ضربة شمسي

على استحياء

2010-03-29T10:04:00.002+02:00

أعود إلى مدونتي على استحياء .. عشر شهور .. أحجم عن الكتابة .. أتفقدها .. أسترجع ذكرياتي معها .. أقرأ بعض ما كتبت .. أعجب لنفسي كثيراً .. من أين أتيت بهذه التدوينات الجميلة .. كيف كنت أفكر .. أنا الآن لست كما كنت .. هل تغيرت للأسوأ .. أعجب بما أقرأ .. لو كانت مدونة أخرى لأعجبت بصاحبها على الفور .. ولكني لا أستطيع أن أكتب سطراً الآن .. أقرأ تعليقات أصدقاء الكتابة .. أشعر بهم وقد نسوا اسمي ونسوا مدونتي من طول الابتعاد عنها .. بل من طول ابتعادي عنها .. وتمضي السنين .. ولا يزال الطنين فى أذني .. تناديني .. لا تتركيني

وحشتيني يا مدونتي

2009-05-31T18:09:00.004+02:00

من أغسطس 2007 لمايو 2009 ولو انه اخر يوم في مايو بس كتير كتير اوي .. يا صبر أيوب

وحشتيني يا مدونتي

وحشتني قعدتك وحشتني قراية مواضيع المدونين وحشتني الفضفضة والكلام هنا
قعدت اقرأ التدوينات السابقة لي وتعليقات اصحابي المدونين وردودي عليهم حسيت اني كنت بني ادماية مختلفة عن البني ادماية اللي بتقرا دلوقتي زمان كنت بحس بمتعة وانا بكتب تدوينات وانا بقرأ تعليقات لكن دلوقتي اللي خلاني اجي واكتب فيها .. الحنين .. بسترجع الإحساس الحلو .. بحاول اتلمس طريقي وعارفة اني استاهل عتاب وملامة اصحابي اللي هجرتهم وانسحبت وسبتهم

انا مش بكتب دلوقتي عشان ارجع تاني اكتب زي الأول .. لأ .. انا بس بكتب عشان حسيت اد ايه محتاجة لمدونتي .. محتاجة اشم نفسي تاني واحس بشوية حرية
مش قادرة اوعد نفسي اني هتابع .. بس الأمل في الله كبير

يوماتي بدوّن

2007-08-27T22:36:00.000+02:00

كنت حاسة أول ما عملت المدونة اني لما أعوز أكتب حاجة هكتبها بغض النظر عن مين اللي هيقراها أو هيعرفها وبعدين لما دخلت المدونات التانية ولقيتهم تقريباً بيكتبوا كل يوم أو كل أسبوع حسيت زي ما يكون أنا في سباق ولازم أكتب جديد .. حسيت بقى انها معادتش مدونتي .. لأ .. بقت زي مجلة ولازم أطلع عدد يومي أو عدد أسبوعي .. وبتيجي فترات مبلاقيش فيها لا اللي أكلمه ولا اللي أكتبه .. بتبقى فرحة كبيرة وأنا بترجم إحساساتي وخواطري وأي حاجة بتدور في دماغي للورقة والقلم ودلوقت للمدونة ولوحة المفاتيح

فكرت اني ممكن طالما مفيش بوستات جديدة أقضيها فسح عند أصحابي المدونين يعني هبقى مدوِّنة بلا مدوَّنة .. حلوة دي

وبعد تفكير وتمحيص في حالتي وصلت للمهم ألا وهو إني لقيتني دخلت في عالم المدونات مش عشان هدف محدد عايزة أوصله بالتدوين .. لأ خالص لقيتني دخلته علشان مجرد بس أتعرف على العالم الجديد ده لأنه شدني من كتر ما سمعت وقريت عنه وبعد ما فترة التعارف خلصت عجبتني الحكاية واشتغلت فترة كده ورا بعض .. وبعد كده .. هسسس .. لقيتني بعدت خالص وفين وفين كده على ما بكتب بوست جديد أو أدخل عند حد من أصحابي المدونين .. اضايقت اوي بس فكرت ليه بوستاتي فاترة كده وبتطلع في فترات متباعدة ؟؟؟

وفي الآخر عرفت السبب الحقيقي ورا التباطؤ ده وهو إني معنديش هدف محدد للمدونة ، يعني انا دلوقت مش عارفة بدون ليه وعشان ايه وهستفيد ايه وشكلي كده هرجع تاني للمذكرات اللي كتبتها من سنين .. في نوتة زرقا لون بحور الحنين .. ولما عترت فيها رميتها في المهملات .. وقلت صحيح أما صحيح كلام مخبولين

وعجبي !

دماغه ودماغها وفي الاخر شوية هرش

2007-08-07T11:15:00.000+02:00

البوست اللي قبل اللي فات اتكلمت فيه عن اختلاف رد فعل كلاً من البنات والشباب في المواقف المحرجة خاصة مع بعض ودورت شوية كده لعلي أعثر على أي سبب علمي مقنع لقيت انه أصلاً دماغي الذكر والأنثى يختلفان إلى حد ما في البنيان والنشاط وكمان من الناحية التشريحية وجدوا ان أدمغة الإناث أصغر حجماً من أدمغة الذكور ووجدوا اختلافات أخرى بنيوية وكيميائية ووظيفية وقالوا كمان - العلماء طبعاً اللي اكتشفوا الحاجات دي - انه لازم أثناء البحث عن العلاج وأسباب الأمراض ياخدوا الاختلافات دي في الاعتبارعشان علاج الأنثى يختلف عن علاج الذكر وبالتالي يوصلوا لنتائج أفضل إن شاء الله

الكلام ده كوووله جاب لي فكرة تانية هي ملهاش علاقة المرة دي بالإناث والذكور والأمراض والعلاج

له علاقة بإني عمالة افكر في اسباب منطقية وعلمية للحاجات العادية اللي بتحصل حوالينا من غير حتى ما نفكر هي بتحصل ليه بالطريقة دي من شدة طبيعيتها وان ده الشيء الافتراضي اللي بيحصل

رغي كتير وكلام كتير بس صدقوني هوصل للمفيد في السطر الجاي

ليه بقى - ويفضل أسباب علمية - لما الواحد بيحس انه عنده ارتيكاريا في أي حتة في جسمه بيبقى هيموت ويهرش فيها خاصة خاصة لو مش طايلها بيبقى هيتجنننننن بكل ما تحمله الكلمة من معنى

وحاجة كمان ليه أول ما الواحد بيهرش في الحتة اللي مجنناه دي بيهدا علطول ويحس براحة جمييييييييييييييلة

مش عارفة دماغي دي هتوديني لغاية فين

تاجين أهم .. لأ دول طلعوا تلاتة

2007-07-29T00:47:00.001+02:00

يااااااه تاجين مرة واحدة ما قلنا تلاتة
أنا مجاليش تاج من زمان اوي لدرجة اني قلت خلاص فرجت ونسيوني في التاجات لغاية ما لقيت حدوتة بعتالي تاج و محمود بيمررلي تاج الصراحة أسقط في يدي وبعدين قلت يا شيخة التاجات دي معمولة عشان تقرب الناس من بعضها عشان نعرف معلومات أكتر عن بعض وكده ودي مش اول مرة
توكلت على الله
بالنسبة للتاج اللي حدوتة حبيبتي ممراه انا كنت جاوبت عليه في اللينكات دي
الأولاني
http://darbetshamsy.blogspot.com/2007/03/blog-post_17.html
التاني
http://darbetshamsy.blogspot.com/2007/02/blog-post_08.html
بالنسبة بقى لتاج محمود فده اول مرة يجيلي وهو كالتالي
واحد : مين أكتر 6 أشخاص بتحبهم ؟
بابا وماما كده رقم واحد - اخواتي الاتنين كده رقم اتنين - قرايبيني كلهم كده رقم تلاتة - صحابي كلهم كده رقم أربعة
ملكوش دعوة بقى بالباقي
اتنين : هل أنت سعيد (وفي حالتي دي هل أنتي سعيدة) ؟
السعادة دي حاجة نسبية خالص يعني مرة أحس اني سعيدة جداً وطايرة من الفرحة والأرض دي كووووولها مش سايعاني ومرة أحس اني في قمة الاكتئاب لدرجة انه لو اتوزع على جمهورية مصر العربية هيكفي ويفيض للجيران
فعموماً الحمد لله
تلاتة : لو اجتمعت مع حسني مبارك في مكان واحد هتقول له ايه ؟
ده سؤال جريء اوي .. هجاوب عليه ازاي ده
وانا ايه اللي هيجيبني اصلاً في اودة واحدة مع سيادة جناب السفير قصدي الرئيس
لا يا عم العمر مش بعزقة .. مش عايزة اشوفه حتى
أربعة : لو معاك مليون ونص هتعمل بيهم ايه ؟
يااااااااه ده انا هعمل عمايل واسوي الهوايل
انا فكرت كتير لو فعلاً جاتلي فلوس كتير كده هعمل ايه لقيت ان اول حاجة بفكر فيها اني اجيب الحاجات اللي حبايبي محتاجينها .. أياً كانت بقى
يعني لو ماما نفسها في اي حاجة اجيبهالها هوا ولو بابا عايز اي حاجة لو اخوي او اختي نفسهم في حاجة علطول هبعزق القرشين اللي معاي عليهم .. بعد كده اوسع الدايرة شوية على قرايبي وبعدين صحابي
ومش هنساني طبعاً ده أنا صاحبة الليلة كلها اكيد هعمل كل الحاجات اللي نفسي فيها والفلوس اللي معجزاني
بس الصراحة عايزة اقول حاجة مهمة اوي ألا وهي ان الفلوس لو جت سهلة هتروح سهلة على رأي المثل الإنجليزي
easy come .. easy go
فلازم الواحد يتعب عشان يحس
خمسة : أنت مسلم ؟
لأ
مسلمة
ستة : ليه ؟
ده سؤال بقى بالذمة
يعني ده لو مكانش بالميلاد والبيئة والتربية هيبقى اقتناع وايمان وحب
متشوفو اسئلة تانية احسن
سبعة : مين أكتر شخصية متقدرش تستغنى عنها ؟
أكيد ماما طبعاً
أصل انا لسه متفطمتش
تمنية : إيه أكتر موقف محرج ؟
يااااااه وليه بس الإحراج ده
اهو ده بقى هو أكتر موقف محرج اني اقول أكتر موقف محرج قدام الناس كده
لا يا عم إذا بليتم فاستتروا
تسعة : الأمنية اللي تتمنى تحقيقها
هيه حاجات كتير مش معقول اختصرها في أمنية واحدة
بس اقدر اقول يارب
يارب اشوف حال بلدنا اتصلح وبالتالي حال الناس كلها هينصلح واحنا كمان
وكل ما الأحوال كانت حلوة كل ما الإنسان هيبقى سعيد وبالتالي كلنا نعيش في هنا وفرح
همرر التاج ده بقى لميييين ؟
حدوتة عشان تتعود بقى ع التاجات وكده
بوسي حمد الله ع السلامة يا بوسي
واحد بس حاول بقى تزبطه المرة دي
ماكس ضروري تجاوب يا ماكس
وفي ناس تانية كتير لو قولتهم الحبر هيخلص

