08 February 2007

أنا اتورطت جااااامد يا جدعاااااان

قال ايه وأنا قاعدة فـ أمان الله بتصفح مدونات اصحابي والتعليقات اللي عندي وعندهم لقيت شاب فقري والأباصيري وشيكو ممررينلي التاج بتاع الأسئلة الشخصية واتورطت أحلى توريطة على أرض مدونتي .. المهم أعمل ايه .. أعمل ايه .. ما هو انا مش عايزة أهرب وفـ نفس الوقت مش عايزة أجاوب قلت أمري لله وأقبل التاج وبعدين أجاوب باللي يطلع ساعتها بس عشان أكون صادقة معاكم أنا لسه مش مستعدة أصرح بشخصيتي الحقيقية فاحتمال تلاقو رخامة في الأجوبة
الأولى بسم الله
إيه اللي هيحصل لإيميلك بعد ما تموت ؟
ببساطة شديدة جداً إيميلي هيموت معاي لأني بعتبره مكاني الخاص اللي ممكن أقعد فيه لوحدي من غير ما حد يعكر علي صفو هدوئي ولا يقتحم علي خلوتي وبالتالي محدش يعرف خصوصياتي
**********************************
إديت الباسوورد لحد قبل كده ؟
لأ ، عمري ما اديته لحد قبل كده ولا هديه لحد بعد كده إلا في حالات خاصة جداً لسه ماوردتش علي
**********************************
لو آه كانت طبيعة علاقتك بيه إيه ؟
لازم يكون حتة مني (مقصدش حرفياً) أقصد نكون أنا وهو واحد في كل حاجة
**********************************
اسمك ؟
بما أن أنا معنديش لسه استعداد أصرح عن نفسي فهكتفي باسم : شمس
**********************************
اسم الدلع المشهور بيه بين أصحابك ؟
السؤال ده تابع للسؤال اللي قبله وبالتالي هيكون اسم الدلع : شموسة
**********************************
عمرك ؟
لسه بادئة الـ 25 من كام شهر
**********************************
البرج ؟
بسم الله الرحمن الرحيم : العقرب ممكن ماتقروهاش بالعربي لو تخض اقروها : سكوربيون أحسن
**********************************
مجال دراستك ؟
الكمبيوتر بس أنا لسه فيه على أول الطريق
**********************************
شخصيتك نوعها إيه ؟
أنا عاملة زي البيضة النية ليها قشرة صلبة وقاسية من بره لكن هشة من جوه
محدش يسألني التشبيه ده جالي ازاي .. أهو جه وخلاص
**********************************
السفر بالنسبة ليك ؟
حاجة نفسي أحققها علطول ولأماكن بعيدة لأني بحس فيه بمتعة جميلة ، بيمثلي فرصة الانتقال من مكان لمكان وبالتالي ترك شيء ما خلفي والاتجاه دائماً للأمام بدون النظر للوراء
**********************************
المود بتاعك ؟
حاسة إني دايماً بمثل يعني لما ببقى مكتئبة برسم الضحكة على وشي ولما ببقى فرحانة برسم الاكتئاب .. مش عارفة ليه
زي ما يكون خايفة ان حد يعرف إيه اللي جواي عشان كده بخبيه
**********************************
وقت فراغك بتعمل فيه إيه ؟
طب ياريت يبقى عندي وقت فراغ ، مكنتش غلبت .. ده أنا نفسي أشحت كام ساعة أعمل فيهم اللي نفسي فيه أصل أنا وراي حاجات كتير لازم أعملها بس للأسف اليوم مبيقضيش لما خلاص بقيت بشد فـ شعري
**********************************
الصفات اللي خدتها من بابا ؟
الصدق وتقريباً كده بعد النظر والنباهة ونفسي آخد منه الشجاعة
**********************************
الصفات اللي خدتها من ماما ؟
إني مبقدرش أشوف حد عايز حاجة وفـ إيدي إني أساعده ومعملهاش ومتهيألي الحنية ونفسي آخد منها الصبر
**********************************
أكتر 6 حاجات بتكرهها ؟
الخيانة والكدب والحرب والتمثيل والتردد والتكبر
**********************************
أكتر 6 حاجات بتحبها ؟
الصدق والشجاعة والسفر والضحكة العالية اللي من القلب والجري تحت المطر وبحب الهوا يلعب في شعري ويرجعه لورا
**********************************
الأكلة اللي بتفضلها ؟
البطاطس .. البطاطس .. البطاطس .. بجميع أنواعها
البيض .. البيض .. البيض .. بجميع أنواعه
**********************************
الشغل بالنسبة لك ؟
وسيلة للاستقلال النفسي وكسب المصاري (الفلوس) وتحقيق الأسطورة الذاتية
**********************************
الكمبيوتر والإنترنت بالنسبة لك ؟
حياتي .. بحس وانا من غيرهم زي السمكة اللي طلعت من المية
برده محدش يسألني التشبيه ده جالي ازاي
عايزة أعرف بقى ازاي نوصل لأول واحد اخترع حكاية التاج ده
وعموماً أنا مش هدبس حد عشان أصلاً زمان الناس كلها وصلها التاج ده لأني كل ما افتح مدونة ألاقيه أول حاجة تقابلني ، المهم كل الناس بتدعي عالتاج ده متهيألي عشان الفضايح بس هي فعلاً طريقة ظريفة وحلوة عشان نتعرف على بعض أكتر

17 comments:

أميرة البلطجية said...

