة فيما اختاره الله
وانت بقى مش هتقولنا على مدونتك ؟
-----------------------
يوسف
شكراً على مرورك يا يوسف وان شاء الله هاجي عندك
" أنا أختار إذاً أنا حر "
جملة رائعة بحق
-----------------------
برنسس
وجزاك مثله يا برنسس .. احنا اللي دايماً أسعد بيك .. جراتسي سنيورينا .. حبة ايطالي بقى
فيه اشياء لا يمكن التنازل عنها ارضاء للطرف الاخر لان فى التنازل عنهاامتهان للكرامه بمعنى انه لابد ان يكون هناك حدود فاصله بين الحب وضعف الاراده
وهذا الحد الفاصل صاحب الشأن وحده هو ممكن من يحدده
لكن مثلا لا يمكن ان تطاوعيه فى معصيه الخالق او فعل شئ مشين مخل وهكذا
موضوع جميل يا شموسه
احييكى عليه
bosy ya shamoosa
hwa akeed lama bt7eby had btetnazly 3an hagat kteer 3shan 7obbek leeh
aw 3shan 7'atro zay mabne3el
law had mn so7abek aw e7'watek 3aiez menek haga wenty msh radia w allek 3shan 7'atry aw law bet7ebeeny
sa3etha bte3mely alhaga de
bas da tool malhaga de fe maqdoorek enek te3meleeha
laken fe asasiaat law meen we2ef yetnatat odamek msh hat3'iary ra2ek feeha :D
that's the point
welmafrood eltaraf altany kaman ye2adar en da msh 3shanek msh bet7ebeeh
no da 3shanek mate2dareesh teegy feeh 3ala nafsek :)
ba7eb awe al postaat bta3tek ally btetra7 fekra aw mas2ala kda w totloby menena nfakar feeha m3aaky :)))
والله انا احترمتك
علشان البوست ده
فعلا
من يحب حد
يحترم رأيه
انتى جيتى ع الجرح يا شموسة
هههه
بصي بقى
من واقع تجربتي ودماغى الناشفة
فأنا صعب اوى اقتنع برأي او اغير اختياراتي علشان شخص معين
بس ده طبعا بالنسبة للاختيارات المصيرية أو اللى تمس شخصيتى
لكني اكتشفت ان الحوار الهادىء والمبني على احترام الرأي هو اللى ممكن يخليني اغير رأيي او اختياري ويقنعني
اما بالنسبة لأني اغيره عشان حد بحبه
فهو ممكن اوي(أضحى يعنى) والتضحية طبعا مش هتبقى ف كل شىء يعنى مش توصل لالغاء الشخصية
وبعدين يعنى ان كان حبيبك عسل
:D
Post a Comment