23 January 2007

هتدفع انت ولا ادفع انا ؟



النهاردة وانا راكبة الميكروباص الداخلي وطبعاً بعد ما اتحشرنا في بعض خمسات خمسات قصدي أربعات أربعات وبنات في ولاد وولاد في بنات ومعادش حد بيهمه اي حاجة جه نصيبي في الكنبة اللي ورا اتزنقت جنب الشباك علشان كان في 2 شباب تانيين في نفس الكنبة ركبت وراي بنت متمنكشة حبتين ومرضيتش تركب رابع قلت في سري الحمد لله وكان البوي فريند بتاعها واقف عالباب من جوه مستني يشوف هيقعد فين قام التباع قاله تعال هنا يا غالي يقصد الفسحاية اللي جنبي علشان يكمل اربعة في الكنبة من هنا بقى بدأت ألاحظ التصرفات الغريبة لقيته بيقول للجيرل فريند بتاعته هو انت مش هتقعدي هنا وبيشاور على الفسحاية اللي جنبي وبعدين راح قاعد .. استغربت قوي يعني هو بيسألها كده ليه ؟ عايزها تتحشر هي ؟!! المهم نيجي للموقف اللي بعد كده التباع مستني الأجرة لقيتها بتطلع الفلوس وتديها للمحروس قصدي للبوي فريند بتاعها المشكلة مكانتش في انهما بيتشاركوا المصاريف سوا لكن المشكلة كانت في انها محرجة وهي بتعمل كده وبتبتسم ابتسامات باهتة وكده قال يعني علشان الإحراج ولقيته بياخد الفلوس ويديها للتباع قام التباع مرجعها له وقاله غير الجنيه ده يا أستاذ مبيمشيش ومحدش بيرضى ياخده ، طبعاً "الأستاذ" معهوش قام رجعه للجيرل تاني وادتله جنيه تاني وهي في قمة إحراجها ، أنا كنت حاسة بكده في الجو ، زمانكو بتقولولي وانت مالك يا حشرية .. هم اللي كانوا قاعدين واحدة قدامي والتاني جنبي مشوفهمش ازاي يعني .. المهم الباقي كان ربع جنيه اداهملها وهي فضلت مسكاه بإيديها لغاية ما نزلت .. الخلاصة بقى : اني اتخنقت من العلاقة اللي ما بينهم .. انا معنديش مانع ان اي اتنين يتشاركوا في المصاريف ومرة علي ومرة عليك لكن يبقى في احراج وحساسية في التعامل يبقوا بيضحكوا على بعض وفي واحد بيستغل التاني والتاني راضي وعاجبه .. خلاص ملناش دعوة بس انا كنت بقول ملحوظة يعني خصوصاً ان الموضوع مكانش مستخبي .. اصلاً بيبان يعني على شكلهم .

11 comments:

Mony The Angel said...

llllllllooooooooooooooooollllllll
enty maweteeny melde7k wana baqra2 al post asasan :D
eh da ya benty da
da enty 3asal wallahy :)
i'm totally with u..
sa7 mafeesh moshkela yet2asmo almasareef laken maib2aash mawdoo3 este2taa3 b2a lol
w 7ata law kda falmafrood sa7 maib2aash fe 7arag aw 7asasia 7ata law da ded almogtama3 yb2a malhomsh da3wa b7ad, laken ella homa feeh da y7'no2 fe3lan zay manty olty..
enty azay esta7melty ya benty, dana yadoob baqra2 fe post w dammy et7ara2 :D
yalla salamz ;)

دينا فهمي said...

في ناس مستغلة ومرة زمان كنت أعرف شخص بالمواصفات دي وقاطعته طبعا في الآخر
الواحد ممكن يدي للي قدامه عينيه برضاه
لكن يحس انه مستغله ده اللي لا ممكن ابدا (:

heba said...

شفتي يا موني بقى انا استحملت ازاي ، اصل هم كانو قاعدين قدامي وكان باين عليهم اوي انا اضايقت برده وشكراً وأي خدمة

heba said...

ايوة يا دينا فعلاً في ناس كده ولازم احنا نكون عارفين هنتعامل معاهم ازاي وموقفنا منهم هيبقى ايه وشكراً على مرورك ونورت البلوج

أميرة البلطجية said...

أاااههه قصص المكروباصات..عارفة انتي ممكن تعملي كتاب من حكايات المكروباصات دي يا شمس
الواحد بس ساعات بيسأل نفسه؟ يا تري ممكن اكون أنا شخص في قصة حد تاني؟
على فكرة..روحي البلوج بتاعت مصعب (
متسجلة عندي في بلوجاتي المفضلة
كان كاتب حاجة مكروباصات برضه كان عنوانها نص دستة موبايلات
بس حلوة اوي(

Shiko said...

