كنت مرة مروحة وراكبة مكروباص داخلي ( الظاهر الحكايات كلها بتيجي من ورا المكروباصات ) المهم عدينا من على قهوة ولقيت قدامها زحمة كتييير ييجوا 15 واحد كده ولا حاجة ويمكن أكتر كمان ، أنا قلت دي أكيد خناقة وبعدين لقيتهم مش ماسكين في بعض ، اتفاجئت بقى انهم كلهم مشدودين للتلفزيون بتاع القهوة .. ببص عالتلفزيون لقيت ماتش مصارعة والناس عمالة تشقلب بعضها ودييييب طراااااااخ طيييييييخ طووووووخ والناس تهيص وفرحانة وكلهم كبار بشنبات ( اه والله ) طبعاً كل ده حصل في دقيقة مسافة ما المكروباص عداهم ، المهم قلت ف عقل بالي : يا خبر بقى الرجالة دول بيتفرجوا عالمصارعة ومشدودينلها كمان كده ، ده له حق الواد اخوي بقى ميبطلش كلام عنهم ... نرجع تاني للمكروباص اللي انا كنت راكباه ، ما هي الحكاية مخلصتش عند كده ... لقيت التلاتة اللي قاعدين قدامي ( السواق + واحد راكب وعلى رجله ابنه + كمان راكب ) شبكو بقى ف موضوع المصارعة من أول ما شافوا اللمة عالقهوة لغاية ما وصلنا لآخر محطة وكانت مسافة لا بأس بها ويتناقشوا جامد .. واحد يقول انا مشفتش احلى من هوجان بيلعب في المصارعة دي والتاني يقوله : لاااااء مفيش أحلى من جون سينا (أنا طبعاً عندي خلفية عن الأسامي دي لأن اخوي كان بيصدعلي دماغي بيهم ربنا يخليهولي ) ده حتى الراجل اللي كان شايل ابنه على رجله سأله : الواد اللي كان بياكل ضرب ده يا ابراهيم وبعدين يقوم تاني اسمه ايه ؟ قام ابراهيم الصغير رد : أندر تيكه بتشديد الكاف وفتحها ( يقصد أندر تيكر يا جماعة متخدوش على كلام الولد لسه صغير برده) وقعدوا يقولوا لبعض مواعيد الماتشات و... و ... و ... إلخ إلخ إلخ
بصراحة أنا مش عارفة هم سابوا للشباب الصغيرين والعيال ايه ؟ ولا تفتكروا ده مزاج وملوش دعوة بالسن ؟؟؟؟؟؟؟؟؟؟؟
بصراحة أنا مش عارفة هم سابوا للشباب الصغيرين والعيال ايه ؟ ولا تفتكروا ده مزاج وملوش دعوة بالسن ؟؟؟؟؟؟؟؟؟؟؟
عارفين ده مييييييين ؟ فينك يا ابراهيم
21 comments:
هاهيهو
ايوة احنا شعب رياضى
عموما هو الاهتمام بالرياضة ايجابي
واهي الناس بتفرج عن نفسها
اظن ان حب الناس للمصارعة و الملاكمة كظاهرة اليومين دول هو نوع من انواع التنفيس عما بداخلهم هما بس ليهم غرض ان مجموعة معينة تقع في ايديهم يعملوا فيها كدة
هو مين ده
مصارع يعني؟؟؟
والله انا شايف ان كل انسان ممكن يكون بيهتم بشيء قد يكون تافه في رأي الاخرين
يعني مثلا كل اصحابي شايفين اهتمامي بالتدوين تافه
:)
shabfa2re ولا حتى الرياضة يابني فالحين فيها
--------------
برنسس الاهتمام بالرياضة ايجابي بالتأكيد بس المصارعة بالذات .. اقدر اقول فيها زيك تمام .. الناس بتفرج عن نفسها;)
---------------
yasser ربنا يستر على المجموعة اللي هتقع فإيديهم لحسن شكلهم كده اتملوا وعلى اهبة الاستعداد للانفجار
----------------
شادي
شكلك ملكش في المصارعة خالص بس بصراحة انت علقت على حاجة مهمة اوي هي ان كل انسان وليه وجهة نظره الخاصة بكل شيء يعني مثلاً انا من وجهة نظري الخاصة ان لعب المصارعة ده وحش وممنوش فايدة بس مش شرط افرض رأيي على أي حد تاني والمفروض اصحابك ميسفهوش رأيك في التدوين .. كل واحد حر
looooooooooooooooooooooool
هما الرجاله بتكبر و تخيب يا بنتي 00
و اهو ان جيتي للحق اهم يدفنوا همهم في اي حاجه و خلاص
انا مع شادي في اللي هو بيقوله 00 بس متوصلش ان الناس توقف حالها و يوقفوا علي القهوه بالشكل ده ما هو زي ايام الماتشات برضو بتبقي مسخره
أيوة يا كوكاية أهم بيدفنوا همهم في حاجة وخلاص بس بجد منظرهم كان غريييييييييب
يا شموسه يتفرجوا على ملاكمه احسن ما يبحلقوا فى بنت الحاج عجرم وماريا وامثالهن
مش كده ولا ايه
وربنا يستر على عبيده ويهديهم
تحياتى
انا ساعات بحس أنى متخلف لما اقعد أتفرج على مصارعة حرة
بس برضة لما اشوف ماتش مصارعة تلاقينى قاعد بتفرج بأنتباة وفاتح بقى على أخرة
مش بقولك بحس بالتخلف
my dear shiko انت عندك حق في الموضوع ده ، ورغم ذلك المصارعة ليها محبيها وبنت الحاج عجرم ليها محبيها برده ..ربنا يستر
