07 August 2007

دماغه ودماغها وفي الاخر شوية هرش

البوست اللي قبل اللي فات اتكلمت فيه عن اختلاف رد فعل كلاً من البنات والشباب في المواقف المحرجة خاصة مع بعض ودورت شوية كده لعلي أعثر على أي سبب علمي مقنع لقيت انه أصلاً دماغي الذكر والأنثى يختلفان إلى حد ما في البنيان والنشاط وكمان من الناحية التشريحية وجدوا ان أدمغة الإناث أصغر حجماً من أدمغة الذكور ووجدوا اختلافات أخرى بنيوية وكيميائية ووظيفية وقالوا كمان - العلماء طبعاً اللي اكتشفوا الحاجات دي - انه لازم أثناء البحث عن العلاج وأسباب الأمراض ياخدوا الاختلافات دي في الاعتبارعشان علاج الأنثى يختلف عن علاج الذكر وبالتالي يوصلوا لنتائج أفضل إن شاء الله



الكلام ده كوووله جاب لي فكرة تانية هي ملهاش علاقة المرة دي بالإناث والذكور والأمراض والعلاج


له علاقة بإني عمالة افكر في اسباب منطقية وعلمية للحاجات العادية اللي بتحصل حوالينا من غير حتى ما نفكر هي بتحصل ليه بالطريقة دي من شدة طبيعيتها وان ده الشيء الافتراضي اللي بيحصل



رغي كتير وكلام كتير بس صدقوني هوصل للمفيد في السطر الجاي



ليه بقى - ويفضل أسباب علمية - لما الواحد بيحس انه عنده ارتيكاريا في أي حتة في جسمه بيبقى هيموت ويهرش فيها خاصة خاصة لو مش طايلها بيبقى هيتجنننننن بكل ما تحمله الكلمة من معنى



وحاجة كمان ليه أول ما الواحد بيهرش في الحتة اللي مجنناه دي بيهدا علطول ويحس براحة جمييييييييييييييلة



مش عارفة دماغي دي هتوديني لغاية فين



21 comments:

Shreif fahmy said...

المفروض أخد عشرة من عشرة أول واحد يعلق على البوست أنا أول ماقريت البوست هرشت في دماغي وقعدت أفكر وقولت ياواد ياشريف أنتظر الدكتورة شمس أحسن وهي تفصح عن الاسباب العلمية

shams said...

شريف

أنا والله يا شريف ما اعرف الأسباب العلمية
بس أول ما الفكرة هرشت في دماغي قلت احطها هنا جايز حد يعرف وهدور برده

وبالنسبة للدرجة بتاعتك انت فعلاً عشرة من عشرة

بيدو said...

انتى ايه
كل شوية تتطلعى بحاجة غريبة تجنن
انتى بتوصلى للحاجات دي ازاي
انا لسة حيران في ليه الولد بيسخن والبنت بتبرد لما يقابلوا موقف محرج

Hadota .. حدوتة said...

السلام عليكم يا شمس
عاملة ايه

السؤال محير جدا

بس عادى يعنى الانسان بيبقى عاوز يهرش عشان وجعاه
ولما بيهرش بيرتاح عشان متوجعهوش


طب كلامك دا هيقودنا نفكر فى حاجات كتير
ليه الناس بتموت
ايه الاحساس البيولوجى اللى بيحس بيه الانسان اللى على وشك الموت

طب ليه بنضحك
ليه لما الواحد يعمل هههه يبقى ضحك ولما يعمل اهىء اهىء يبقلا عيط
وليه مش العكس
يعنى ليه لما بنعمل اهىء اهىء دى متبقاش ضحكة

انا دماغى اتلخبطت
وشكلى برغى بره الموضوع

تحياتى يا شمس
:)

shams said...

بيدو

بس إيه رأيك
أنا مجنونة وبحب الجنان ودماغي أجن
لما تخلص من حيرتك ابقى تعال
سلام
********************
حدوتة

آه صحيح يا حدوتة الواحد بيرتاح لما بيهرش بس هو ده السؤال بتاعي ليه بنرتاح لما بنهرش

وعلى رأيك في حاجات كتير لازم نفكر فيها

بس تأكدي انه طالما دماغك اتلخبطت يبقى انت بترغي جوه الموضوع

تحياتي وسلاماتي

wahed said...

تسجيل حضور وغدا هاجي اعلق

wahed said...

يا بنتي ايه ده ضحكتيني ههههههههههه

انا معرفش ليه بيحس بالراحه

تحياتي ليكي

بيدو said...

انا بجد كنت محتار اوي ليه مواضيعك غريبة لوي كده ومجنونة واخر حاجة وصلتلها ان ده تأثير ضربة الشمس هيا اللى عملت كده فيكي
ومستني تعليقك عندي عايز رأيك يا حضرة مدرسة الكمبيوتر

أنا حر said...

