17 June 2007

حالة حب



أنا حاسة بحب كبير اوي .. لكل حاجة ولكل الناس .. يعني من الآخر أنا عايشة حالة حب جميلة أوي مش هقولكو اني بحب شخص معين أو الحب اللي في دماغكو .. لأ .. خالص .. أنا حاسة اني في حالة حب للحياة ولكل حاجة حوالي .. طب خير يعني .. وده من ايه إن شاء الله اصل نادر لما حد تجيله الحالة الجامدة دي من الصفاء الروحي والمعنوي والذهني والذاتي وهلم جرا
هقولكو .. ده بسبب العلاقات الإنسانية الكويسة اللي ما بين الناس وبعضها لأن بصراحة بعد ما كل حاجة تفنى مبيتفضلش غير الكلمة الحلوة والابتسامة الحلوة والإحساس الصادق اللي بيطل من القلب في العين مباشرة .. أقصد ايه ؟
كنت امبارح عند عمتي ، مكنتش شفتها من زمان قوي ولا كنت شفت ولاد عمتي ولا بناتها ولا ولادهم –أحفاد عمتي- وكانت زيارة جميلة قوي حسيت فيها اني في بيتي واني مش غريبة في وسطيهم وبصراحة الإحساس بالألفة للمكان وللناس وكده صعب الواحد يحسه اليومين دول في اي مكان ولا مع اي حد والكلام والرغي خدنا أكتر من ساعتين ومحسيناش بالوقت خالص خالص
cathching up
المهم وانا مروحة كنت حاسة ان الدنيا دي كلها حلوة وان مفيش احلى من القرابة و الصداقة والزيارات الحلوة دي .. بجد حسيت اني طايرة من الفرحة .. حسيت اني ..
في حالــــــة حـــــــب
طب وايه النتيجة .. يعني ايه اللي بيحصل لما الواحد يحس انه في حالة حب .. بصراحة شديدة بيحس ان كل شيء جميل في عنيه وحواليه وكل الناس حلوين ومفيش مشاكل .. يعني من الاخر بيحس ان كل حاجة بمبي والدنيا ربيع والجو بديع وده بينعكس على اللي حواليه بمعنى انه بيبقى عايز البني ادمين اللي معاه يكونوا فرحانين هم كمان ولو يقدر يعملهم اي حاجة عشان يحلقوا معاه في السما كده بيعملها وبيعملها من غير ما يحس بتقل ولا حاجة بالعكس بيعملها بحب خالص
ياترى بقالكو اد ايه مشفتوش حد من قرايبكو ولا قعدتو معاهم قعدة صفا ولا حد من صحابكو اللي مشفتهومش من زمان انا عارفة ان الوقت مشكلتنا كلنا بس ممكن نستعيض عن الموضوع ده بالتليفون ولو بس دقيقتين تسمعوا صوتهم تاني .. جايز تكون آخر مرة الله أعلم
انا بس بقولكو كده علشان الإحساس ده جميل اوي بيخرجنا من هم الحياة اللي احنا علطوووول مدفونين فيه والأهم بقى انه يستمر معانا ولو ليوم اصل الدنيا دي مش بترحم ومش هتهنينا عليه فهنضطر نسرق اللحظات الحلوة دي في غفلة من الزمن

17 comments:

Shreif fahmy said...

أولا لا شكر على واجب وأتمنى أن الجزء الأول يكون عجبك وان شاء الله ربنا يوفقني واكون عند حسن ظن الناس كلها في أني أكون قدمت حالة من الرومانسية أحنا في أمس الحاجة ليها

Unknown said...

اللة يا شمس

فعلا احساسك

دخلى وحسسنى بالفرحة


بس عاوز اقولك على حاجة

بلاش وانت ى فى عز فرحك تبصى فى عيون الناس

عشان

كل شى بيتبدل فى ثانية

heba said...

شريف

الجزء الأول عجبني فعلاً يا شريف وان فعلاً قدمت حالة من الرومانسية احنا صحيح في أمس الحاجة ليها بس على قد ما احنا محتاجينها انا معدتش بصدق انها موجودة اصلا
***************************
مش فاهم حاجة

احلى حاجة انك حسيت بالفرحة لأن ده هدفي اني اشارك الناس فرحتي والحمد لله ان البلوج مفيهوش عيون والا مكانش الإحساس ده استمر لغاية ما اخلص كتابة

بجد نصيحتك عميقة اوي وحقيقية وهحطها في عيني وشكراً

نفسنا said...

ندعوكم لمشاهدة العدد الثانى من مجلة نفسنا

nohamy said...

هنحاول نفرح

koukawy said...

مبسوطه اوي انك منتشيه و عامله دماغ روقان و تفاؤل
ياه قلما لما تلاقي حد كده
ياللا عقبال الناس كلها

صاحب البوابــة said...

احساس جميل

أتمنى ان يديمه الله

تحياتي

فبركة said...