--------------------
أباصيري انت بتتفرج على مصارعة يا أباصيري ، خلاص انا هسامح الجماعة دول عشان خاطرك وافتح بقك يا سيدي واتبسط
انا شايف ناس كتير اشارت الى فوائد الاهتمام بالرياضه
بس موضحوش ايه افيد الفرجه ولا الممارسة
مهندس مسلم
الممارسة طبعاً أفيد بس مفيش مانع من الفرجة علشان الواحد يتعلم هيمارس ايه وشكراً لمرورك
أول مره أعلق عندك
غريبه انك معترضه على المصارعه مع ان اسمك ضربة شمس
يعنى بتضربى اهه
ضربة شمس Vs هوك هوجان
;)
ياستى هو انتى فاكره ان اللى بيحصل ده حقيقى؟
ده كله تمثيل فى تمثيل وكله بيبقى متفق مع كله على ازاى هايتضرب وامتى وفين
المهم الجماهير تستمتع وهموا يكسبوا الفلوس وخلاص
على كل حال زمان وانا صغير كنت بحب اتفرج على الحاجات دى
دلوقتى خلاص
سلام
على فكرة
انا اول مرة ادخل هنا
بس عاوز اقول حاجه
العالم كله بيتفرج عل المصارعه
يمكن انا مش من الناس اللى بتتفرج
بس مفهاش حاجه لو انا على قهوة
وفى متش مصارعه شغال
اكيد هيلفت انتباهى
الموضوع بصراحه
واخد اكتر من حجمه
مش لازم
انى 18 ساعه فى اليوم
اتكلم فى السياسه
والادب
والفكر
ولا ايه
متزعليش يا قمر
بس كان لاازم اعلق
وقلنا ننضف بقى
قالو بلا وكسه
والله لتحصل بدال النكسه
ميت نكسه
نجيب سرور
حلوة حكاية المصارعة دى ؟اظاهر بجد اصابتك ضربة شمس من القعدة فى الميكروباص ؟ خللى بالك من نفسك يا شمس؟
فعلا دى ضاهره غريبه جدا
ايه الناس دى بجد حاجه تضايق
ليه يتلموا كده فى الشارع قدام القهوه
ونعمل زحمه فى الشارع والمرور يتعطل
المفروض كل واحد يتفرج فى بيته
او يقعدوا بنظام عشان كل الناس تشوف
(:
مش كده ولا ايه يا شموسه
when will u shine again ya shamosa?
I miss u
حسن ضربة شمس دي معناها ان انا اللي واخدة الضربة في دماغي بس أنا مش معترضة عالمصارعة ولا حاجة انا معترضة على شكل الناس وهي ملمومة عالقهوة كده في وسط الشارع كأن في حاجة مهمة أوي أوي بيتفرجوا عليهم انت لو شفت منظرهم كنت اتخضيت وبعدين بنفسك قلت كنت بتتفرج عالحاجات دي وانت صغير دلوقت خلاص ، اللي كانوا بيتفرجوا بقى رجالة كبار مش شباب حتى مكنتش قلت حاجة .. بس آهو هنعملهم ايه
-------------------
vetrinary
أنا عارفة ان ناس كتييييير بتتفرج عالمصارعة زي ما بتقول بس خلي بالك انا بتكلم على المنظر كانوا ملمومين بطريقة غريبة تشد الانتباه فعلاً أنا في الأول افتكرتهم ملمومين على خناقة لأن شكلهم قدام القهوة كان فعلاً زي شكل لمة الخناقة وعموماً يا سيدي بلاش تتكلم 24 ساعة في الفكر والأدب والسياسة واتفرج عليها تفاريح كده
----------------
الفيلسوف متشكرة يا فيلسوف على تعليقك وحاضر هخلي بالي من نفسي
----------------
دعـــاء كده طبعاً يا دعاء .. انت اللي فاهماني بس هيسمعونا ازاي بقى
----------------
princess
وانت كمان وحشتيني يا برنسس بس مش عارفة انظم وقتي خالص عشان ادخل علطول
مفيش حاجة بتجيبلي شلل أطفال وسل مزمن قد المصارعة
أنا بأعشق رياضات الدفاع عن النفس
الكونغ فو تحسي إنه بيربي ثقافة وروح قبل ما بيربي جسم
الكارتيه بيعودك على احترام اللي قدامك
وكذلك كل الرياضات الـ"نضيفة" التانية
إنما المصارعة بتعلم الغشومية والبلطجة والخسة والندالة و على رأس كل هؤلاء الهيافة
مع احترامي لأي حد بيتابع مصارعة
تعرفى سبب الاهتمام الجماعى الزائد بالمصارعة ايه.
عمرك سألتى نفسك عن العنف المكبوت جوانا
العنف الجسدى والعنف اللفطى وحتى العنف السياسى
احنا شعب من الوحوش لا بل شعب من اكلة الجيف لم نكن اسودا ولا فهودا ولكن كنا ضباعا بل كلابا
ملعون ابو مصر
وملعون ابويا
الغريب ان في ناس عارفه ان دا تمثيل وبيقولوا انها اشتغالات ..
تفتكري ان دول بيحبوا حد يشتغلهم ولا عاوزين يصدقوا حاجه هما متأكدين انها كدب ..
هو اكيد في ميزه في ان الواحد يتفرج علي حد ويعجب بانه قوي جداً وبيبهدل كل الي يقف قصاده .. زي ما يكون ميول عند الناس لحاجه انا مش فاهمها .. واوعوا اسمع حد يقولي رياضه تاني :( ..
اتمني انك تشرفيني ع المصطبه
http://el-essaweat.blogspot.com/
Post a Comment