وممكن نقول تشبيه تاني للشخصية
زي البططساية المقلية بزيت مش عارف ايه
مقرمشة من بره وطرية ولذيذة من جوه
ايه رأيك في التشبيه البطاطس ده؟ مش اكلتك المفضلة
عموما انت لذلذة من جوه ومن بره يا جميييييييل

moodysalihamidzic said...

تعليقات حضرتك جميلة
طب بالنسبة للشغل
حضرتك بتشتغلى ايه؟

shabfa2re said...

اتورطتى فين بس
ما حضرتك فلسعتى من الاجابات اللى كنا هنعرفك بيها
بس بصراحة انا عندى احساس انتى مين
من اول مرة دخلت بيها المدونة العسل دى
طب حتى قولى اول حرف من اسمك
اعترفى
D:
بس والله اجاباتك حلوة اوى
:)
بس مش فاهم اجابة سؤال شخصيتك نوعها ايه؟

koukawy said...

يا شموسه00انا شيكو مررتلي نفس التاج ده00بس انا مش عارفه اقبله منين00
و بعدين انتي عملتي البلاير ازاي يا تري ده مطلع عينيا

shams said...

برنسس
تشبيه عسسسسسسسسل خاااااالص انت كده خليتيني عايزة أقوم أقلي لي شوية بطاطس حالاً وشكراً ليك ومفيش أحلى منك
-------------
مودي
شكراً لتعليقك وأنا بشتغل مدرسة كمبيوتر ده على أساس إني بعرف كمبيوتر وبعرف أدرس بس يللا مش مشكلة
-------------
شاب فقري
أنا أكبر مفلسعاتية في الدنيا وشكراً يا سيدي على تعليقك بس بالنسبة لتشبيه شخصيتي أقصد بيه إني دايماً عاملة غلاف صلب من بره مع إني ساعات بحس إني ضعيفة جداً يعني برسم دايماً وش كأني مبيأثرش في حاجة ومش رومانسية والكلام ده باختصار
playing as a tuff girl but as matter of fact , am not
-------------------
كوكو الكميل
عشان تقبلي التاج بتروحي مدونة شيكو وتشوفي الأسئلة اللي هي مجاوبة عليها وتكتبيها عندك في البوست من أول وجديد وبإجاباتك الخاصة بيك وهو ده معناه انك قبلتيه يعني قبلتي تنشريه عندك وتجاوبي عليه
وبالنسبة للبلاير أنا هنشر طريقة عمله في نفس البوست اللي فيه الطرق اللي فاتت وانت تؤمر يا كميل

Mony The Angel said...

3a2rab bardo :D
agda3 naas yabenty
3araby aw engeleezy ;)

shams said...

yeeeeeah mooony , e7na el3ozamaa

Mony The Angel said...

yea we r ;)
lol

LAMIA MAHMOUD said...

لالالالالالالالالالا .. انا عايزة اعرف تشبيه البيضة ده جالك منين بجد يعني

شادي فايد said...

منير

shiko said...

اجابات ذكيه ودمها خفيف يا شموسه هانم

تحياتى

shams said...

لميا والله مش عارفة يا لميا ده مجرد إحساس ولقيتني بقوله ، بس إيه رأيك أتاكل أكل .. صح
----------
شيكو متشكرة على ذوقك جداً جداً ، تسلمي
----------
فادي شكراً لمرورك ولو اني مش عارفة اقرأ تعليقك ، مش شايفاه يعني

shams said...

فادي ممكن يكون قصدك أفتح لينكة منير ، عموماً أنا فتحتها ومتشكرة ، أنا من عشاق الملك

الأباصيرى said...

الله الله

عقبال التاج بتاع الفضايح

shams said...

يا شماتة الأباصيري في

azmeralda said...

بجد والله انا اول مرة الاقي حد زي بيحب الهوا لما يجي علي شعره ويرجعه ورا... والله فرحانة علشان انا لما بقول لحد كده بيهريني تريقة
وكمان انت شكلك سكر بجد وانا اول مرة ادخلك هنا بس انا فرحانة بجد اني وقعت علي المدونة دي
سلااااااااااااااامز يا كبيرة

shams said...

azmeralda
أنا اللي محظوظة اني واحدة زيك دخلت مدونتي وعلقت فيها
بس بجد عيشي حياتك واستمتعي بيها وخلي الهوا يدخل في شعرك ويرجعه لورا
محدش واخد منها حاجة