حد يعرف ليه ؟

2007-07-19T00:47:00.000+02:00

لما البنت بتتحط في موقف محرج قدام ولد او معجبة بيه وبيكلمها مثلاً تحس علطول ان الدنيا برد وصوابعها متلجة

عكس الولد تماماً لما بيتحط في نفس الموقف بيحس ان الدنيا حر وعمال يصبصب عرق من كل حتة

ليه الفرق في المناخ عند الاتنين اكيد في سبب علمي طبي فيزيائي فسيولوجي

حد عنده فكرة ؟

خلاص .. فلسنا

2007-06-30T00:33:00.001+02:00

للأسف الشديد يا جماعة حالة الحب اللي في البوست اللي فات اتبخرت في الحر بتاع اليومين دول خصوصاً لما مريت بالموقف العصيب التالي

كنت رايحة اصور ورق وفي الطريق عدى جنبي 2 شباب واحد فيهم كان بيتكلم بصوت عالي ومتنرفز اوي وبيقول لصاحبه

خلاص يا بني .. قفلت في وشي من كل ناحية .. معدتش عارف اجيب فلوس .. اجيب منين

ساعتها قلت لنفسي ومين سمعك .. واحنا زيك كتير
كتير قوي

حالة حب

2007-06-17T01:01:00.000+02:00

أنا حاسة بحب كبير اوي .. لكل حاجة ولكل الناس .. يعني من الآخر أنا عايشة حالة حب جميلة أوي مش هقولكو اني بحب شخص معين أو الحب اللي في دماغكو .. لأ .. خالص .. أنا حاسة اني في حالة حب للحياة ولكل حاجة حوالي .. طب خير يعني .. وده من ايه إن شاء الله اصل نادر لما حد تجيله الحالة الجامدة دي من الصفاء الروحي والمعنوي والذهني والذاتي وهلم جرا
هقولكو .. ده بسبب العلاقات الإنسانية الكويسة اللي ما بين الناس وبعضها لأن بصراحة بعد ما كل حاجة تفنى مبيتفضلش غير الكلمة الحلوة والابتسامة الحلوة والإحساس الصادق اللي بيطل من القلب في العين مباشرة .. أقصد ايه ؟
كنت امبارح عند عمتي ، مكنتش شفتها من زمان قوي ولا كنت شفت ولاد عمتي ولا بناتها ولا ولادهم –أحفاد عمتي- وكانت زيارة جميلة قوي حسيت فيها اني في بيتي واني مش غريبة في وسطيهم وبصراحة الإحساس بالألفة للمكان وللناس وكده صعب الواحد يحسه اليومين دول في اي مكان ولا مع اي حد والكلام والرغي خدنا أكتر من ساعتين ومحسيناش بالوقت خالص خالص

cathching up

المهم وانا مروحة كنت حاسة ان الدنيا دي كلها حلوة وان مفيش احلى من القرابة و الصداقة والزيارات الحلوة دي .. بجد حسيت اني طايرة من الفرحة .. حسيت اني ..

في حالــــــة حـــــــب

طب وايه النتيجة .. يعني ايه اللي بيحصل لما الواحد يحس انه في حالة حب .. بصراحة شديدة بيحس ان كل شيء جميل في عنيه وحواليه وكل الناس حلوين ومفيش مشاكل .. يعني من الاخر بيحس ان كل حاجة بمبي والدنيا ربيع والجو بديع وده بينعكس على اللي حواليه بمعنى انه بيبقى عايز البني ادمين اللي معاه يكونوا فرحانين هم كمان ولو يقدر يعملهم اي حاجة عشان يحلقوا معاه في السما كده بيعملها وبيعملها من غير ما يحس بتقل ولا حاجة بالعكس بيعملها بحب خالص

ياترى بقالكو اد ايه مشفتوش حد من قرايبكو ولا قعدتو معاهم قعدة صفا ولا حد من صحابكو اللي مشفتهومش من زمان انا عارفة ان الوقت مشكلتنا كلنا بس ممكن نستعيض عن الموضوع ده بالتليفون ولو بس دقيقتين تسمعوا صوتهم تاني .. جايز تكون آخر مرة الله أعلم

انا بس بقولكو كده علشان الإحساس ده جميل اوي بيخرجنا من هم الحياة اللي احنا علطوووول مدفونين فيه والأهم بقى انه يستمر معانا ولو ليوم اصل الدنيا دي مش بترحم ومش هتهنينا عليه فهنضطر نسرق اللحظات الحلوة دي في غفلة من الزمن

الحصان الحكيم

2007-05-30T14:22:00.000+02:00

بقالي فترة عمالة أقرأ في موضوعات عن الموارد البشرية وبصراحة الموضوع عجبني يعني يكلمك مرة عن ازاي تزود الثقة بالنفس وازاي تفجر الطاقات الكامنة جواك وازاي تتعامل مع الآخرين عن طريق البرمجة اللغوية العصبية وهكذا وأثناء قرايتي لقيت موضوع عجبني اوي حبيت اشاركه معاكم

هي زي حكاية كده

وقع حصان أحد المزارعين في بئر مياه عميقة ولكنها جافة ، وأجهش الحيوان بالبكاء الشديد من الألم من أثر السقوط واستمر هكذا لعدة ساعات كان المزارع خلالها يبحث الموقف ويفكر كيف سيستعيد الحصان ؟

ولم يستغرق الأمر طويلاً كي يقنع نفسه بأن الحصان قد أصبح عجوزاً وأن تكلفة استخراجه تقترب من تكلفة شراء حصان آخر ، هذا إلى جانب أن البئر جافة منذ زمن طويل وتحتاج إلى ردمها بأي شكل . وهكذا ، نادى المزارع جيرانه وطلب منهم مساعدته في ردم البئر كي يحل مشكلتين في آن واحد ، التخلص من البئر الجاف ودفن الحصان

وبدأ الجميع بالمعاول والجواريف في جمع الأتربة والنفايات وإلقائها في البئر . في بادئ الأمر ، أدرك الحصان حقيقة ما يجري حيث أخذ في الصهيل بصوت عال يملؤه الألم وطلب النجدة . وبعد قليل من الوقت اندهش الجميع لانقطاع صوت الحصان فجأة

وبعد عدد قليل من الجواريف ، نظر المزارع إلى داخل البئر وقد صعق لما رآه ، فقد وجد الحصان مشغولاً بهز ظهره !!!!!! كلما سقطت عليه الأتربة فيرميها بدوره على الأرض ويرتفع هو بمقدار خطوة واحدة لأعلى

وهكذا استمر الحال ، الكل يلقي الأوساخ إلى داخل البئر فتقع على ظهر الحصان فيهز ظهره فتسقط على الأرض حيث يرتفع خطوة بخطوة إلى أعلى . وبعد الفترة اللازمة لملء البئر ، اقترب الحصان من سطح الأرض حيث قفز قفزة بسيطة وصل بها إلى سطح الأرض بسلام

وبالمثـــل

تلقي الحياة بأوجاعها وأثقالها عليك، فلكي تكون حصيفاً عليك بمثل ما فعل الحصان حتى تتغلب عليها ، فكل مشكلة تقابلنا هي بمثابة عقبة وحجر عثرة في طريق حياتنا ، فلا تقلق ، لقد تعلمت تواً كيف تنجو من أعماق آبار المشاكل بأن تنفض هذه المشاكل عن ظهرك وترتفع بذلك خطوة واحدة لأعلى .

يعني من الآخر ممكن نلخص الموضوع كله في كذا نقطة

اجعل قلبك خالياً من الهموم

اجعل عقلك خالياً من القلق

عش حياتك ببساطة

أكثر من العطاء وتوقع المصاعب

توقع أن تأخذ القليل

توكل على الله واطمئن لعدالته

كلمة أخيرة

كلما حاولت أن تنسى همومك ، فهي لن تنساك وسوف تواصل إلقاء نفسها فوق ظهرك ، ولكنك دوماً تستطيع أن تقفز عليها لتجعلها مقوية لك ، وموجهة لك إلى دروب نجاحك

مش كده ولا إييييييييه ؟؟؟؟؟؟

في حاجة غلط

2007-05-21T23:14:00.000+02:00

البوست بتاع التاج ده شكله مهيس وقافل الكومنتس بمزاجه

حل المشكلة دي جاري على قدم وساق

سلام

هييه هييه .. برينسس حلتهالي .. برينسس حلتهالي

شكراً يا برينسس

تصوري فعلاً بيلفتوا نظرنا للاختيارات دي

تاج نفساوي شوية

2007-05-20T01:46:00.000+02:00

التاج ده كانت برينسس هي اللي باعتاهولي من زمان وانا قولتلها بلاش يا برينسس أصله داخل في النفسانيات شوية وانا بخاف ادخل الحتت دي وبعدين لقيت شادي بيقولي انه بعتلي تاج ودخلت لقيته نفس تاج برينسس .. قلت مبدهاش بقى هي عيشة ولا موتة ولا فوتة ف حارة سد

الأوله بسم الله

أحب شخص لقلبك فى الدنيا؟

أمي وبعدين أي حد تاني طبعاً بابا واخواتي لأن أمي هي الوحيدة اللي مقدرش أعيش من غيرها يعني لسه متفطمتش لحد دلوقت

إنسان مستعد تضحي بحياتك –ركز فى كلمة حياتك- عشانه؟

أمي برده ياجماعة .. طبيعي يعني أحب شخص لقلبي في الدنيا هو اللي انا هضحي بحياتي عشانه

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

ياااااااااه كل ده غل .. يا ساتر يا رب .. لا يا عم مفيش حد بكرهه أوي كده ولو في همسك سكينة وانقض عليه واغرزها في قلبه واقتله واقف ابص لجثته واشفي غليل قلبي هههههههههههه

اسم أجمل كتاب كتبه بشر قرأته ومحتفظ به حتى الان؟

بص هم كتيييييييير بس مبدئياً أي حاجة انجليزي

اسم كتاب-كتبه بشر برضة- انت متعلق بيه وبتقرأه كل فترة؟

أنا الصراحة بذاكر إيطالي دلوقت عشان كده هو ده الكتاب الوحيد اللي انا بقراه كل فترة

أهم جهاز منزلى انت متعلق بيه او بتستخدمه كتير؟

الكمبيوتر طبعاً ده انا لو اطول اقعد 24/7 كنت قعدت ولما يبقى معاي فلوس هشتري كمبيوتر محمول بإذن الله

