29 July 2007

تاجين أهم .. لأ دول طلعوا تلاتة

يااااااه تاجين مرة واحدة ما قلنا تلاتة
أنا مجاليش تاج من زمان اوي لدرجة اني قلت خلاص فرجت ونسيوني في التاجات لغاية ما لقيت
حدوتة بعتالي تاج و محمود بيمررلي تاج الصراحة أسقط في يدي وبعدين قلت يا شيخة التاجات دي معمولة عشان تقرب الناس من بعضها عشان نعرف معلومات أكتر عن بعض وكده ودي مش اول مرة
توكلت على الله
بالنسبة للتاج اللي حدوتة حبيبتي ممراه انا كنت جاوبت عليه في اللينكات دي
الأولاني
http://darbetshamsy.blogspot.com/2007/03/blog-post_17.html
التاني
http://darbetshamsy.blogspot.com/2007/02/blog-post_08.html
بالنسبة بقى لتاج محمود فده اول مرة يجيلي وهو كالتالي
واحد : مين أكتر 6 أشخاص بتحبهم ؟
بابا وماما كده رقم واحد - اخواتي الاتنين كده رقم اتنين - قرايبيني كلهم كده رقم تلاتة - صحابي كلهم كده رقم أربعة
ملكوش دعوة بقى بالباقي
اتنين : هل أنت سعيد (وفي حالتي دي هل أنتي سعيدة) ؟
السعادة دي حاجة نسبية خالص يعني مرة أحس اني سعيدة جداً وطايرة من الفرحة والأرض دي كووووولها مش سايعاني ومرة أحس اني في قمة الاكتئاب لدرجة انه لو اتوزع على جمهورية مصر العربية هيكفي ويفيض للجيران
فعموماً الحمد لله
تلاتة : لو اجتمعت مع حسني مبارك في مكان واحد هتقول له ايه ؟
ده سؤال جريء اوي .. هجاوب عليه ازاي ده
وانا ايه اللي هيجيبني اصلاً في اودة واحدة مع سيادة جناب السفير قصدي الرئيس
لا يا عم العمر مش بعزقة .. مش عايزة اشوفه حتى
أربعة : لو معاك مليون ونص هتعمل بيهم ايه ؟
يااااااااه ده انا هعمل عمايل واسوي الهوايل
انا فكرت كتير لو فعلاً جاتلي فلوس كتير كده هعمل ايه لقيت ان اول حاجة بفكر فيها اني اجيب الحاجات اللي حبايبي محتاجينها .. أياً كانت بقى
يعني لو ماما نفسها في اي حاجة اجيبهالها هوا ولو بابا عايز اي حاجة لو اخوي او اختي نفسهم في حاجة علطول هبعزق القرشين اللي معاي عليهم .. بعد كده اوسع الدايرة شوية على قرايبي وبعدين صحابي
ومش هنساني طبعاً ده أنا صاحبة الليلة كلها اكيد هعمل كل الحاجات اللي نفسي فيها والفلوس اللي معجزاني
بس الصراحة عايزة اقول حاجة مهمة اوي ألا وهي ان الفلوس لو جت سهلة هتروح سهلة على رأي المثل الإنجليزي
easy come .. easy go
فلازم الواحد يتعب عشان يحس
خمسة : أنت مسلم ؟
لأ
مسلمة
ستة : ليه ؟
ده سؤال بقى بالذمة
يعني ده لو مكانش بالميلاد والبيئة والتربية هيبقى اقتناع وايمان وحب
متشوفو اسئلة تانية احسن
سبعة : مين أكتر شخصية متقدرش تستغنى عنها ؟
أكيد ماما طبعاً
أصل انا لسه متفطمتش
تمنية : إيه أكتر موقف محرج ؟
يااااااه وليه بس الإحراج ده
اهو ده بقى هو أكتر موقف محرج اني اقول أكتر موقف محرج قدام الناس كده
لا يا عم إذا بليتم فاستتروا
تسعة : الأمنية اللي تتمنى تحقيقها
هيه حاجات كتير مش معقول اختصرها في أمنية واحدة
بس اقدر اقول يارب
يارب اشوف حال بلدنا اتصلح وبالتالي حال الناس كلها هينصلح واحنا كمان
وكل ما الأحوال كانت حلوة كل ما الإنسان هيبقى سعيد وبالتالي كلنا نعيش في هنا وفرح
همرر التاج ده بقى لميييين ؟
حدوتة عشان تتعود بقى ع التاجات وكده
بوسي حمد الله ع السلامة يا بوسي
واحد بس حاول بقى تزبطه المرة دي
ماكس ضروري تجاوب يا ماكس
وفي ناس تانية كتير لو قولتهم الحبر هيخلص

17 comments:

Hadota ... حدوتة said...