والله انا انصحك فعلا بزارة الدكتور لأن الموضوع ده اكيد ليه اسباب مختلفة بس ربنا يستر وميكنش الموضوع معدي
تحياتي

wahed said...

مفيش جديد

منتظرين حاجه جديه

تحياتي

koukawy said...

تعرفي رغم معلومة ان دماغ الانثي اصغر انما تلاقي اناث كتير دماغها كبيره و بتفكر كويس
اكتر من الذكور
هههههههه

Hadota .. حدوتة said...

شموسة
فينك
وحشانى يخرب عقلك
ابقى عبرينا ونزلى بوست
تحياتى يا جميل
:)

إبراهيم محسن said...

ههههههههههههه
هرششششششششششششش
الهرش ده في الأول وفي الآخر تنبيه عقلي نحو حك مناطق معينة في الجسم
جايز يكون تحت الجلد ماشي صرصار واحنا مش واخدين بالنا
العقل أدرى بالكلام ده منا ، يعني هو بيشوف منطقة معينة بتحتاج للحك ، فبيأمر وعلينا التنفيذ

وبعدين حاولي تدرسي الموضوع تويس يا بنوتة
جايز يكون العيب إن صاحب الهرش مستحماش بقاله كتير
:)

كل صابونة وانت طيبة

shams said...

wahed

والله وانا كمان ماعرفش بس اديني بدور

وبعدين انا اصلاً مبدخلش كتير فين وفين على ما بدخل يعني عشان كده بطول من غير ما اكتب بوستات جديدة والموضوع ده بيزعلني أكتر من أي حد تاني فمعلش بقى
************************
بيدو

أهو انا كده بقى غريبة ومجنونة ودي أحلى حاجة
أمال ضربة الشمس اللي المدونة فيها دي جت من شوية

تحياتي ليك يا مستر
***************************
أنت حر

لا لا متخافش يا "حر" الموضوع معدي جداً لأنه كلنا بنهرش وكلنا بنرتاح لما نهرش وبالنسبة للدكتور الحقيقة الكارت ضايع بس بعد التفحص والسؤال لقيت انه الهرش عبارة عن حالة حسية تستدعي حدوث حك في الجلد والحك ده ممكن يسبب التهاب وإحمرار شديد في الجلد تقوم تزيد عملية الهرش وتتسع دائرته

أما بقى بالنسبة للراحة بعد الهرش فأنا برجح انه مادام انت لبيت طلب الجسم فخلاص هيتعبك ليه

هذا والله أعلم
****************************
كوكاوي

كلامك سليم مية ف المية يا كوكو

فعلاً في بنات كتير بتفكر أكبر من سنها والشباب اللي من نفس السن تحسيهم كده لسه عايشين طفولتهم .. الموضوع ده مش عام دي نسبة منهم فقط

سلاماتي لكل اللي في العشة
*******************************
حدوتة

وانت كمان وحشاني اوي بس انا لما جيتلك على اللينكة بتاعتك لقيت مدونة "المنبر" مش "حدوتة سكوب" أجيلك فين يا جميل ؟
*******************************
إبراهيم

تنبية عقلي ايه وحك مناطق ايه ياابراهيم

الموضوع كله في الصرصار وسلملي ع الصابونة

Hadota .. حدوتة said...

شموسة
معلش على اللخبطة اللى حصلت
غلطة مطبيعية ولا هتعود
ادخلى على الاكونت هتلاقينى
تحياتى

Shreif fahmy said...

ياشمس ياشموسة منتظرينك في مدونتنا علشان تشاركينا صدور الجزء الأول من يوميات محتار في السنترال ومتزعليش لأني متحالف ضدك في البوست الجديد

shams said...

حدوتة

من عيني يا حدوتة .. خلاص محصلش حاجة ولا يهمك
************************
شريف يا فهمي

يعني ايه متحالف ضدي دي .. عموماً أنا جاية أهو

shayma said...

تصدقى فكرة برضه تستحق الدراسه
الهرش يا مفتريه الهرش
:)))))))))))))
بجد صحيح بنستريح ليه
سلامى يا جميل

shams said...

شيما

يا بنتي هو انت لسه شفتي حاجة
هي بس بتبدأ بهرش

صدقيني ما عرف ليه بنستريح
بس الحمد لله ان احنا بنستريح بجد وإلا حالتنا كانت هتبقى صعبة اوي

سلاماتي يا قمر

احساس لسه حى said...

عزيزتى
الاسباب العلميه معرفش
بس اتاكدت من شئ
عارفه ساعات الهرش يجى بالايحاء
وانا من ساعة ما قريت عمال اهرش على السيرة
منك لله
عجبك كده
سلام

أمل فتحى عزت said...

اسعدنى المرور بمدونتك وأتمنى لك التقدم والمزيد من الاهداف النبيلة


كما أدعوك لزيارة مدونتى والتى محتواها


تعالوا نسافر المسافات الى زمن من المحبة لاينتهى


كما أدعوك لقرأة قصتى


(بكل لغات العالم أحبك)