شىء تحس بالراحة النفسية عندما تنظر اليه؟

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

مكان تحس بالراحة عندما تدخله؟

الحمام مثلاً .. لأ .. لأ .. بيتنا لأني بحبه أوي وفي أي مكان لي فيه ذكرى حلوة بحب أدخله وبحس بالراحة جداااااا

أجمل مدينة زرتها داخل مصر؟

مرسى مطروح بلا منازع

أجمل مكان طبيعي رأيته داخل مصر؟

أي حتة في مرسى مطروح وخاصة البحر في أي شاطئ وياسلام لو واقفة في بلكونة بتطل مباشرة على البحر والرؤية جايبة المنظر كله

شخصية كارتونية بتحبها؟

ليون كنج - الأسد الملك - كل الشخصيات اللي فيها بحبها خاصة البنت كيارا والولد كوفو

نوع هاتفك المحمول؟

مبشيلش الممنوعات دي يا فندم بس إن شاء الله ناوية أشيل

Samsung X-200

سرعة بروسيسور جهازك؟

240GH - 512 MB of Ram

حجم ذاكرة –هارد- جهازك؟

120GB

المساحة التى تشغلها المواد الاسلامية على جهازك؟

مش عارفة بالتحديد عشان هي متنطورة بين أنحاء الجهاز شوية على الدرايف ده وشوية على الدرايف ده وكده بس أوكى .. الرسالة وصلت

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

اممممم خلاص جاوبت

أهم هدف انت واضعه لحياتك حتى الآن ؟

إني ألاقي هدف واضح لحياتي

وأحب نفسي أكتر من كده

مواصفات فتاة –أو فتى للبنات- الأحلام بالنسبة لك؟

إنه يكون حنين وذكي ويحبني ويحترم آرائي وشخصيتي

دمه خفيف ومتفائل ودماغه عالية ميحبش النكد والكآبة

وطبعاً كل ده مش هييجي إلا إذا كان بيحب ربنا وبيواظب على الطاعات وأخلاقه حميدة

صف ما يأتى

شعورك لما بتسمع كلمة مصر؟

بتحسر على ما كانت عليه وبخاف مما ستكون

شعورك لما بتسمع كلام عن اليهود؟

بحس بالخيانة والغدر والسماجة والبرود والعين البجحة وهم دول اللي تنطبق عليهم شروط الكراهية السابقة

شعورك لما بتشوف ظابط شرطة؟

بتخنق .. بفتكر علطول النهب والسرقة والفساد اللي في البلد والنجوم والنسور والدبابير نايمة في عششها

شعورك لما بتشوف الكناس العجوز فى الطريق؟

بقول سبحان الله وبرثي لحاله وبقول ياريت الوظيفة دي الناس تبصلها زي أي وظيفة مش عشان هو كناس يبقى من منزلة منخفضة وهكذا بس برجع في الآخر أحمد ربنا وأبوس إيدي وش وضهر على النعم اللي أنا فيها

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

أنا كنت في الأول بخاف وكنت بفتكره إخوان .. يمكن دلوقت في خوف بس قل كتير عن الأول لأني قريت وعرفت الإخوان يبقوا إيه بالنسبة للحكومة وبالنسبة للدول العظمى بس لسه في ناس بتسيء للدين وتستخدمه لتحقيق أغراضها الشخصية ودول اللي بيسيئوا للباقيين للأسف .. زي المنقبة اللي لما بتعمل حاجة غلط الناس بتقول ده كل المنقبات كده

احساس يراودك فى اشارة مرور مغلقة بسبب مسئول كبير؟

برده بتخنق وبضايق وأقول يارب ييجي عليه يوم ويقف في الإشارة زينا عشان يعرف ان الله حق

و بعد ما خلصنا التاج جه وقت التمرير

بس المشكلة ان في ناس جاوبت على التاج قبل كده وناس لأ

عشان كده انا مش عارفة اللي انا همررهولهم جاوبوه قبل كده ولا لأ

بس من عندي كده همرره لـ ماكس الفنكوش عشان هو الوحيد اللي مخدش تاجات لغاية دلوقتي

وعموماً اللي تعجبه الأسئلة يعتبرها مني ليه

مش كده أحسن ولا إييييييييه ؟

الروتين .. ابن ستين في سبعين

2007-05-08T23:37:00.000+02:00

النهاردة حصلي موقف زي النيلة بسبب الروتين (...) بجد كان هيعملي مشكلة جامدة

انا مدرسة في معهد أزهري وجالي انتداب تصحيح يومين في معهد تاني .. المفروض اني اروح .. لكن الشيخة لا يمكن .. واستحالة تطلعني إلا بجواب رسمي

طب يا ستي هروح انا واجيبه .. لأ

طب أصلاً أنا لازم اروح الانتداب .. لأ

هيتعمل في مذكرة .. برده لأ

أكتشف فيما بعد ان شيخ المعهد اللي انا منتدبة له بيكلمها ويقولها في أبلة عندك منتدبة عندنا للتصحيح وتقوله انها جاية .. ويفضلوا قاعدين مستنيين اللي تيجي ومجتش

في اخر اليوم بقى لما روحت البيت لقيت صاحبتي اللي هي منتدبة لنفس المعهد بس هي في معهد تاني بتكلمني في التليفون وبتقولي ان هم فضلوا مستنييني كتير على أساس اني جاية - ده على كلام الشيخة اللي عندي - ومروحتش وانا واقفة قدامها تقولي ملكيش دعوة بالكلام ده كله .. انا مش هطلعك إلا بجواب رسمي

وبين هذا وذاك أنا اللي هضيع في النص .. لأني لو مروحتش المعهد التاني هيكتبوا في مذكرة واتحول للتحقيق وتحصلي مشاكل .. ولو مشيت من معهدي وضربت بكلام الشيخة عرض الحائط هتاخد غياب ويتخصم مني وتكتب في تقرير وحش .. وكده أو كده أنا اللي خسرانة في الأخر .. لأ واللي زاد وغطى اني متعاقدة .. يعني أي مشكلة أنا اللي هتفشكل علطول

عمركو شفتو كده

أما بلد ورق صحيح على رأي كوكو الكميل

والروتين ده هو سبب التخلف اللي احنا عايشين فيه .. لأ وفي أسوأ من كده كمان .. ده ممكن الموقف ده ميعتبرش حاجة جنب اللي الموظفين التانيين بيعملوه

طول ما هنفضل كده .. طول ما هنفضل عالم تالت ورابع وخمستاشر ونص وحتة

ده حاجة وحشة أوي يا جدع

تحيـــــا مصر

2007-05-06T23:42:00.000+02:00

في بعض المصطلحات اللي بنرددها فقدت معناها الحقيقي اللي المفروض تدل عليه .. واتحولت إلى مصطلحات أكثر دقة لتنم عن الحالة اللي احنا وصلنا ليها

من ضمن المصطلحات دي

مصر المهروسة

وسائل الإعتام

الترقيعات الدستورية

ولو في عندكو أي مصطلحات من هذا القبيل من اللي اتغيرت دي عشان تكون أكثر صدقاً وواقعية قولولي عليها عشان أنشرها هنا في البوست

ومعاك واحد شيشة وصلحوووووو

2007-04-28T15:55:00.000+02:00

أنا عايزة أشرب شيشة أنا كمان

اشمعنى هو

مليش دعوة

بصو بقى .. بما إن المدونة دي بتاعتي مش بتاعة حد تاني يعني اقدر اقول رايي بحرية شديدة جداً - أو كما يهيأ لي - من غير ما حد يحجر علي أو حتى يحكم على آرائي بس في نفس الوقت أنا برغي معاكو وبقول

أنا عايزة أشرب شيشة انا كمان

ليه الولاد بيسمحوا لنفسهم انهم يشربوا شيشة براحتهم في القهاوي ولما تيجي لغاية البنات ينقدوا شكلهم وتصرفاتهم ويحكموا عليهم انهم بنات مش كويسين ؟؟؟؟

ممكن الكلام ده يبقى مش غريب على الناس القاهريين أو اللي عايشين في المدن الكبيرة لأنهم اتعودوا خلاص على شكل البنات وهم بيزاحموا الولاد في القهاوي بس أنا بتكلم من وجهة نظر محافظة ريفية

احنا لسه عندنا الموضوع ده غير مسموح الكلام فيه أصلاً فما بالكو بإنهم يشوفوا منظر زي ده بس تعالوا نتكلم شوية بالعقل

الشيشة أكيد حكمها هو نفس حكم السجاير بالنسبة للدين .. طب مش الدين والأحكام دي بتتطبق على الولاد زي على البنات بالضبط

الدين بالذات مفيهوش ده راجل ودي ست

طب حاجة كمان مش الجميع بيتفقوا على إن التدخين ضار بالصحة يعني السجاير والشيشة ضارين جداً بالصحة ؟

طب مش الصحة دي موجودة في كل البني آدمين رجالاً ونساءً ، شباباً وفتيات ؟

ليه زي ما هم خايفين على صحة البنات مش بيخافوا على صحة الولاد كمان ؟

بس اللي أنا لاحظته ان المدخنين هم أكتر ناس عارفة ان التدخين مضر والمدخن هو أكتر واحد ميطيقش حد يقوله بطل سجاير .. ليه معرفش

أنا سمعت مرة واحد بيقول : الشيشة دي يا جماعة حاجة رجالي كده .. ازاي البنات عايزة تشربها زينا .. هو ينفع ولد يمشي في الشارع حاطط روج !!!!!!!!!!!!!!!؟؟؟؟؟؟؟؟؟؟؟؟؟؟؟؟؟

القضية دي هتفضل طول عمرها مفتوحة بس برده أرجع واقول

أنا عايزة اشرب شيشة انا كماااااااااااااااااااان

تاج جميييييل

2007-04-21T11:21:00.000+02:00

التاج ده جالي من
شيمـــــاء
وإبراهـــيم

وبصراحة أكتر حاجة عجبتني انه بعيد عن النفساويات والجوانيات والكلام ده
بس كنت هجاوب افتكاسات من عندي وبعدين لقيت شيماء حاطة لينكات لمواقع اختبار وهو اللي يطلع أنا مين في دول على حسب إجاباتي

والنتيجة كانت كالتالي

انت شبه مين من القادة ؟
عن نفسي مكنتش هقول شبه حد لأني معرفش في الشخصيات قوي بس بعد ما عملت الاختبار كانت مفاجأة مذهلة
وغير متوقعة تماماً تفتكروا ميييييييييييييييين ؟؟؟؟؟؟؟؟؟؟؟؟؟؟؟؟؟؟

What Famous Leader Are You?
personality tests by similarminds.com

اوعى حد يفهم "هتلر" غلط .. الراجل مكانش وحش ولا حاجة .. الناس اللي فاهماه غلط

انت شبه مين من friends ?
أنا كنت عملت الاختبار ده قبل كده وطلعت شبه "مونيكا" مع اني مش
obsessive
زيها بس النتيجة طلعت كده بقى

ايه أكتر فيلم كلاسيكي بيعبر عنك ؟
كنت هقول فيلم
Gone with the wind
لأني بحبه جداً جداً وبعدين لقيت السؤال انت شبه مين فقلت استحالة اني ابقى شبه "سكارلت أوهار"ا نهاااااااائي رغم اني حبيت "كابتن ريت بتلر" موووووووت

بس حقيقي أكتر فيلم كلاسيكي بيعبر عني هو فيلم
Breakfast at Tiffany's

أما بقى لما عملت الاختبار طلعت شبه فيلم ما سمعتش عنه قبل كده وهو

Mr. Smith goes to Washington

the plot of the movie :

A naive man is appointed to fill a vacancy in the US Senate. His plans promptly collide with political corruption, but he doesn't back down.

