يوماتي بدوّن

كنت حاسة أول ما عملت المدونة اني لما أعوز أكتب حاجة هكتبها بغض النظر عن مين اللي هيقراها أو هيعرفها وبعدين لما دخلت المدونات التانية ولقيتهم تقريباً بيكتبوا كل يوم أو كل أسبوع حسيت زي ما يكون أنا في سباق ولازم أكتب جديد .. حسيت بقى انها معادتش مدونتي .. لأ .. بقت زي مجلة ولازم أطلع عدد يومي أو عدد أسبوعي .. وبتيجي فترات مبلاقيش فيها لا اللي أكلمه ولا اللي أكتبه .. بتبقى فرحة كبيرة وأنا بترجم إحساساتي وخواطري وأي حاجة بتدور في دماغي للورقة والقلم ودلوقت للمدونة ولوحة المفاتيح

فكرت اني ممكن طالما مفيش بوستات جديدة أقضيها فسح عند أصحابي المدونين يعني هبقى مدوِّنة بلا مدوَّنة .. حلوة دي

وبعد تفكير وتمحيص في حالتي وصلت للمهم ألا وهو إني لقيتني دخلت في عالم المدونات مش عشان هدف محدد عايزة أوصله بالتدوين .. لأ خالص لقيتني دخلته علشان مجرد بس أتعرف على العالم الجديد ده لأنه شدني من كتر ما سمعت وقريت عنه وبعد ما فترة التعارف خلصت عجبتني الحكاية واشتغلت فترة كده ورا بعض .. وبعد كده .. هسسس .. لقيتني بعدت خالص وفين وفين كده على ما بكتب بوست جديد أو أدخل عند حد من أصحابي المدونين .. اضايقت اوي بس فكرت ليه بوستاتي فاترة كده وبتطلع في فترات متباعدة ؟؟؟

وفي الآخر عرفت السبب الحقيقي ورا التباطؤ ده وهو إني معنديش هدف محدد للمدونة ، يعني انا دلوقت مش عارفة بدون ليه وعشان ايه وهستفيد ايه وشكلي كده هرجع تاني للمذكرات اللي كتبتها من سنين .. في نوتة زرقا لون بحور الحنين .. ولما عترت فيها رميتها في المهملات .. وقلت صحيح أما صحيح كلام مخبولين

وعجبي !

دماغه ودماغها وفي الاخر شوية هرش

البوست اللي قبل اللي فات اتكلمت فيه عن اختلاف رد فعل كلاً من البنات والشباب في المواقف المحرجة خاصة مع بعض ودورت شوية كده لعلي أعثر على أي سبب علمي مقنع لقيت انه أصلاً دماغي الذكر والأنثى يختلفان إلى حد ما في البنيان والنشاط وكمان من الناحية التشريحية وجدوا ان أدمغة الإناث أصغر حجماً من أدمغة الذكور ووجدوا اختلافات أخرى بنيوية وكيميائية ووظيفية وقالوا كمان - العلماء طبعاً اللي اكتشفوا الحاجات دي - انه لازم أثناء البحث عن العلاج وأسباب الأمراض ياخدوا الاختلافات دي في الاعتبارعشان علاج الأنثى يختلف عن علاج الذكر وبالتالي يوصلوا لنتائج أفضل إن شاء الله

الكلام ده كوووله جاب لي فكرة تانية هي ملهاش علاقة المرة دي بالإناث والذكور والأمراض والعلاج

له علاقة بإني عمالة افكر في اسباب منطقية وعلمية للحاجات العادية اللي بتحصل حوالينا من غير حتى ما نفكر هي بتحصل ليه بالطريقة دي من شدة طبيعيتها وان ده الشيء الافتراضي اللي بيحصل

رغي كتير وكلام كتير بس صدقوني هوصل للمفيد في السطر الجاي

ليه بقى - ويفضل أسباب علمية - لما الواحد بيحس انه عنده ارتيكاريا في أي حتة في جسمه بيبقى هيموت ويهرش فيها خاصة خاصة لو مش طايلها بيبقى هيتجنننننن بكل ما تحمله الكلمة من معنى

وحاجة كمان ليه أول ما الواحد بيهرش في الحتة اللي مجنناه دي بيهدا علطول ويحس براحة جمييييييييييييييلة

مش عارفة دماغي دي هتوديني لغاية فين