السلام عليكم
ازيك يا شمس
عاملة ايه
انتى عسل والله
اجابتك كلها عسل اوى
انا مت من الضحك
انتى شبهى فى حاجات كتير واكترهم انى مقدرش استغنى عن ماما حبيبتى
ميرسى اوى على التاج
وربما يقدرنا ونقدر نرد لك الجمايل
قصدى التيجان
اسيبك بقى يا جميلة
على فكرة مبسوطة اوى انى اول تعلييييييييييق
:)

rack-yourminds said...

تسجيل حضور الاول وجاي اعلق

rack-yourminds said...

كل ده هتعمليه بالمليون جنيه ونصف ,هما المليووون جنيه ونصف بيعملو ايه الايام دي ههههههههههه


تاااج ليا تاني حرام عليكي

انا حرمت من التاجات الا في حاله واحده شوفيلي صرفه في المشكله اللي في جهازي

الصفح اللي بكتب فيها البوست مفهاش تنسيق خطوط ولا الوان

انا مش عارف ليه

انا كل البوستات اللي كاتبها بدون الوان والتنسيق مش اوي

شوفيلي حل وانا ابقي اشوف التاج

بتشكر كتير علي انك وجهتي لي التاح

تحياتي شمس

شاب نفسة يحقق حلمة said...

السلام عليكم
ايه الردود الدبلوماسيه دي

وبعدين كل ده بمليون ونص بس
ليه هما ميلون ونص دولار
هههههههههههه
تحياتي ليكي

max.adams said...

اجاباتك دبلوماتيك من الدرجة التانية
بس بصراحة أحلى واحده بشوفلها تاجات هي انتي


و ألف شكر عالتاج

Reemo said...

أنا قلت أعدى اسلم يا شموسه
واقولك انك بجد وحشتينى
شوفى انا حظى معاكى كل ما أعدى الاقى تاج عندك
فبسيب السلام على باب البلوج وامشى
عامله ايه؟؟
قبلاتى

Shreif fahmy said...

حوار جميل وبسيط وشيق بس ممكن اقول على ملحوظة خبيثة لاحظتها لأني بتمتع بالصفة دي
وهي انك من النوع اللي بتتخنق قوي لما ميكونش في فلوس وطبعا والله أعلم
أزيك ياشمس عاملة ايه انا بس جاي أطمن

Bossy said...

السلام عليكم

بجد دمك زي العسل

ردودك حلو جدا يا شمس

بس حبر ايه اللي هيخلص
مش احنا اتفقنا علي القلم الرصاص
مرسي علي التاج

أكرم يعقوب said...

دبلوماسية من الدرجة الأولى و كالعادة فى حاجات اتهربت منها أنا مش من النوع اللى بيحب يعلق على المدونات بس بجد اجبرتنى إنى اعلق و احييك بشدة مدونة رائعة بتعرض فكر جميل و قوى تانى احييك جداً

أكرم العوضى

truelove said...

اجابتك لذيذة يا شموسة وقلبك ابيض زي القشطة وحبك للي حواليكي جميلقوي تحياتي ليكي

heba said...

انتو خليتوني أدوب من الخجل بكلامكو الحلو ده

معلش انا بعتذر عن التأخير اصل هي "بقت عادة" على رأي حماقي .. عاملة زي ما اكون باجي ارمي بوست واجري واقول عدووولي

heba said...

حدوتة

وعليكم السلام ورحمة الله وبركاته
انا كويسة الحمد لله
يا بنتي سيبك مني المهم انت ايه اخبارك
الحمد لله اني كنت السبب في رسم ابتسامة على شفايفك فما بالك بانك ضحكتي
ربنا يخليلك مامتك ويخليك ليها ياااااارب
وانا كمان مبسوطة انك أول تعليق
********************************
واحد

جاي تحجز مكان يعني يا واحد .. ماشي ياعم براحتك
حتى المليون ونص مبقوش يعملوا حاجة الأيام دي .. لا إله إلا الله .. أمال الـ 230 جنيه اللي بنقبضهم كل شهر دول هيعملوا ايه في الأيام دي بقااا ؟؟!!!؟؟؟

وبعدين يا سيدي اعمل التاج زي ما نت عايز .. كل اللي ييجي منك مقبول بس انت جاوب
**************************
شاب يارب يحقق حلمه اللي نفسه فيه