مش بطال خالص

What Classic Movie Are You?
personality tests by similarminds.com

تحب تمرمر التاج دوكها لمين ؟
برينسس
كوكو الكميل
شيكو
لمياء
شادي
شاب فقري
أباصيري

وأي حد تاني من أصحابي الحلوين عايز يجاوب عن التاج يقدر بكل حرية يجاوب عنه

كرامة ولا ؟؟؟؟؟؟؟؟؟

2007-04-15T15:00:00.000+02:00

النهاردة وانا ماشية في الشارع كان في ستتين ( 2 ستات يعني ) وبنت ( تقريباً في ثانوي ) واقفين جنب عربية كده أو ساندين عليها ، أنا مخدتش في بالي .. عادي يعني ناس واقفة .. وفجأة

هوووب ولقيت واحدة ست من الاتنين وقعت ع الأرض بحالها كلها يعني مش نص واقعة .. لأ نامت ع الأرض بحالها وسمعتها بتقول للست التانية ( وانا معدية من جنبهم ) - أوطي على رجلك أبوسها - وبعيااااط

أنا ذهلت !!!!!!!!!!!!!!!؟؟؟؟؟؟؟؟؟؟؟؟؟؟؟؟؟

هو في إيه ؟؟؟؟؟؟؟؟؟؟؟؟؟

وراحت معدولة ع الأرض ومربعة ولسه بتعيط وبتقول : أعمل ايه تاني ؟ ألم الناس علي ؟

والست التانية بتقولها : يعني ينفع كده يعني ؟ والبنت بتقولها : خلاص يا ماما

وانا بقى لما لقيت الموقف كده .. رحت واخدة بعضي وجارية .. لأ يعني مشيت بسرعة زيادة حسيت ان هم طبعاً محرجين ان في حد شاف الذل ده وكمان حسيت بالإحراج أكتر لأني شفت موقف زي ده

بس قعدت أفكر .. معقول في أي حاجة في الدنيا تخلي الواحد يعمل كده ؟؟

ياترى ايه المصيبة اللي تخلي واحد يبوس رجل التاني قدام الناس كده في الشارع .. مش عارفة

ربنا يستر وميكتبهاش على حد أبداً

when u want something

2007-04-08T09:21:00.000+02:00

When i don't want something , i don't feel connected to it or like it or even care about it , but once i want something and put it in my mind i become so afraid of loosing it or it won't happen or it will slip away from my hand .

for instance , yesterday i was watching one of the greatest movies ever "Breakfast at Tiffany's" -1961- if you heard of it before .

i heard so much about this movie before i watched it and liked its story alot and when i knew it was on T.V. i left everything and went to watch it , then i felt so afraid that i might not be able to complete it to the end ... or the power might go off ... or dad come and tell me to change the channel ... or a phone call hold me ... or ... or ... or

the point is .. when i wanned to watch the movie all these feers came over me , Oh God i heat this feeling .. it forbids me to enjoy my moment

any way .. for any one watched this movie before he'll know what i mean when i say : WOW , quite a movie . it's fantastic , very touchy and i got deep into it . i felt like "holly" -Audrey Hepburn- most of the time .. at first i thought she is living her life without a purpose .. but nooo she was seeking a comfortable home for her brother "fred" although her means were wrong .

on the other hand she was sooooooooo lucky to have a friend like "Paul" -George Peppard-

Any one could pay half of his life for such friendship and love .. so they can live with each other by the other half

any way, i liked this movie alot and i wanted to share it with you

عايزة أرجعه انجليزي تاني

2007-04-07T11:38:00.000+02:00

لو أي حد يعرف ازاي أرجع السطر اللي بيقول

عرض الوضع الكامل الخاص بي

إلى اللغة الإنجليزية

view my complete profile

تاني يقولي عشان أنا مغيرتهاش ومش عايزة أغيرها

وجزاكم الله خيرا

وفي حاجة كمان : الساعة اللي عندي في البلوج دي

مقدمة ساعة عايزاها تمشي مع بقية البني آدمين

ازااااااااااي ؟

تاج مش فضايح الحمد لله

2007-04-05T01:46:00.000+02:00

i got this tag from shiko then i knew that princess sent it me but there were "7 differences" but i joined both

i was sooo glad when i found out although i get little scared of "tags" cauz it fronts me with me

any way .. here we go

last beverage ?
coffee

last phone call ?
my gramma

last instant message ?
i don't have a cell phone "mabashelsh elmamno3at de"

last cd played ?
pirates of the caribbian : dead man's chest ( LOOOVE IT )

last time u cried ?
last week

have u ever :
Date some one twice ?
nooo . i didn't date once to date twice

Been cheated on ?
no thank God , i hope not to be

Kissed some one ?
no , not yet

Lost some one special ?
Yes, at the ship accident (Salam 98)

Been depressed ?
Yes, 3/4 of my life

Been drunk , throw up ?
Do u mean Wine !!! hell no

favorite color?
white but i change it sometimes and like other colors

Made a new friend ?
yep

Fallen out of love ?
i didn't fall in to fall out

Laughed until u cried ?
yeah , with my close friends .. these moments are the happiest moments in my life

Met someone who changed ur life ?
yep and i hope "this someone" stays in my life though we're not that close

is there something u wanna tell someone ?
yes ( i guess am supposed 2 tell u wht it is , but i won't ) 3'atata ba2a

found out who ur true friends were ?
yes i found that after my last year in collage , it hurt me but it wasn't cheating or something .. no

How many ppl in ur blogger friends u know in ur real life ? (i modified this q)
no one

How many kids do u wanna hv ?
2 or 4 , the main idia is b & g

Do u wanna change ur name ?
my real name ? no , i kind of liked it after all these years " el3eshra mathonsh bardo"
my blogging name ? no .. works for me

Wt did u do 4 ur last birthday ?
actually it wasn't me who did , my best friends did it and gave me presents for the first time in my life , and it was the greatest surprises ever . they made my birthday very special

Wt time u wake up today ?
8.30

Wt were u doing at last midnight ?
deeply sleeeeeeeeeep

Name something u can’t wait 4 ?
meet my match

Last time u saw ur father ?
at lunch

What is one thing u wish to change about ur life ?
my life

What r u listening now ?
dean martin - SWAY

Hv u ever talk to someone behind their back ?
yes i have " asta3'fer allah al3atheem"

Most visited web page ?
my blog , my e-mail , my friend's blogs and Google .. i search alot

تاج من كوكو الكميل

2007-04-01T21:33:00.000+02:00

كوكو الكميل بعتلي التاج ده وبنقوله متشكرين يا كوكو على الكولية والحلاوة والذي منه

هل كنت طالب شاطر في المدرسة؟

ايوة كنت شطورة اوي انظر الصورة أعلاه تتأكده من اللي بتقراه

ايه أكتر مادة حبيتها في المدرسة والكلية ؟

في المدرسة كان الإنجليزي ومازلت إلى الآن

أما في الكلية كانت أي حاجة تخص الكمبيوتر من قريب أو من بعيد

ايه أكتر مادة كرهتها في المدرسة والكلية ؟

أكتر مادة كرهتها في المدرسة الكيمياء الصراحة كانت المعادلات بتعملي وش في نافوخي

أما الكلية فكانت أي مواد ليها علاقة بالدش زي المواد التربوية

كنت عايز تطلع ايه وانت صغنن ؟

بصراحة وانا صغننة مكنتش فاهمة حاجة ولغاية دلوقت لسه مش فاهمة حاجة

إنهم حفنة من الأوغاد

2007-03-23T03:14:00.000+02:00

طبعاً زمانكو خمنتو هم مين الحفنة دول وأوغاد ليه خصوصاً لما تعرفوا إن الموضوع عن التعديلات المجيدة في دستور مصر المهروسة والمبشرة بكل سواد

بس أصلاً أنا مكانش قصدي دول من الأول "محدش يفهمني غلط" أنا كان قصدي الجماعة اللي قطعوا اليافطة اللي كان بابا معلقها على العربية من ورا

كان حاطط يافطة بتقول :

لا لتعديل الدستور

وأول ما يسيب العربية ويمشي ييجي حد (...) يقطعها

بالذمة مش حفنة من الأوغاد !!!!!!!!!!!!!؟؟؟؟؟؟؟ أكيد

ويمسكوه بقى : انت مش خايف ؟ انت مش عندك عيال .. مش خايف عليهم .. مش خايف يقبضوا عليك .. مش خايف كذا .. مش خايف كذا

المهم ان كلمة خايف وخوف عامل مشترك في كل جملة أي حد يقولهاله

يعني لو حد مثلاً اتجرأ وقال .. لأ .. ميسيبهوش في حاله ويبهدلوه لو مكانش بالفعل يبقى بالكلام ويخوفوه

قبل كده لا كنا بناخد لا حق ولا باطل .. أما دلوقت هناخد باطل بس

حسبي الله ونعم الوكيل

ملحوظة

الصورة اللي أنا حاطاها جيباها من مدونة عبد الرحمن واللينك أهو

http://al-ghareeb.blogspot.com/2007/03/blog-post_1866.html

واللي عايز يعرف دراسة معمولة بشكل حلو عن التعديلات وماهيتها وظروفها وكده يروح لمدونة ربة السيف والقلم

http://shamseddeen.blogspot.com/2007/03/blog-post_22.html

كل سنة وانت طيبة يا ماما

2007-03-23T02:58:00.002+02:00

كل سنة وانت دايماً بألف خير وعلطوووووول كويسة وطيبة وزي الفل

يا أحلى أم في الدنيا

بحس اني تايهة من غيرك معرفش اعمل حاجة لوحدي من غيرك

يارب تفضلي معايا دايماً طول ما نا عايشة واقدر اخدمك بعنيّا

انت فعلاً ست الحبايب يا أمي يا أغلى كلمة ممكن تنطقها شفايفي

أي حاجة حلوة بتحصلي بعرف انها بسبب دعاك ربنا يخليكي لي يا أمي

أنا عارفة ان مفيش كلمة تقدر توفيك حقك علي غير اني أدعي ربي

يا رب يسعدك ويمتعك بالصحة والعافية ويدخلك فسيح جناته

يا رب يهديني أنا واخواتي ليك ونفرح قلبك وتبقي راضية عننا علطول يا أمي

ملحوظة

المفروض البوست ده كان هيتبعت في معاده بس منه لله النت بقى كان غضبان ولسه مصالحني دلوقت