شمس
بجد مفيش اجمل من المقولة الشهيرة للشاعر إيليا أبو ماضى
كن جميلا ترى الوجود جميلا
مفيش اجمل من الانسان يكون متصالح مع نفسه وبيحب كل الناس دون انتظار اى مقابل
لأن الصح اننا نحب الناس عشان خاطر ربنا مش عشان خاطر الناس نفسها
لكن المهم اننا ما ننتظرش اى مقابل من حبنا للناس لان فى ناس كتير مش بتفهم وتقدر هذا الحب
تحياتى لمشاعرك الرقيقة وحبك للناس
وارجو زيارة مدونتى

Anonymous said...

جميل اوي انج تحسي بكده
خصوصا في الوقت اللي كلنا فيه بنعيش حالة اكتئاب
ربنا يسعدك زي ما فرحتينا
سلام

max.adams said...

الموضوع يا شمس أن حالة الحب دي نادرة طحن و مش بحسها الا كل قرن مرة و ده لأن في حالة خنقة بحس بيها عكس اللي انتي بتحكيه ده تماما مع اني مفيش أحسن عندي من الصفا و الروح الحلوة

و مبروك عالزيارة ابقي قوليلي و أنا آجي معاكي المرة الجاية ماتروحيش لوحدك

Unknown said...

رجعتينى لا يام زمان لما كنا فى كل صيف العيله كلها بتاعتنا بتتجمع و نقضى مع بعض اسبوعين و كنا بنشحن فيهم حب يكفى كل السنه و كنا بنحس بنفس احساسك ان الدنيا كلها حلوه و اننا بنحب الدنيا كلها

بس للاسف اديلنا كتيررررررررر متجمعناش


تحياتى

Unknown said...

‘لى فكره انا نسيت اقولك ان انا بحب جداً انجليانا جولى


بس خلاص

سلاممممممممممم

Shreif fahmy said...

تحضرني هنا كلمات هاني شاكر وهو بيقول
حب ياقلبي وقول للكل لما الحب علينا يطل البحر يروق والشمس تهل والاقي الدنيا جناين فل

منتظر تعقيبك على الجزء الثالث والأخير من عفوا حبيبي متقدرش ومتعرفش

http://sfahmy78.blogspot.com/2007/06/blog-post_27.html

Bossy said...

السلام عليكم

احلي سلام لاحلي ضربه شمس
في الدنياااااااا
بجد احساس حلو اوي والاحلي بقي مدونتك
جامده جدا
امضاء
ضربشمساويه قديمه جدااا

heba said...

نفسنا

حاضر يا نفسنا مع ان نفسنا ترد علي حاجة من نفسنا
***************************
بني آدم مع وقف التنفيذ

ايوة يا تهامي حاول تفرح وادينا اهو كلنا سوا هنشجع بعض
**************************
كوكاوي

عقبال كوكو لما يفرح بقى لحسن مغامراته زمانها عاملاله اكتئاب جامد
****************************
صاحب البوابة

يارب يديمه علينا كلنا .. قولوا آمين
آآآآآآمين
*****************************
فبركة

انت قلت حاجة مهمة اوي يا أستاذ شريف وهي ان احنا نحب من غير ما ننتظر حاجة من اللي احنا بنحبهم

انا بعتقد ان ده اسمى انواع الحب وشكراً لزيارتك ومدونتي نورت
******************************
غريب

الله يخليك يا عبد الرحمن ويارب يسعدك علطول
*************************
ماكس

حاول ترجع للصفاء والروح الحلوة يا ماكس دول احلى حاجة في الدنيا ولو على الزيارة يا سيدي هبقى اقولك على المعاد بس تبقى تعمل حسابك على 2 كيلو موز وكيلو تفاح .. ماشي ؟
**************************
whyme

طب ايه رأيك بقى تكون انت البايونيير اللي في عيلتك وتحاول تخليهم يتجمعوا تاني ولو يوم والأفضل يكون في مناسبة عشان محدش يتحجج بالشغل والكلام ده او في أجازة

وهتبقى خدت ثواب فيهم كلهم وتشحنهم حب لغاية الزيارة اللي بعدها

ومادام بتحب انجلينا جولي تبقى تعيش تعيش تعيش
*************************
شريف

الله على الكلمات الجميلة يا شريف

اكيد هاجي طبعاً ده انا حتى عايزة اعرف ايه اللي حصل
***********************
بوسي

يا اهلاً يا اهلاً بحبيبتي الضربشماوية

والله منورة يا بوسي

شكراً على زيارتك ومنوراني بجد وانا سعيدة انك جالك احساس جميل وده اصلاً هدف مشاركتي معاكم بالإحساس ده بالذات عشان عايزة الناس كلها تحس بالفرحة والإحساس الجميل المرافق له

max.adams said...

3 كيلو قشر برتقان يمشي؟؟
أصلي معاييش يكمل أجيب لمونتين

heba said...

ماكس

أي حاجة منك ماشي يا ماكس بس بعد ما تخف عشان متعديش الناس