مش هم مليون ونص وخلاص
سيبها مفتوحة بقى
المهم نعمل بيهم حاجة مفيدة
بس اول مرة اعرف ان المليون ونص دول مش بيعملوا حاجة
ده انا كنت واخدة فكرة غلط بقى عن قيمة الفلوس دي

تحياتي انا كمان
*****************************
ماكس

من الدرجة التانية ؟
خبير يعني سيادتك ولا ايه ؟

"وش مكسوف "
ميرسي على المجاملة الرقيقة دي يا جميل
لا شكر على واجب ومش هنساك في التاجات دي
يللا أي خدعة
***************************
reemo

ريمو ست البنات الحلوين
الله يسلمك ويحفظك يارب
ربنا ما يحرمنيش من سؤالك علي يا عسل
انا عارفة اني مقصرة معاك خالص بس معلش
وبعدين ايه تيجي من ع الباب كده وتمشي علطول

احنا فينا من كده
لأ .. انت لازم تدخلي وتقعدي وتشربي حاجة معاي كمان

يللا مستنياك المرة الجاية
سلامي يا جميل
************************
شريف

ازيك يا شريف
هي ملحوظة مش خبيثة ولا حاجة
انا فعلاً بتخنق لما ميبقاش معاي فلوس
بس ده عشان مفيش حاجة بتمشي دلوقت من غير فلوس يعني هو انا هعوزها ليه ؟
وبعدين مبحبش لو حد قصدني في حاجة اقول معييش فما بالك اني انا اقصدني ؟

يللا بقى منهم لله اللي كانوا السبب في ان احنا كوووولنا مقشفرين مش انا وانت بس
************************
بوسي

حبيبتي خلاص من يوم ورايح هكتب بقلم رصاص

بس بشرط

معاك براية ؟
تحياتي يا عسل
**************************
أكرم

الله يا أكرم
انت اديتني الدرجة الأولى أصل ماكس فوق اداني من الدرجة التانية
متشكرين يا عم أكرم
رفعت روحي المعدنية
يعني اكمنك علقت عندي ومدونتي عاجباك
ثانكيوووو فيري ماتش بجد والله ع الثناء والمديح ده
تحياتي
*****************************
true love

الله يخليك ده بس من ذوقك
وكله لله وعلى الله

سلاماتي .. احتراماتي

احساس لسه حى said...

عزيزتى
ده مينى تاج انا شوفت تاجات طويله عن كده كتير
بس دول مش اشخاص
دول ناس مفروضين علينا نحبهم
ماعدا الاصحاب
يعنى السعاده عندك يوم مر ويوم حلو
المهم برضوا مقولتيش هتطلبى منه ايه
امال لو جالك المبلغ ده
واللى الحاجات اللى محتاجنها حبيبك هتجبهلهم يبقا مش هيكفيكى خالص محتاجه ادهم 10 مرات
اما الوقف المحرج كان لازم تقوليه علشان الاحراج بيكون خجل والخجل حياء والحياء من الايمان
يعنى هتحكى موقف يثبت ايمانك اقصد جزئ منه
سلام

heba said...

إحساس لسه حي

مش شرط عشان مفروض نحبهم يا حسام نقوم نحبهم علطول في ناس فعلاً فعلاً مش بتحب أبهاتها ولا أمهاتها بغض النظر عن ايه السبب أكيد انهم مش كويسين ومغايرين للفطرة بس مش عشان دول الاباء ودول الأمهات أو دول القرايب نحبهم علطول مع ان مش دي الحالة العامة دي حالات استثنائية مش منتشرة

بس انا ذكرتهم - الأشخاص اللي انت تقصدهم ان حبهم مفروض علينا - عشان انا لما كبرت وميزت الحلو من الوحش لقيتهم حلوين ويستاهلوا يتحبوا

أما السعادة فهي فعلاً نسبية عندي جداً وياريتها على قد اليوم بحاله يبقى حلو أو مر ده معاي ممكن تبقى ثانية حلوة والثانية اللي بعدها مرة

اما الفلوس فدي مجرد اماني وأحلام .. هييه مين عارف
أما الموقف المحرج فكفاية إحراج بقى

تحياتي ليك

hana said...

ردوددك حلوة بجد
وكلامك جميل
على فكرة انا كمان مرتبطة بماما اووووووووى
تحياتى وتقديرى

heba said...

هنونة

ده انت اللي جميلة يا هنونة .. تسلمي
ربنا يخليلك ماما يا هنونة ويخليك ليها يارب ويفرحها بيك

سلاماتي واحتراماتي

احساس لسه حى said...
This comment has been removed by the author.