تاج جالي من شاب فقري

2007-03-17T21:56:00.000+02:00

التاج ده جالي من شاب فقري وأنا بشكره على ذكره لمدونتي في إجابته

اسم مدونتك ؟

ضربة شمس

لماذا اخترته ؟ ماذا تقصد به ؟
أنا اخترته لأنه بيمثل أحلى صفحة بحب أقراها واتابعها دايماً في جرنان الدستور وهي صفحة ضربة شمس لصاحبها الأب الروحي لكل الضربشمساويين حقيقي " خالد كساب " وبصراحة كده هي ملهاش غير معنى واحد عييييييييييش محدش واخد منها حاجة واعمل كل اللي انت عاوزه طالما صح حتى لو اللي حواليك قالوا عليك مجنون والبس اللي يعجبك مش اللي يعجب الناس واسمع منير وفيروز وأم كلثوم وعبد الحليم واسمع أجنبي ميهمكش اللي قدامك رأيه أيه فيك واقرأ كتاب في المواصلات زي ما نت عايز برده ولا تاخد في بالك الناس اللي عمالة تبحلق فيك وحب بلدك ونفسك والدنيا حواليك وكل حاجة هتبقى حلوة في عينيك حتى الحزن حاربه ملوش مكان عندنا .. هي حياة واحدة يا هنضيعها في الاكتئاب يا إما نستغل كل لحظة فيها

هو ده المستوى اللي أنا نفسي أوصله في الاستمتاع بالحياة إلى أقصى الحدود بس طبعاً بقابل مشاكل وعراقيل كتييييير في تحقيق الحلم ده لأن غصب عن الواحد هيقابل أحزان ومشاكل مش هيقدر يتغلب عليها بسهولة زي سهولة الكلام ولو قاوح وقال .. لأ هيضطر يكركب جوه نفسه ويرسم وش تاني براه والنتيجة الطبيعية .. الاختناق والاكتئاب عشان كده بحاول أوصل لحل وسط .. عشان أقدر أعيش في الدنيا دي

هل فكرت في إغلاق المدونة ؟ والسبب ؟

ساعات كتير كنت بفكر في كده عشان مكنتش بلاقي حاجة جديدة اكتبها وتكون في نفس الوقت تهم الجميع مع ان التدوين أساس فكرته انك تكتب اللي انت بتفكر فيه شخصياً أو اللي ييجي على بالك بس أنا لما كنت بفكر في كتابة حاجات شخصية كنت بخاف ان اللي يقرأ يعرف عني حاجة أو يستنتج شخصيتي .. مش عارفة ليه دايماً بخاف حد يعرفني

صورتك في المدونة ؟ رمزيتها ؟

أنا حاطة صورة الممثلة " أنجلينا جولي " لأني بحب تمثيليها قوي .. بتحسسني بإنها جامدة جداً وتقدر تعمل أي حاجة وفي نفس الوقت محتفظة بأنوثتها والصورة ذات نفسها عجباني لأني ساعات كتير بحس اني مكسوفة كده

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟

أي حاجة أحس انها هتفيد الناس اللي بتقرأ أو بتعبر عن حاجات بفكر فيها وبكده ممكن أكتب في أي مجال

لماذا تدون أصلاً ؟

قبل ما ادون أصلاً قريت مدونات كتير وعجبني اوي حكاية ان كل واحد له مساحة خاصة بيه يكتب فيها بحرية كل اللي هو عايزه من غير ما حد يكون رقيب عليه غير نفسه ومن غير ما حد يقول له هتكتب امتى او عن ايه .. الحرية .. الحرية .. الحرية

وبعدين اتفاجئت لما لقيتهم بيقبضوا على المدونين بسبب كتاباتهم قلت حتى الحرية هنا اتسلبت وراحت وخفت قلت مش هكتب وبعدين رجعت في كلامي وقلت هروبي ده مش من المذهب الضربشمساوي في شيء .. مادام حابة اني أكتب في مدونتي هنا يبقى هكتب اللي أنا عايزاه وهدافع عن حقي ده وحريتي دي حتى آخر نبضة في قلبي وآخرقطرة في دمي

أحلى جملة قيلت في وصف مدونتك ؟

أقل كلمة حلوة بسيطة بعتبرها أجمل جملة يعني كل اللي قالولي مدونتك جميلة بعتبرها أحلى جملة اتقالتلي عن مدونتي

أهمية التعليقات بالنسبة لك ؟

بحس انها المية اللي بتروي العطشان يعني مثلاً لما بكون بعرض حاجة محتارة فيها أو عايزة حد يفكر معاي بلاقي آراء كتير بتساعدني وخصوصاً اني خيالية اوي .. مقصدش خيالية بمعنى رومانسية .. لأ أقصد اني مخي مليان تساؤلات وحيرة وبيقعد يفكر في حاجات غريبة وكتيرة فببقى واثقة اني هلاقي آراء كويسة تفيدني

أحلى بوست كتبته ..ضع اللينك ..ثم اذكر لماذا ؟

http://darbetshamsy.blogspot.com/2007/02/feeling-gtrateful.html

البوست ده بحبه جداً لأني نفسي أي حد حبيته (يدخل فيه أي نوع من أنواع الحب) وأثر في وفي حياتي وشخصيتي تأثير إيجابي يقراه علشان يعرف قد ايه هو أثر في حياتي وكمان عشان المعاني اللي فيه جميلة أوي

أفضل مدونة قرأتها ..يمكن اختيار عدة مدونات ؟

أنا قريت مدونات كتير بس في مدونات حبيتها قوي وحسيت ان أصحابها قريبين مني

برنسس أميرة البلطجية

و كوكو الكميل

ولمياء وأميرة وشيماء ونضال

وشاب فقري ومودي وبني آدم والأباصيري

وشيكو وموني وشادي وإبراهيم

ولو حسن محمود عنده مدونة كنت هقول عليها

واللينكات بتاعتهم كلها عندي في أصووووول

أفضل بوست قرأته ..يمكن اختيار اكتر من لينك ؟

حنين من عند لميا

كوكتيل من عند برنسس

هل خسرت صديق بسبب كتابة هنا؟

لأ خالص بالعكس أنا كل يوم بكتسب صديق جديد وبعتز بالصداقة دي جداً ولا يمكن هخسر صداقة حد بإذن الله

حد قل ادبه فى التعليق ..ايه رد فعلك ؟

محصلش يا باشا ولو حصل بعد الشر بعد الشر يعني هرد عليه على الملأ برده عشان الناس تعرفه

أسوأ مدونة ..الإجابة إجبارية ..يمكن اختيار عدة مدونات ..هما كتير اصلا؟

في مدونات صادفتها لقيتهم كاتبين شتايم سافرة وبذيئة وأبيحة بعتبرها هي دي أسوأ مدونات

أسوأ بوست ؟

اللي كتبه أسوأ مدون في أسوأ مدونة

أسوأ مدون ..مهو هتجاوب هتجاوب ؟

طبيعي يعني هم أصحاب أسوأ مدونات مش عايزة فقاقة يعني

وبالنسبة لتمرير التاج أحب أترك الأمر ده لحرية اختيار من يريد

امتى تغير اختياراتك

2007-03-13T23:25:00.000+02:00

ينفع في يوم تغير اختياراتك علشان شخص معين ؟

يعني أتذكر مثلاً في يوم كنت بشتري طرحة وكان أخوي معاي وكان في طرحتين من نفس الدرجة اللونية اللي أنا عايزاها ومن جواي كنت اخترت خلاص واحدة فيهم بس لما خدت رأي أخوي اختار التانية .. تفتكروا زعلت .. أبداً .. اشترتها علطول وكل ما آجي ألبسها أبقى فرحانة وأقول دا أخوي اللي اخترهالي بغض النظر بقى عن إنها عجباني أو مش عجباني .

تفتكر لو أنا مكنتش بحب أخوي أو أي شخص كان مكانه ساعتها كان ممكن أقبل اختياره ؟ كان ممكن أغير اختياراتي عشانه ؟

يعني هل ممكن حبنا لشخص معين يؤثر على اختياراتنا لدرجة تغييرها ؟ طيب ولو ده صحيح .. امتى أقول stop للتأثير ده ؟ امتى أقدر أقول من جواي للشخص اللي بيأثر في You can't go any further ؟

امتى أسيطر على حبي عشان ميلغيش شخصيتي ووحده وحده هيلغي وجودي تماماً .. الشيء اللي ممكن في حد ذاته يضايق الشخص اللي قدامي ويخليه يقول - إيه اللي ملهاش رأي ولا شخصية دي !!! - وفي نفس الوقت الموضوع ميتحولش لعناد ومضادة في الرأي على طول الخط لمجرد انه محدش يسيطر علي ؟

ولو رفضت في يوم من الأيام اختيار الشخص اللي أنا بحبه عشان أنا مش موافقة عليه يبقى هل ده معناه إن مش بحبه ؟

I wanna grow old with you

2007-03-10T13:09:00.001+02:00

I Wanna Grow Old With You

Another day... without your smile

Another day... just passes by

But now I know... how much it means

For you to stay... right here with me

The time we spent apart will make our love grow stronger

But it hurt so bad I can't take it any longer

I wanna grow old with you

I wanna die lying in your arms

I wanna grow old with you

I wanna be looking in your eyes

I wanna be there for you

Sharing everything you do

I wanna grow old with you

thousand miles ... between us now

It causes me ... to wonder how

Our love tonight ... remains so strong

It makes our risk ... right all along

The time we spent apart will make our love grow stronger

But it hurt so bad I can't take it any longer

I wanna grow old with you

I wanna die lying in your arms

I wanna grow old with you

I wanna be looking in your eyes

I wanna be there for you

Sharing everything you do

I wanna grow old with you

Things can come and go I know but

Baby ... I believe

Something's burning strong between us

Makes it clear to me

I wanna grow old with you

I wanna die lying in your arms

I wanna grow old with you

I wanna be looking in your eyes

I wanna be there for you

Sharing everything you do

I wanna grow old with you

listen beyond ur ears

تفتكروا تفرق ؟

2007-03-05T01:41:00.000+02:00

هو : بس بس بس بسسسسسسسسس ... انت يا بنتي !!!!!!!!!! ؟

هي : مين ؟ بسكوت !!!!!! ازيك يا بسكوت

هو : الحمد لله .. ازيك انت يا بسبوسة ؟ ساعة عمال ابسبسلك وانت مش بتردي

هي : انا قلتلك مليون مرة قبل كده انا مبردش عالبسبسة ، عايز تندهلي في الشارع اندهلي باسم بندق اخوي

هو : خلاص ، محصلش حاجة .. ازيك انتي ؟

هي : أنا الحمد لله كويسة .. إنما أنهي نسمة حلوة جابتك عندنا .. حتتنا منورة والله

هو : أبداً كنت جاي اقضي مصلحة وشفتك معدية قلت اسلم

هي : والمصلحة خلصت على خير ؟

هو : آه الحمد لله ، كله تمام

هي : وانت بقى عامل ايه ؟

هو : الحمد لله .