ههههههههه

موضوع ظريف

الميكروباص وسنينه والناس اللى بتركب فيه اتشردت خالص

شرفبنى بزيارة مدونتى وهتلاقى موضوع عن الميكروباص برضو

heba said...

انا قريت نص دستة محمول عند مصعب وبجد هايلة جداً وظريفة اوي وعلى رأيك يا شيكو الميكروباص وسنينه ، أصلاً ده بيحصل لأن الناس ملهاش شغلانة غير إنهم يتفرجو على بعض

koukawy said...

الرجاله اللي ستاتهم بلتصرف عليهم كتيييييييييييييييييييييييييييييير
و الغريبه انهم ما بيتكسفوش لما ست تصرف عليهم
اهو ده تابع لموضوع النخوه اللي انا كنت بتكلم عنه

الأباصيرى said...

الموضوع دة بقى منتشر وبقى يقرف
يعنى ساعات تلاقى البنات بيعزموا الولاد فى الكلية على الفطار أو على الكافتريا أو أجرة المكروباص

وتلاقية بيقولها: معلش يانونا معيش فلوس.. معاكى فكة

وهو أصلا مفيش فى جيبة اكتر من خرم ومشط كبريت وعلبة سجاير فاضية لزوم الشياكة

حاجة تحرق الدم

تحياتى

heba said...

صراحتك عجبتني يا أباصيري لأنك قلت رأيك في اللي الولاد بيعملوه رغم انك منهم بس أعتقد ان الولاد هتفضل تعمل كده طول ما البنات عاجبهم وراضيين

الحصان الأسود said...

ايوة بس دة مايمنعش ان فية بنات كتير مستغلة جدا و بتستغل ان الولد مايقدرش يكون قليل الذوق من ناحية
ولا انة يقدر يكسفها من ناحية تانية

لا زلت اذكر الثنائي الشهير في شلة الجامعه سمر ونيفين اللي فطروا طول سنة كاملة في الجامعه في الكافيتريا بدون ما يعزموا حد ولا مرة

مع انهم مش فلسانين ولا محتاجين خالص بل بالعكس حالتهم المادية اكتر من كتير مننا ان لم يكونا الاكثر بالفعل

لغاية ما قاطعناهم بالذات لما شفناها جايبة هدية باهظة لواحد سخيف كانت معجبة بية في عيد ميلادة

ولا زلت اذكر عده مرات اتحرجت من بنات اعرفها وهي بتطلب تستلف مبلغ ضروري على اساس تردة بمجرد تاني يوم وغالباً لا أراها ثانياً لفترة ويكثر هذا بخاصة فترة اخر السنة قبل انقطاع الامتحانات
وبحجج الكتب والتصوير وخلافة وعندما تراها بقى في الامتحانات اكيد طبعا حاتتكسف تروح تقولها هاتي الفلوس اللي انتي مستلفاهم

وللأسف مازلت اتعرض لأن لكثير من مواقف بايخة منهم مثلا بنت اعرفها و اصحاب جدا من ايام الجامعه ومن سنة اولى كمان ولكن لغاية النهاردة تختفي بالشهر لا تتصل ولا تسأل ولا في عيد ولا غيبة واول ماتعوز حاجة تلاقيها بتتصل
أخرها اختفت من رمضان اللي فات ماسمعتش عنهاولا حتى في العيد
غير برسالة تحرق الدم بتقولي "قبل الخطوط ماتنشغل و الخط يديك طوط طوط باقولك كل عيد وانت مبسوط" جاية تبعت دي بعد العيد ما خلص بكذا يوم

و الاسبوع اللي فات لقيتها بتتصل بيا بتطلب مني اساعدها في تصليح الكمبيوتر بتاعها وانزل لة ويندوز جديد لأنة بايظ خالص

وغيرها اللي تتصل بس لما تكون عربيتها عاوزة تتصلح وعاوزاني اجي معاها او اوديلها العربية لحد اعرفة كويس مايشتغلهاش

والغريب بقى ان تلاقي الواحدة من دول اهلها مكبرين دماغهم ويمكن متجوزة وجوزها منفض ايدة منها وسايبها تشوف اي حد من اصحابها يروح معاها مشوار ولا ييجي يصلح لها كمبيوتر او يوديها للميكانيكي بتاعه

أدي أمثلة من استغلال البنات