فتــــرة صمــــــــت

هي : ايه ده هو انا طويلة كده ليه ؟ انا حاسة اني اطول منك .. يا دي الكسوف

هو : ميهمش مش مشكلة .. بسبوسة : فكرت في الموضوع اللي قلتلك عليه ؟

هي : مانا قلتلك مش هينفع .. أنا أكبر منك بـشهر أو ... (متروكة لخيالكو) ازاي عايزنا نتجوز ؟

هو : انت عارفة كويس قوي ان الموضوع ده مش بيفرق معاي في حاجة

هي : بس بيفرق معاي انا .. حاسة زي ما يكون هيفضل طول عمره حاجز ما بيننا

وبعدين حتى لو انت مش حاسس بيه دلوقت .. اخاف مع أول مشكلة تعايرني بيه تقولي اني اكبر منك واطول منك وحاجات من دي

هو : انا عمري ما هقول كده والدليل اني عمري ما قولتلك كده لغاية دلوقت

هي : مش عارفة بقى .. خايفة بجد تكون دي النقطة اللي تهد عشنا بعد كده

تفتكروا بقى موضوع ان البنت اكبر من الولد

أو البنت أطول من الولد

بتفـــــــــــــــــــــــــــــــــــــــــــــــرق ؟

ولو متفرقش .. هتيجي لغاية فين وتفرق ؟

فوز بلا طعم

2007-03-02T13:22:00.000+02:00

أيكون الفوز له معنى عندما تكون وحيداً ؟

أيكون للفوز معنى إذا كنت لا تجد من يشاركك فرحتك ؟

أيكون للفوز طعم إذا كنت لا تجد من تهديه إليه ؟

إذا فزت بكأس العالم في أي شيء أتحس له فرحة إذا لم تجد من ترسل له قبلة في الهواء ؟

إذا لم تجد من ترفع له الكأس عالياً وتقول له لقد فزت به من أجلك .

ولكن هل معنى ذلك أن من لهم شركاء يعيشون وغيرهم لا ؟ وهل يمكن من لا يوجد له شريك أن يكتفي بذاته ؟ أي يهنئ نفسه عند الفوز ويواسي نفسه عند الخسارة ؟ وإذا شعر بالحزن يسري عن نفسه بنفسه ويبحث لنفسه عن وسائل الترفيه ؟ وإذا أحس بحاجة إلى الكلام فلديه نفسه ليحكي لها أحداث اليوم وإذا أراد أن يهرب من عالم الواقع فإنه يلجأ إلى عالم الخيال الذي سيجد فيه ما ينقصه في واقعه .

أظن أن هذا مرضاً ... فهل يكتفي بذاته لأنه يخشى الاقتراب من أحد لدرجة كافية أن يتبادل معه الأسرار والحكايات الغث منها والسمين ؟ أم أنه لا يجد في نفسه الثقة الكافية التي تشعره بأنه مقبول لدى الآخر ؟ أم أنها فتاة لا تستطيع الإفصاح عما يدور بداخلها كي لا يأخذ عليها أحد ذلك . وبالتالي تعيش هذه الفتاة حبيسة نفسها في حين أنها تظن أنها هكذا مكتفية بذاتها ولا تحتاج لأحد بجوارها أم أنها تدرك هذه الحقيقة المرة ولكن تعايشت معها بعد مرارة كئيبة ؟

لا أدري فقد تكون تلك هي أنا

مش عارف مين Vs مش عارف مين

2007-02-21T22:08:00.000+02:00

كنت مرة مروحة وراكبة مكروباص داخلي ( الظاهر الحكايات كلها بتيجي من ورا المكروباصات ) المهم عدينا من على قهوة ولقيت قدامها زحمة كتييير ييجوا 15 واحد كده ولا حاجة ويمكن أكتر كمان ، أنا قلت دي أكيد خناقة وبعدين لقيتهم مش ماسكين في بعض ، اتفاجئت بقى انهم كلهم مشدودين للتلفزيون بتاع القهوة .. ببص عالتلفزيون لقيت ماتش مصارعة والناس عمالة تشقلب بعضها ودييييب طراااااااخ طيييييييخ طووووووخ والناس تهيص وفرحانة وكلهم كبار بشنبات ( اه والله ) طبعاً كل ده حصل في دقيقة مسافة ما المكروباص عداهم ، المهم قلت ف عقل بالي : يا خبر بقى الرجالة دول بيتفرجوا عالمصارعة ومشدودينلها كمان كده ، ده له حق الواد اخوي بقى ميبطلش كلام عنهم ... نرجع تاني للمكروباص اللي انا كنت راكباه ، ما هي الحكاية مخلصتش عند كده ... لقيت التلاتة اللي قاعدين قدامي ( السواق + واحد راكب وعلى رجله ابنه + كمان راكب ) شبكو بقى ف موضوع المصارعة من أول ما شافوا اللمة عالقهوة لغاية ما وصلنا لآخر محطة وكانت مسافة لا بأس بها ويتناقشوا جامد .. واحد يقول انا مشفتش احلى من هوجان بيلعب في المصارعة دي والتاني يقوله : لاااااء مفيش أحلى من جون سينا (أنا طبعاً عندي خلفية عن الأسامي دي لأن اخوي كان بيصدعلي دماغي بيهم ربنا يخليهولي ) ده حتى الراجل اللي كان شايل ابنه على رجله سأله : الواد اللي كان بياكل ضرب ده يا ابراهيم وبعدين يقوم تاني اسمه ايه ؟ قام ابراهيم الصغير رد : أندر تيكه بتشديد الكاف وفتحها ( يقصد أندر تيكر يا جماعة متخدوش على كلام الولد لسه صغير برده) وقعدوا يقولوا لبعض مواعيد الماتشات و... و ... و ... إلخ إلخ إلخ
بصراحة أنا مش عارفة هم سابوا للشباب الصغيرين والعيال ايه ؟ ولا تفتكروا ده مزاج وملوش دعوة بالسن ؟؟؟؟؟؟؟؟؟؟؟

عارفين ده مييييييين ؟ فينك يا ابراهيم

Feeling Grateful

2007-02-17T12:39:00.000+02:00

Our friendship has been such a special part of my life

i'll always be grateful for that and for you

people like you are such a beautiful blessing in this world

with gratitude for all you do and all you are

you made a great difference in my life

حوار خيالي جداً

2007-02-15T00:56:00.002+02:00

هو : انت زعلانة مني في حاجة ؟ أنا زعلتك في حاجة ؟

هي : أنا؟ انت زعلتني ؟ لأ ، أبداً أنا زعلانة من نفسي مش من حد تاني

هو : ليه ؟ زعلانة منك ليه ؟

هي : أصل .. عشان .. لأن أنا كده هضحك عليك ، كنت هتفتكر ان الشخصية اللي بتكلمك من بعيد هي نفس الشخصية اللي واقفة قدامك ، وأنا كنت فاكرة نفسي كده .. لقيتني أول ما شوفتك اتلخبطت وارتبكت وقعدت أبحلق في كمي ومفوقتش إلا وصاحبتي بتخبط على وتقولي هو انت مش ناوية تسلمي على ولا ايه ؟ ساعتها بس حسيت بالفرق ، حسيت ان في حاجة غلط .. أنا المفروض مكنش حاسة بكمية الإحراج الرهيبة دي اللي كنت حساها ، ساعتها ومن يوميها مش عارفة أفهم ايه اللي حصل .. فقلت لنفسي خلاص ستوووووب مادام مش هي نفس الشخصية اللي جواي اللي بتتعامل في الموقفين يبقى أبطل كلام أحسن لأني قررت لو مكنتش صادقة مع نفسي يبقى عالأقل أبقى صادقة معاك .

أرجوك متزعلش مني .. أنا بس بعدت عشان خفت .. أتكهرب

الحوار ده خيالي جداً .. بس لو حصل تفتكروا يتفهم منه ايه ؟

الميه تروي العطشاااان .. وتطفي نار الحرااان

2007-02-12T00:44:00.000+02:00

أحلى حاجة في الجو الساقعة اللي احنا فيه ده دش دافي وتخيلوا بقى معاي أشكال نوتة موسيقية بتتطاير حوالين الواحد وهو بياخد الشاور وبيغني بقى ومبسوط عالآخر

بس أسوأ حاااااااااجة

إن السخاااااان يطفي عليييياااااااا

بجد دي أسوأ حاجة ممكن يتعرضلها أي مستحم

مش عارفة الموضوع ده مناسب للكلام عنه ولا لأ بس

السخااااااااااان خنقني جدااااااااااااااااااا

أنا اتورطت جااااامد يا جدعاااااان

2007-02-08T22:36:00.000+02:00

قال ايه وأنا قاعدة فـ أمان الله بتصفح مدونات اصحابي والتعليقات اللي عندي وعندهم لقيت شاب فقري والأباصيري وشيكو ممررينلي التاج بتاع الأسئلة الشخصية واتورطت أحلى توريطة على أرض مدونتي .. المهم أعمل ايه .. أعمل ايه .. ما هو انا مش عايزة أهرب وفـ نفس الوقت مش عايزة أجاوب قلت أمري لله وأقبل التاج وبعدين أجاوب باللي يطلع ساعتها بس عشان أكون صادقة معاكم أنا لسه مش مستعدة أصرح بشخصيتي الحقيقية فاحتمال تلاقو رخامة في الأجوبة

الأولى بسم الله

إيه اللي هيحصل لإيميلك بعد ما تموت ؟

ببساطة شديدة جداً إيميلي هيموت معاي لأني بعتبره مكاني الخاص اللي ممكن أقعد فيه لوحدي من غير ما حد يعكر علي صفو هدوئي ولا يقتحم علي خلوتي وبالتالي محدش يعرف خصوصياتي

**********************************

إديت الباسوورد لحد قبل كده ؟

لأ ، عمري ما اديته لحد قبل كده ولا هديه لحد بعد كده إلا في حالات خاصة جداً لسه ماوردتش علي

**********************************

لو آه كانت طبيعة علاقتك بيه إيه ؟

لازم يكون حتة مني (مقصدش حرفياً) أقصد نكون أنا وهو واحد في كل حاجة

**********************************

اسمك ؟

بما أن أنا معنديش لسه استعداد أصرح عن نفسي فهكتفي باسم : شمس

**********************************

اسم الدلع المشهور بيه بين أصحابك ؟

السؤال ده تابع للسؤال اللي قبله وبالتالي هيكون اسم الدلع : شموسة

**********************************

عمرك ؟

لسه بادئة الـ 25 من كام شهر

**********************************

البرج ؟

بسم الله الرحمن الرحيم : العقرب ممكن ماتقروهاش بالعربي لو تخض اقروها : سكوربيون أحسن

**********************************

مجال دراستك ؟

الكمبيوتر بس أنا لسه فيه على أول الطريق

**********************************

شخصيتك نوعها إيه ؟

أنا عاملة زي البيضة النية ليها قشرة صلبة وقاسية من بره لكن هشة من جوه

محدش يسألني التشبيه ده جالي ازاي .. أهو جه وخلاص

**********************************

السفر بالنسبة ليك ؟

حاجة نفسي أحققها علطول ولأماكن بعيدة لأني بحس فيه بمتعة جميلة ، بيمثلي فرصة الانتقال من مكان لمكان وبالتالي ترك شيء ما خلفي والاتجاه دائماً للأمام بدون النظر للوراء

**********************************

المود بتاعك ؟

حاسة إني دايماً بمثل يعني لما ببقى مكتئبة برسم الضحكة على وشي ولما ببقى فرحانة برسم الاكتئاب .. مش عارفة ليه

زي ما يكون خايفة ان حد يعرف إيه اللي جواي عشان كده بخبيه

**********************************

وقت فراغك بتعمل فيه إيه ؟

طب ياريت يبقى عندي وقت فراغ ، مكنتش غلبت .. ده أنا نفسي أشحت كام ساعة أعمل فيهم اللي نفسي فيه أصل أنا وراي حاجات كتير لازم أعملها بس للأسف اليوم مبيقضيش لما خلاص بقيت بشد فـ شعري

**********************************

الصفات اللي خدتها من بابا ؟

الصدق وتقريباً كده بعد النظر والنباهة ونفسي آخد منه الشجاعة

**********************************

الصفات اللي خدتها من ماما ؟

إني مبقدرش أشوف حد عايز حاجة وفـ إيدي إني أساعده ومعملهاش ومتهيألي الحنية ونفسي آخد منها الصبر

**********************************

أكتر 6 حاجات بتكرهها ؟

الخيانة والكدب والحرب والتمثيل والتردد والتكبر

**********************************

أكتر 6 حاجات بتحبها ؟

الصدق والشجاعة والسفر والضحكة العالية اللي من القلب والجري تحت المطر وبحب الهوا يلعب في شعري ويرجعه لورا

**********************************

الأكلة اللي بتفضلها ؟

البطاطس .. البطاطس .. البطاطس .. بجميع أنواعها

البيض .. البيض .. البيض .. بجميع أنواعه

**********************************

الشغل بالنسبة لك ؟

وسيلة للاستقلال النفسي وكسب المصاري (الفلوس) وتحقيق الأسطورة الذاتية

**********************************

الكمبيوتر والإنترنت بالنسبة لك ؟

حياتي .. بحس وانا من غيرهم زي السمكة اللي طلعت من المية

برده محدش يسألني التشبيه ده جالي ازاي

عايزة أعرف بقى ازاي نوصل لأول واحد اخترع حكاية التاج ده

وعموماً أنا مش هدبس حد عشان أصلاً زمان الناس كلها وصلها التاج ده لأني كل ما افتح مدونة ألاقيه أول حاجة تقابلني ، المهم كل الناس بتدعي عالتاج ده متهيألي عشان الفضايح بس هي فعلاً طريقة ظريفة وحلوة عشان نتعرف على بعض أكتر

التاج ده حلو

2007-02-04T23:07:00.000+02:00

ولو اني مش فاهمة لغاية دلوقت يعني ايه تاج بس شكله كده حاجة وبيمرروها لبعض ، أنا قريت تاج المعلومات الشخصية عند لميا وعند برنسس بس بصراحة التاج اللي عجبني أكتر كان اللي بيقول تمسكي أقرب كتاب ليك وتفتحي صفحة 123 وتعدي 5 سطور وتكتبي أول 3 سطور بعدهم وانا نفذته كالتالي :

( بل ماذا أقول في هذا العصر الذي ازداد فيه التجمع والتكتل ؟ أأقول ما قد قاله سواي من أنه حتى الجريمة في عصرنا هذا لم تعد فردية ، وإنما أصبحت نشاطاً يتفق على القيام به "عصابة" بأسرها ؛ لقد انهارت خصوصية الحياة ... )

اسم الكتاب : في حياتنا العقلية

المؤلف : د. زكي نجيب محمود

أنا بدعو أي حد فيكم تعجبه الفكرة دي ينفذها

مش بدبس حد يعني من الآخر

شكراً يا شيكو

2007-02-02T08:31:00.000+02:00

البوست ده مخصوص عشان أنشر شكري وامتناني للجميلة "شيكو" عشان ساعدتني في تبييض الشقة قصدي المدونة وبشكرها قدام كل المدونين والمدونات وعشان ناخد احنا الاتنين ثواب أنا هنشر التعليمات بتاعتها بالنص بس تدعولها وتدعولي وجزاكم الله خيرا

عشان تحطى صورة خاصه بيكي ادخلى على الموقع ده

http://up.bof3d.com/index.php?num_files=4

ومنه ارفعى صورتك هيطلع لك بعد كده رابط لوضع الصورة فى موقع او منتدى اعملى

copy

للرابط وحطيه فى البلوج من خلال

dashboard- Eidt profile

بعدين

photograph

ومتنسيش تعملى

save

==================================

عشان تحطى ساعه ادخلى على الرابط ده

http://www.clocklink.com

تختارى

Want a Clock on Your Website

بعد ما تنقى شكل الساعه اللى عجبك تضغطى على

view html tag

هتفتح لك صفحه اعملى

accept

اعملى

copy

للاوامر بتاعت الـ

html

وبعدين من

tamplate

اختارى

page elements

ثم

add a page element

هتلاقى صفحه تفتح اختارى منها

html \ java

وحطى الاوامر اللى نسختيه قبل كده من الموقع

==================================

وعشان تحطى كومنت بوكس ادخلى على الموقع ده

http://cbox.ws/?box=1453049

واختارى منه

sign up

واختارى بعد كده لون المربع اللى يناسب خلفيه البلوج بتاعك وخدى نسخه من الـ

html

وحطيها بنفس الخطوات السابقه فى البلوج بتاعك

===================================

عشان تحطى صورة للمود بتاعك بتدخلى على الموقع ده

http://www.punkymoods.com

وتعملى

sign up

وتختارى بعد كده المود بتاعك وتخدى التاج بتاعه

copy

وبعدين

paste

بنفس الطريقه فى البلوج بتاعك

==================================

استكمالاً لجمايل شيكو علينا هنشر اللي قالته بخصوص ازاي ننزل أغاني

عشان الموضوع يكمل نقول ازاى نقدر ننزل اغاني وبرضو موضوع سهل وبسيط ونبتدى ونقول ندخل على الموقع ده

http://www.mp3profiles.com

اضغطوا على

sign up

وبعد كده اضغطوا على

add songs

فى الوقت ده تكونوا فاتحين موقع تانى اسمه

http://www.fileden.com

وده لازم برضو تعملوا فيه

sign up

تضغطوا على

upload

ومن

browse

اختاروا الأغنية اللي انتو عايزينها ، ملحوظة : لازم الأغنية تكون

mp3

طب بعد ما حملنا خلاص ولازم يكون عندنا شوية صبر هنلاقى ويندو جديده اتفتحت نضغط على

direct url

وتقوموا بنسخ الرابط وترجعوا تانى على موقع

mp3profiles

وتعملوا

paste

للرابط فى

add new url

واكتبوا

song name & band name

فى نفس الصفحه فوق هتلاقوا

Get a player

تحددوا فيه شكل ولون البلاير بتاعكم ولون كتابه اسماء الاغانى وخلفيته وطبعا ده شئ متروك لاذواقكم وبعدين اعملوا

update preview

لسه مخلصناش .. اضغطوا على

get code

وطبعا تأخدوا

copy & paste

فى البلوج من خلال قايمه

dash board-template-html\java

وبكده مبروك عليكوا البلاير وسمعونا احلى اغاني

تحياتي - يعني شيكو اللي بتقول تحياتها

==================================

التعديلات الجديدة اللي شيكو قالت عليها ونخلي بالنا المرة دي كويس

سيداتى انساتى سادتى

زعلتونى ازاى البلاير ما بيشتغلش؟!!

انا ممكن اخمن النقطه اللى وقعتوا فيها هى ان انتوا تنفذوا ما سبق حتى الخطوه بتاعت الرجوع تانى على موقع

mp3profiles

وتعملوا

paste

للرابط فى

add new url

واكتبوا

song name & band name

وبعدين اضغطوا على

click here if u don't have a player

وده هيحافظ لكم على روابط الاغانى اللى رفعتوها وفى نفس الوقت هينقلكوا على صفحه تختاروا منها البلاير وخصائصه

معلش يا جماعه النقطه دى سقطت سهوا جربوها تانى وانا فى انتظار اى تساؤلات .. شيكو يعني

وجزاك الله خيراً يا شيكو

============================

طريقة تانية لرفع صوت على البلوج

بعد ما تعبنا شيكو معانا ودوخناها ورانا قلنا نديها
break

ونسأل شاب فقري على طريقة تانية لرفع الصوت على البلوج عشان اللي عايزالطريقة الأولانية يشتغل بيها واللي عايز الطريقة التانية يشتغل بيها واهو زيادة الخير خيرين ويا بخت من نفع واستنفع وكانت إجاباته وافية ومستوفية كالتالي :

خدى الكود ده (أنا حطيته في لينك عشان الكود مكانش عايز يتنشر في البوست)

http://img145.imageshack.us/img145/7861/coderealplayerma2.jpg

وحطيه في

html/javascript

وغيرى لينك الاغنية للأغنية اللى عاوزاها تشتغل اوتوماتيك عندك لينك الاغنية من اول

http

لغاية

ram

ودي مواقع تجيبى منها لينكات اغانى ريل

www.salmiya.net

www.6arab.com

بس تخدى لينكات الاغانى الاستماع مش التنزيل لو مشعارفة ازاى تجيبى لينكات الاغانى اعملى كليك يمين بالماوس على كلمة استماع اللى ادام ا لاغنية اللى اختارتيهاوبعدين

properties

هتلاقى اللينك ادام كلمة

address

وخللى بالك عشان بيكون طويل شوية لو مش عاوزة الاغنية تشتغل اوتوماتيك شيلى

true

وخليها

false

وطبعاً بنشكر شاب فقري جداً على المعلومات الهايلة اللي إن شاء الله هتحل أزمة عند اللي المبتدئين اللي زي حالاتي

فاطر كشري عالصبح

2007-02-01T02:57:00.000+02:00

لما الواحد يصحا الصبح وهو مكشر ووجهه مكفهر ومش عارف يستقبل يومه ازاي ، لما يبقى قاعد على السرير بيفكر ويقول يارب حاجة جديدة النهاردة ( ان شاالله خناقة ) ، لما يبقى مكسل يقوم من عالسرير عشان مفيش حاجة تشده يقوم يعملها ، لما يبقى عارف ان وراه شغل لازم يروحه بس المشكلة ان مرواحه تقيل على قلبه مش عايز يروح ، لما يبقى مش عايز ينزل الشارع علشان ميشوفش حد ولا حد يشوفه ، لما يقابل الناس وهو مكشر وعابس في وشهم ويجيبلهم اكتئاب لما يبصوا في وشه .. يبقى ايه الحل ؟ هل يرسم على وشه ابتسامة ويبث في الناس اللي حواليه التفاؤل والبهجة ، لما يعمل كده وجواه قلب مجروح او ملل فظيع بس ميبانش على وشه مش كده يبقى بيضحك على نفسه ؟ وفي نفس الوقت لو طلع اللي جواه على وشه حقيقي محدش هيرضى يبصله ويقولوا عليه كشري وكئيب ونكدي .. طب نعمل ايه ؟ نعيش بمليون شخصية ؟ .. ولا ايه ؟ ده اكتر واحد هيفرح لو لقى واحد بيضحك في وشه و ده اكتر واحد محتاج يبص في المراية وهو يبضحك علشان ينسى الكشري اللي شكله فاطر بيه عالصبح .

أكل عيش من الزبالة

2007-01-27T22:30:00.000+02:00

وأنا بنشر الغسيل النهاردة الصبح كانت الساعة حوالي سبعة كده ( متستغربوش .. بتحصل ) بصيت في الشارع لقيت عربية كارو راكبها راجل مش كبير اوي في السن و لقيته بيقف عند كل زبالة متعلقة قدام كل بيت ويدور فيها ولما قرب على قدام بيتنا رجعت لورا عشان ميشوفنيش ، المهم كملت المهمة البوليسية دي مانا عايزه اعرف بيدور في الزبايل ليه ؟ لقيته وقف قدام البيت اللي جنب قدامنا وقلب الزبالة على الأرض وطلع منها اكياس وانا مستغربة عالآخر ولقيته طلع منها إزازة بلاستيك زي اللي فيها صابون المواعين وطلع جركن كمان وبعدين مشي شوية هو والعربية الكارو وراح راجع تاني ناحية الزبالة فقلت اله ؟ هو نسى حاجة ولا هيرجع الأكياس تاني جوه الزبالة ؟؟؟ لقيته راح خد حتة حديدة طويلة نوعاً ما من عالأرض جنب الزبالة وحطها عالعربية ومشي وهكذا قدام كل زبالة متعلقة ... المهم انا مكنتش عارفة اقول ده حرامي ولا مسكين بيدور على اكل عيشه في الزبالة كنت هصوت وبعدين رجعت ف كلامي وقلت حراااام ... ده أكل عيش برده .

تفتكروا بقى بذمتكو الحالة توصل بينا في مصر ان انا ندور على اكل عيشنا ... في الزبالة !!!!!!!!! ؟؟؟؟؟؟

هتدفع انت ولا ادفع انا ؟

2007-01-23T19:38:00.000+02:00

النهاردة وانا راكبة الميكروباص الداخلي وطبعاً بعد ما اتحشرنا في بعض خمسات خمسات قصدي أربعات أربعات وبنات في ولاد وولاد في بنات ومعادش حد بيهمه اي حاجة جه نصيبي في الكنبة اللي ورا اتزنقت جنب الشباك علشان كان في 2 شباب تانيين في نفس الكنبة ركبت وراي بنت متمنكشة حبتين ومرضيتش تركب رابع قلت في سري الحمد لله وكان البوي فريند بتاعها واقف عالباب من جوه مستني يشوف هيقعد فين قام التباع قاله تعال هنا يا غالي يقصد الفسحاية اللي جنبي علشان يكمل اربعة في الكنبة من هنا بقى بدأت ألاحظ التصرفات الغريبة لقيته بيقول للجيرل فريند بتاعته هو انت مش هتقعدي هنا وبيشاور على الفسحاية اللي جنبي وبعدين راح قاعد .. استغربت قوي يعني هو بيسألها كده ليه ؟ عايزها تتحشر هي ؟!! المهم نيجي للموقف اللي بعد كده التباع مستني الأجرة لقيتها بتطلع الفلوس وتديها للمحروس قصدي للبوي فريند بتاعها المشكلة مكانتش في انهما بيتشاركوا المصاريف سوا لكن المشكلة كانت في انها محرجة وهي بتعمل كده وبتبتسم ابتسامات باهتة وكده قال يعني علشان الإحراج ولقيته بياخد الفلوس ويديها للتباع قام التباع مرجعها له وقاله غير الجنيه ده يا أستاذ مبيمشيش ومحدش بيرضى ياخده ، طبعاً "الأستاذ" معهوش قام رجعه للجيرل تاني وادتله جنيه تاني وهي في قمة إحراجها ، أنا كنت حاسة بكده في الجو ، زمانكو بتقولولي وانت مالك يا حشرية .. هم اللي كانوا قاعدين واحدة قدامي والتاني جنبي مشوفهمش ازاي يعني .. المهم الباقي كان ربع جنيه اداهملها وهي فضلت مسكاه بإيديها لغاية ما نزلت .. الخلاصة بقى : اني اتخنقت من العلاقة اللي ما بينهم .. انا معنديش مانع ان اي اتنين يتشاركوا في المصاريف ومرة علي ومرة عليك لكن يبقى في احراج وحساسية في التعامل يبقوا بيضحكوا على بعض وفي واحد بيستغل التاني والتاني راضي وعاجبه .. خلاص ملناش دعوة بس انا كنت بقول ملحوظة يعني خصوصاً ان الموضوع مكانش مستخبي .. اصلاً بيبان يعني على شكلهم .

هلوسة أم حلم أم كابوس أم ماذا !!!!!!! لا أدري

2007-01-22T22:07:00.000+02:00

أفتح عيني ببطء أشعر بآلام حادة في رأسي يوجد ظلام دامس حولي تمضي فترة قصيرة لا أستطيع أن أدرك فيها شيء .. من أنا؟ أين أنا؟ آآه يا دماغي ما زالت رأسي تؤلمني ولكن مهلاً .. تتضح الصورة شيئاً فشيئاً أنا في في حجرة ضيقة لوحدي ولا توجد معي قطعة أثاث واحدة بل أنا ملقاة في جانب أنظر حولي جيداً فيصطدم نظري بالجدران أرتفع ببصري مع الجدران أصرخ ما هذا شباك عليه ستائر حديدية إذن أنا في زنزانة تسري في جسدي قشعريرة أرتعد من الخوف ما الذي أتى بي إلى هنا!! ومازالت رأسي تؤلمني أتأمل الفراغ أشعر بشيء ما يلمس يدي أرتد إلى الخلف في ذعر أجد طفلاً صغيراً بجانبي يعاني من فقدان إحدى عينيه ينظر إلي ثم يقف ويستدير بعيداً مهلاً .. كيف دخلت إلى هنا لا تتركني وحدي آآآه يا دماغي الآن تؤلمني رأسي أسمع أصواتاً قادمة من بعيد أدرك هذه الأصوات جيداً إنها أصوات أسرتي أفاجأ بهم معي داخل نفس الغرفة الضيقة ولكنهم لا يرونني أصرخ ليسمعوني برده مفيش فايدة وفجأة يصمتون وينظرون نحوي يدركون لأول مرة أني ابنتهم يقفزون نحوي ويمدون أيديهم لي ولكني لا أستطيع مد يدي وأشعر بأيديهم تلمسني ولكنها تغوص في الهواء وتتلاشى الصورة لتبدأ رأسي في إيلامي من جديد أغمض عيني أسند ظهري إلى الخلف أجدني أهوى إلى أسفل وأصرخ ولكني لا أسمع نفسي .. أصحو مرة أخرى ولكن هذه المرة في سرير تخرج مني خراطيم كثيرة يا إلهي ما زالت رأسي تؤلمني ، يطالعني وجه أفضل صديق لي يتمتم بكلمات لا أتبينها أرى شفتيه تتحركان ولكن لا أسمع شيئاً أريد أن أخبره أني لا أسمع ولكني لا أستطيع ، مهلاً .. أرى دمعة تنحدر خلسة من عينيه إنه يودعني ولكن لماذا ؟ إلى أين أنا ذاهبة ؟ إلى أين هو ذاهب ؟ للمرة المليون أين أنا ؟ ولماذا أشعر أني أحلم !! يمسك بيدي يقبلها أشعر برعشة بسيطة كم كنت أتمنى أن يفعل هذا أحدهم معي يرحل بعيداً كلا لا تتركني وحيدة كم أحب الوحدة وأكرهها لماذا يصر الجميع على الرحيل وتركي هكذا أشعر بحركة بجانبي وصوت يقول أنا آسف ثم أحدهم يغطي وجهي ما هذا ؟ ما الذي يحدث ؟ آلا يكفيهم أني لا أستطيع أن أتحرك ليضعوا فوقي غطاء آخر .. ولكن هذا يعني شيئاً واحداً إنهم يظنوني ميتة كلا عودوا إلى هنا جميعاً أنا ما زلت أتنفس الحكاية كلها إني مش قادرة أحرك لا إيد ولا رجل آآآه تعود رأسي لتؤلمني من جديد

وأنا مالي .. هو كان بتاعنا

2007-01-20T01:39:00.000+02:00

وأنا راجعة النهاردة من الشغل كان في اتنين ماشيين قدامي ، واحد فيهم كان شايل صندوق وبعدين اتخبط منه كد ه فصاحبه قاله : متحاسب ليتكسر ، تخيلوا رد عليه قاله إيه : وانا مالي هو كان بتاعنا .

لو كل واحد في مصر اتبع النظرية دي يبقى احنا خايفين على حال البلد وعايزين نصلحها ليه ؟ هي كانت بتاعتنا ؟

والنظرية دي مبتخليش أي حد يحافظ على أي حاجة عامة ، يعني بيتصرفوا بكل أنانية وغير مسئولية

كل سنة وانتم احسن من كده

2007-01-17T22:27:00.000+02:00

كل سنة وكلكم طيبين وانتو منوريني هنا في بيتي ، على فكرة لسه مبني جديد حتى انا لسه شامة ريحة الدهان ، صحيح هي جاية متأخرة شوية (التعييد والعيدية والذي منه) بس ده علشان انا لسه بانية جديد ولسه مشطبتش حتى الدور الأول ومحتاجة الأيادي العاملة يا أصحابي علشان يبقى بيت جميل ، يعني مثلاً عايزة ارفع صوت يتفتح تلقائي مع فتح بوابة المنزل (زي ما تقولوا كده صرير باب حلو شوية) وعايزة احط بانر على البوابة بس مش عارفة ازاي فساعدوني ومتشكرين مقدماً